Read berom Cīnat Neha 30 Bible Online

Cīnat Neha 30 - berom bible

Cīnat Neha 30

¹Neha siitit nè Agur Yakɛ a nemo ngan: Ma ga ruru na tó hom, à Dagwi ma ga ruru na tó hom, ma ga sɔ́ me hywiri.

²Mwin ma kat netɔn de bê yang me à mwasi, ma vɔk tɔ́k-tsik hê bemasi wɛt.

³Ma ga masa netsitsɛng hɛ, kɛ ma vɔk tɔ̂k Wo Jɛrɛ wɛt.

⁴Wa a ga tut e hwomo e lagwi na a to gyirik ɛ? Wa a ga gunung gul e vwɔ mɛ ɛ? Wa a ga gunung nshi e rugu mɛ ɛ? Wa a bomo retis neyɛnɛ jey ɛ? Reza mɛ a wa, ko rezâ hwey mɛ a wà ɛ? Mwin hwà tɔk!

⁵Kahɛ hâ Dagwi he sè mwin, a sé ruga na vemo de be jama kwɔ̂n dal na yɛ.

⁶Hwo gwɛ e ra neha mɛ wɛt, yaga ê kwon gyong o, ko bê sɛ̀ o mwât bɔs.

⁷Pyɛ́ bya de me rangal na hwo, hwo romɛ a me wɛt gyam me ku.

⁸Gas me yikyik yi e sekwɛ́lɛng na bɔs, hwo nɔng me nepɛng kɛ nedanerey wɛt, re na me na pyɛ́ de ya jam a me,

⁹me kwon sirik na me tono na hwo, me ye, “Wa a sé Dagwi Darwey ɛ?” Kɛ me sè pwɛng na me shigi, na me ra jɔgɔ na rezâ Dagwi hom wɛt.

¹⁰Hwo kwònɛ mwât fwom e nuyel dalɔ mɛ wɛt, yaga ê mok gawey e ra hwo, ko bê tɛ̀ hwo sè wo renɛn.

¹¹Behak ba sé de be dusa beda mɛn, ko be ka dura a bede mɛn nerat wɛt.

¹²Behak ba sé de e di mɛn ba sé haalal, ko ba ga pát ɛn yi e neligis mɛn wɛt.

¹³Behak ba sé e yerê paa kwas na toros rato, be di, vit a mwat de a dal ɛn.

¹⁴Behak ba sé de yìn mɛn ba sé wal, bètik mɛn ba sé neba, be tangal mɛ bepɛng, tanga vemo de vit a hɛn na sɛlɛ e jey.

¹⁵Byàna ya vɔk nèy behwong neba, be yila hɛn a “Nɔng, nɔng.” Pyɛ́ tyat ye sang sirik wɛt, nyaas mwa de ye sang ye, “A ga vey ano wɛt.”

¹⁶Kwɔ̂n bevuvwel, na sang-gwon hwā, na vwel hwogot de he sirik rwak wɛt, tanga kya de he sang ye “A ga vey ano wɛt.”

¹⁷Ka sede hwêy tabas a da mɛ nengyas, he to byɛs neng hɛ, behwǎk nɛk bê pat hɛ ko bejagawey bê re hɛ.

¹⁸Pyɛ́ tyat ya sé a me pyɛ langat sizɔng, nyaas mwa de ma tɔ́k-tsik yɛ wɛt, yɛ à:

¹⁹Gwông kim e lagwi, gwông gwɔ̄m e ra gbondong, gwông dwa-nshi e ra berep, tanga gwông rwas na hwong.

²⁰Negwɔn jwâng hwā à nemo: e re, ko a yishing nu mɛ, ko e ye “Ma ga buru pyɛ wɛt.”

²¹Pyɛ́ ya sé tyat de jey ye digis ɛ, nyaas mwa de ye tɔk niri mɛ wɛt, yɛ à:

²²Sam de a tɛ́ ɛ gbɔng gwɔ̀m, na tɔn de a sila na pyɛ̂ re,

²³hwā de be kyɛ́ ɛn hɛ, jeng de a ra weneng, hwông fwom de a sey ɛ rwâs delɔ mɛ.

²⁴Pyɛ́ nyaas e jey ya sé shɛl o, ko ya vɔk sɛ́ng tyɔng wɛt, yɛ a:

²⁵Cōlong de ya vɔk gap wɛt, ko ye tula pyɛ̂ re yɛ nazɛng,

²⁶shónong ya vɔk gap wɛt, ko ye yong nelɔ mɛn e tê beta,

²⁷rawal wa vɔk gbɔng gwɔ̀m wɛt, mwa ano wo kyè gwarwang mɛn,

²⁸be lɛ́mɛs de hwô tɔk jut e vwɔ mō, ko be sɛ̀ vɛ e nelɔ begbɔng begwɔ̀m.

²⁹Pyɛ́ tyat ya sé de kwɛngɛl yɛ gwa sé rwat e bɛrɛng, nyaas mwa de kwɛngɛl yɛ gwa sé pyɛ kaa, yɛ à:

³⁰Gukum de wa dal bwang ngyāma mwa na gap ko wo wok bengyip pyɛ wɛt,

³¹gam, na rungat de be kyè kwɛngɛl kaa, tanga gbɔng gwɔ̀m de e kyè na bemat mɛ naka.

³²Ka sede hwà kana sé tɔn hwà toros to mō, kɛ hwà kyě yong gwong vwes, ko kaba nu mō!

³³Jagat nevasal ko něy nê tula hɛn, pɛsɛl wol ko hê vey na sɔrɔng, té a mwat shom, ko ye sogo yol.