Read berom Cīnat Neha 6 Bible Online

Cīnat Neha 6 - berom bible

Cīnat Neha 6

¹À hwey hom, sede hwà ga vo a mwat vwara mō nu, hwô tala badu mwat hwak, hwà ga nɔng fwɔ mō,

²hwà ga hwo e segun yi na há mo, nu mo ha ga vo o.

³Di pyɛ de hwô ra na hwo sey mɛ to mō, hwà ga gyira to mo e vwɔ̂ mwat o, ci ziri na hwo wɔ̀ ra won na yɛ a hala a hwo.

⁴Hwo wɔ̂ nevwa wɛt, kyè a remo sana pɔnglɔ.

⁵Sey to mō sede ros yi e gbam, sede non de gwa hywit ɛ e segun.

⁶Wɔ̀ di cōlong a riri, masa begwong yɛ na hwo vɔk netsitsɛng.

⁷Yā vɔk mwat nuyel kɛ gwɔ̀m de e kyè na yɛ wɛt,

⁸ye tula pyɛ̂ re yɛ nahywɛp, ye pɔng wɛt jeng de pyɛ́ ya sé pyak.

⁹À hwo riri hwô nàra e dyɛngɛ vɔk e nayu arɛt? Hwô sogo yi e nevwa mo wɛt a?

¹⁰Not ɛ nevwa, shigi ɛ̀ té gyepes, ko hwo wɔ ye yɛndɛng.

¹¹Ko nepɛng nê vey a hwo sede gbik, nevit sede mwât sey pyɛ na retek.

¹²Yapyi mwasi, mwat vwes, e kyě bere neha bɔs zɔng.

¹³E tē, mwǎt a bayis, be pɔnglɔ wɛt, e nása kwɛn vwɔ mɛ,

¹⁴yêy gwɔrɔdɔk de ye yong pyɛ́ vyes, e re nuyel na shɔ̂k jim.

¹⁵Yi ano, tumbang wô hwo e ra yɛ hak, e kejeng tyɔng bê kwɔrɔ hɛ vit a mwat sey ɛ.

¹⁶Pyɛ́ ya sé tyiimin de Dagwi Darwey e kyɛ́ ɛ, ya wul tyaama mwa de ya sé pyɛ̂ byɛm-byɛm na yɛ̀, yɛ̄ à,

¹⁷bayîs byɛs, nû nebɔs, vɔ mɔbɔs bemat de vit a hɛn na sɛlɛ,

¹⁸yêy yong begwong beves, bol tele dey-dey wɔ̀ ra pyɛ́ vyes,

¹⁹mwat nɔngɔs nuhâ yɛ́rɛs bɔs, tanga mwat de e vɛ̀sɛ na cɛ́k e ji begwa.

²⁰À hwey hom, gyeng redu da mō, ko hwo ye bam à pyɛ de neng mo a masa a hwo wɛt.

²¹Rɔgɔs yɛ e yey mo kayɛ jeng, tɛ̀ yɛ e ra fwɔ mō sede lwɛlɛ̂ fwɔ.

²²Jeng de hwà sé kyè, yê kyè na hwo, jeng de hwà sé e dyɛngɛ, yê bɛrɛng hwō, na jeng de hwà sene, yê ha na hwo.

²³Redu ra sé kywa-kya ko bása ha sé negbey, gyongos na tabak à gwong vɔk e neken.

²⁴Na gwo gyep o yi na hwā vwes, yi e mwɛɛsɛs nû hwā duk.

²⁵Hwo raa nerat bayis mɛ e yey mō wɛt, hwo tik a vo o na bayis mɛ wɛt.

²⁶Bé tɔk tala devwes na keshi tuk, ko be tala hwâ nejwang na neken.

²⁷Mwat e tɔk vɔk kya e ragey mɛ, ko hɛ rangas rugu mɛ wɛt a?

²⁸Kɛ mwat e tɔk bɔrɔs e ra kya, ko bol mɛ be raye hɛ wɛt a?

²⁹Ano mwat de e yeles e lɔ hwâ mwat hwak, mwa mwat de a wɔ́ bagat na wɛ, mwin bê tabak hɛ.

³⁰Bé byɛs gbik kayɛ jeng, ka a ka shigi yaga e wok vyong.

³¹Ka ba de vo ɛ, ê tala zang taama, ê nɔng pyɛ́ mwa de a vɔk.

³²A sé tyɛng ano na mwat de a ra nejwang, a vɔk bare wɛt, a sé wey na reto mɛ zɔng.

³³Ê sɔ baram na rekyen zɔng, ko ê tɔk gas ɛ na rekyen wɛt.

³⁴Rwas de e pugu hwā mɛ e wok shom sizɔng, ko e tala hɛ vit a nemwishish.

³⁵Rwas o e sey pyɛ tala cak wɛt, yey mɛ yê dyɛng wɛt ka hwà ka nɔng ɛ nenɔrɔ e rɛ̌ ayi.