Read berom Cīnat Neha 31 Bible Online

Cīnat Neha 31 - berom bible

Cīnat Neha 31

¹Neha siitit ne Gbɔng Gwɔ̀m Lɛmwɛl a nemo ngan, nemo de neng-gwɔ mɛ a basa a yɛ:

²E sɛ́ a hwey hom ɛ? E sɛ́ de hwó ra, a hwêy lāgey hom ɛ? À hwey de ma ra won na Dagwi ɛ!

³Hwo kwon lashe gap mō na beha wɛt! Ba ga wey na begbɔng begwɔ̀m. Hwo kwon wey na dyam mō e ra yɛn wɛt!

⁴À Lɛmwɛl, a jam na begbɔng begwɔ̀m be sɔ nshi anap kɛ begwɔ̀m be vɔk cwey siring wɛt!

⁵Ka ba sɔ bê ye bam na badu, ko bê doyo tsak o, be midra a bepɛng.

⁶Hala siring na vemo de ba sé e gwong reku, ko nshi anap na vemo de be wok reyɔm.

⁷Tik na yɛn a sɔ na be ye bam à nepɛng mɛn, ko bê bare na reyɔm mɛn wɛt.

⁸Hanat na hwo sɛlɛ vemo de vit a lêm há, yaga pyɛ vemo de ba hala hɛn gbingiring.

⁹Hanat na hwo gas badu na necik, gyeng pyɛ́ de ya sé yê pwɛng na vê bidɛ.

¹⁰A sé negban na be sɛ̀ hwâ negwɔn nerat! A dal dyéngere ryat.

¹¹Rwas mɛ e tɛ̀ gap mɛ e ra yɛ, ê bidɛ pyɔlɔ wɛt.

¹²Hwā mo e ra a yɛ pyɛ́ ryat, ko vyes wɛt, mwa neyɛnɛ neken mɛ.

¹³E jama wuulu na toro, ko e ra fwom mɛ na yey pyɛng.

¹⁴A sé sede bedwa-nshi ve nejik, e vɛ̀sɛ na pyɛ̂ re mɛ yikyik.

¹⁵E sogo bwang túruk gwo sé rɔngɔl, e nɔ̂ng belɔ mɛ pyɛ̂ re, ko e gas a behwóng mɛ fwom.

¹⁶E bɛrɛng cap naka ko a sey yɛ, ko dyām de e sɛ̀, e yong mɛ bwî anap.

¹⁷E rɔgɔs wit mɛ na gap, ko e lɔk bato-vɔ mɛ.

¹⁸A tɔk pyɛ̂ nejik mɛ ya vɔk pyɔlɔ, kywa-kya mɛ gwo ku wɛt mwa turuk.

¹⁹E tabas shwêy wuulu mɛ pyɛ mɛ, e lɔk berugu na vɔ mɛ.

²⁰E viri vwɔ mɛ vɔk na bepɛng, vɔ mɛ be wul na vê jama sɛlɛ.

²¹E ka sap neyɔɔtɔt yaga belɔ mɛ wɛt, yaga mwa belɔ mɛ ba vɔk berugû gul.

²²E yóng a tó mɛ pyɛ lasha e gwat, e tɛ̀sɛ berugû linen de ba sé zwey.

²³Be tɔk rwas mɛ e ruhûp repomo, de e sangal e ji bemakuk vwel o.

²⁴E lɔkɔs berugû linen ko a rɛsɛl vɛ, e tomsal na begyindi wɔ na bejik.

²⁵E tɛ̀ gap na nerey sede berugu mɛ, e ba shɛgɛsh e jeng de ye kyè vey.

²⁶E ha neha netsitsɛng, ko e basa tsak tɛ̂ yey.

²⁷E tē naka na begwông belɔ mɛ, ko e re pyɛ́ naka, a sé rɛs wɛt.

²⁸Nèy mɛ ne sogo ko ne yang ɛ, à wò wɛng, rwas mɛ e somo hɛ arɔng, e tē:

²⁹“Beha pyak ba ga ra naka sizɔng, ko hwà dal ɛn mwa.”

³⁰Hwɔtɔ̂ nehywɛ he kwɛlɛng, ko nezɛrɛ na sé yapyi, ko sómo hé jama hwā de e sap Dagwi Darwey.

³¹Be nɔng ɛ nèy cɔ́gɔt ré, nè fwôm vɔ mɛ, tik be somo hɛ e ruhup repomo yaga fwom de a ra!