Read berom Cīnat Neha 7 Bible Online

Cīnat Neha 7 - berom bible

Cīnat Neha 7

¹À hwey hom, sey neha hom, vɔk gak pyɛ de ma nɔng o nu,

²gyeng badu hom, na hwo sangal tyang, gyeng basa hom sede hwó gyeng yenêng yis mō.

³Rɔgɔs yɛ e ra bekɛn vɔ, jɛk yɛ e ji yey mō.

⁴Yâng netsitsɛng, hwà sé hwông de hom, tɔ́k-tsik a gbɔ̂ng sa hom.

⁵Yɛn ê dul o yi e hwâ nejwang, yi na hwā duk na nuha mwɛɛsɛs mɛ.

⁶Jeng cak ma sé bɛrɛng majey, yi e repɔk duk hom ma di pyɛ cak,

⁷ma di e ji vê dunus, ma kun e ji bebot bemat o wen de a vɔk bare wɛt,

⁸a sé kyè vɔk e gasang gwong, bagat na lɔ hwā mo,

⁹nahywegelek, nawiri, naturuk na e ji lwil mwangalang.

¹⁰Ko di hwā a man na yɛ. A tɛ̀ yom sede devwes ko a vɔk bare ves.

¹¹A vɔk rewɔng na negbarak, e ye jop e lɔ wɛt,

¹²remo hwô di ɛ e hyok, e bajang, ko e kahɛ gasang gwong e gyeng e waba.

¹³E kaba wen o ko a man ranang na yɛ, a kura bayis ko a yang ɛ,

¹⁴“Ma ga nára nɔrɔ̂ wuna nesa, ma ga sila vonu hom, yunung banama ba sɛ́,

¹⁵ano de ma nusu vey man na hwo, me jama hwo bayis e banga, ko ma ga sɛ̀ o.

¹⁶Ma ga yong gwat hom naka na berugu, vè linen yerê ve Misra de ba yong na bùm rat.

¹⁷Ma shushu ɛ něy nesang nerat, mir na alowe tanga sinamɔn.

¹⁸Vey e lɔ na me, ko wot ê dyɛng mwa turuk, na wot wok netâ mân bek, sɛ̌ a vey a wot.

¹⁹Dalɔ hom a sé e lɔ wɛt, a ga kyè vɔk e de kyɛn yikyik,

²⁰a vɔk ɛ rading dyām, e ba vɛ hɛ e silâ pwɛl.”

²¹Na mɛlɛm pyak, a tɔgɔs hɛ a jut nehywɛ mɛ, yi na mwɛɛsɛs nu mɛ, a pere hwɔtɔ hɛ.

²²Remo-remo a dop na hwā mo, sede rɔndɔng wɔ̀ e kwɔ̂n yɛrɛ, sede ngyama de ba ga vo yɛ e segun,

²³sɛ̌ ba tá na kwet pere wɔ kulu yey o, sede non de ke tele wɔ̀ gaba e segun, vit na tɔk wɔgɔ, e kyè wɔ wey na neken mɛ.

²⁴A remo a nèy hom, wet in betong na me, yin tɛ̀ nehywɛ min na há hom.

²⁵Hwo tik yey mō ye doyo hwo e raà tomong mɛ wɛt, hwo ye reng vɔk e begwong mɛ wɛt,

²⁶yaga a ga tɛ̀ bemat pyak be gaba, ey, mwa bemat de a ga mɔbɔs ba dal gap bara.

²⁷Lɔ mɛ ha sé gwong wɔ e sak, ha sé kwɛngɛl wɔ e kwɔ̂n bevuvwel.