Read berom Cīnat Neha 5 Bible Online

Cīnat Neha 5 - berom bible

Cīnat Neha 5

¹À hwey hom tɛ̀ nehywɛ na netsitsɛng hom, wet betong na pyɛ de ma tɔk,

²ano hwô kyɛm hwo dyɛng nehywɛ e há, ko há mō hê vɔk tɔk.

³Hâ nû hwâ nejwang ha ta rɔɔtɔt sede nshî shok, há mɛ ha sé hyul-hyul ha dal něy mɔmɔ.

⁴Ko yɛnɛ mɛ he reneng sede cǒ, vootot sede wâl bahagat baba.

⁵Bol mɛ be kyè vɔk e sak, bɔrɔs mɛ hé raa gwong wɔ e kwɔ̂n bevuvwel.

⁶Hwâ nejwang e bare gwông neken wɛt, e vusa gwong sana tɔk.

⁷A nèy hom, wet in betong na me, yin ye bam à neha hom wɛt.

⁸Gyeng to mō yikyik yi na yɛ, hwo ka wɔ bagat na kwɔ̂n sangal mɛ wɛt,

⁹ko sɛ̌ hwô barak nerey mō, hwô tik na neshey mō ne wey, e vwɔ̂ mwat de vit a hɛ na nemwishish.

¹⁰Bekɛnɛt bê sey ɛ nedanerey mō, ko tâk reyɔ̂m fwom mō hê wɛrɛ e vɔ yére dyuk,

¹¹e yɛnɛ̂ neken mo, hwô rus, jeng de rebek mō na banamâ re ba ga sɔ ɛn,

¹²ko hwô ye, “E sɛ́ ya tɛ̀ ma kyɛ́ me tabak, ko yey hom ya byɛs gyong ɛ!

¹³Ma wok fwɔ̂ bemât basa hom wɛt, ma wet betong na bemât tɔk wɛt.

¹⁴Ma sé e nû wey zɔng, e nuyel tulâ regyɛng bemat.”

¹⁵Tyɛng de hwô sɔ nshî kwɛngɛ mō, ano de hwô man na hwā mo njumɛ zɔng.

¹⁶Hwô wey na nshi mō zɔng-reng, sede nshi de ne tele e begwong.

¹⁷Nshi mō na sé yaga hwo nju mō zɔng, hwo lashe ne na bemat beduk wɛt.

¹⁸Tik fwɔ̂-nshi mō gwo sɛ̀ nerat, ko hwo vɔk yey pyɛng na hwâ nebot mō,

¹⁹zɛrɛ mo sede lyop, pyɛ bɛrɛng sede vow, tik na tɛ̂ yey mɛ he sè pyɛ yey pyɛng na hwo, vɔk yey pyɛng na hwā mo sede be feng na siring.

²⁰À hwey hom, yaga sɛ́ de hwó wunsa hwo na devwes a? Hwô kura hɛ e gey mō, hwā duk ɛ?

²¹Begwông mwasi ba sé e bayis Dagwi Darwey, e bɛrɛng mwa tomong mɛ.

²²Banɛ̂n mwat vwes bê vo ɛ, bê vo ɛ e ji renɛn sede non e ji segun.

²³Ê ku yaga vît gyêng tó mɛ, ko gbɔng netɔn mɛ nê wey na yɛ.