Read berom Cīnat Neha 4 Bible Online

Cīnat Neha 4 - berom bible

Cīnat Neha 4

¹Wok in à nèy hom, basâ me da min, ko yin tɛ̀ nehywɛ na yin vɔk tɔk,

²ma ga nɔng in basa de ha sé naka, yin kwon ye bam à hɛ wɛt.

³Jeng de ma sè hwêy-wen sɛl na da hom, mɛrɛk à me, yêy neng hom,

⁴da hom á basa a me, á yang me: Vɔk neha nemo gak e yey mo, gyeng badu hom na hwo sangal tyang.

⁵Hwo ye bam na hwo ye rɛng yi e neha hom wɛt, sɛ̀ netsitsɛng, sɛ̀ tɔ̂k pyɛ́.

⁶Hwo ye bam à netsitsɛng wɛt, nê bɛrɛng hwo, tɛ̀ yey na nɛ, ko nê gyenges hwo.

⁷Susû netsitsɛng à hemo, sɛ̀ netsitsɛng, ko e ra kayɛ pyɛ de hwà sɛ̀, sɛ̀ tɔk.

⁸Tɛ̀ dyām zik, ko nê gwɛ a hwo nerey, nê tɛ̀ a hwo gbɔng nerey.

⁹Nê tɔrɔ hwo e rato na gyisâk cúyu rwat, na zɛrɛ kpin.

¹⁰À hwey hom, wet betong ko hwo sey neha hom, na neshey neken mo ne bin gwɛ̌ hɛn.

¹¹Ma ga basa a hwo gwong netsitsɛng, ma ga kyè na hwo e begwong berat.

¹²Jeng de hwó kyè, vit a pyɛ de yê gana hwo e gwong, ko sede hwó tele, hwô tiri bwol wɛt.

¹³Kaba gak pyɛ de hwà masa, hwo tik yɛ ye kwey wɛt, gyeng yɛ, e yɛ̀ a neken mo.

¹⁴Hwo raa gwong bemat beves wɛt, ko hwo raa nekyɔ̌n mɛn wɛt.

¹⁵Kyɛ́ o nɛ̀, hwo kyè e nɛ̀ wɛt, doyo yi e pyɛ́ vyes, hwo tɛ̀ nehywɛ mo na yɛ̄ wɛt.

¹⁶Bemat beves be tɔk wɔ nevwa wɛt sɛ̌ yɛn a tanga ra pyɛ vyes, be ro a bayis mɛn nevwa sɛ̌ ba mǎ mwat hwak.

¹⁷Pyɛ̂ re de yɛn e re be sɛ̀ yɛ e gwong râ neves, nshî anap de be sɔ, be sɛ̀ nɛ na yol.

¹⁸Ko gwong bemat berat gwa sé sede zang-gwi gasi, gwo gwɛsɛ negbey sɛ̌ gwa ye wɛshɛrɛk.

¹⁹Gwong bemat beves gwa sé sede lwil típit, yɛn e tɔk e ra sɛ́ de be tiri ɛ bwol wɛt.

²⁰À hwey hom, tɛ̀ nehywɛ na neha hom, tē naka na pyɛ́ de ma ha.

²¹Hwo tik yɛ ye kwey a hwo wɛt, bare na yɛ e ji yey mo,

²²yaga ya sé neken na womo de a sɛ̀ yɛ̄, hwal yaga rebek mɛ mwa arɔng.

²³Gyeng barê yey mō he dal kayɛ pyɛ, yi e ji hɛ de lel nshî neken na sɛ́.

²⁴Tik neha de na sé gwɔrɔdɔk, ko hwo gas o na hâ nenu-neba yikyik.

²⁵Tik bayis mō be bɛrɛng cik, hwo kyě wèyong wɛt.

²⁶Tē naka na nekyɔ̌n mō, ano kayɛ pyɛ mō yê sè tyɛng.

²⁷Hwo kyě doysa vɔk e yege kɛ mwɛlɛng wɛt, gyeng tó mo yi e pyɛ́ vyes.