Read berom Cīnat Neha 8 Bible Online

Cīnat Neha 8 - berom bible

Cīnat Neha 8

¹Netsitsɛng na sé yila wɛt a? Tɔ́k-tsik he gbɔ na fwɔ ngyat rê?

²E berak berahwol, e gasâng gwòng e tumal,

³e bahagat ri e nuyêl repomo, e tumal e rwi yel a sé yishi na gbɔng fwɔ.

⁴E tē, “Me yila hin à beras, ko tosho hom ha sé wɔ na bemasi.

⁵À yin vê dunus masa hin nehywɛ râ pyɛ́, à yin betɔn, tɛ̀ in nehywɛ.

⁶Wet betong, ma sé kyè wɔ̀ ha pyɛ́ ryey o, pyɛ́ de ya sé tyɛng yê nusu yi e nu hom,

⁷mê ha tsak o, pyɛ́ vyes ya sé pyɛ byɛm-byɛm na me.

⁸Mwa neha hom na sé tɛk, vit a pyɛ de ya sé gwɔrɔdɔk kɛ wek e yɛ̄.

⁹Mwa yɛ ya sé cik na womo de a vɔk tɔ́k-tsik, ko tyɛng na vemo de be sɛsɛm tɔk.

¹⁰Sey basa hom e ra dyam pyɛng, ko tɔ́k e ra kasâ celes dyam shinang,

¹¹yaga netsitsɛng na dal dyéngere ryat, ko mwa pyɛ de hwô wok cwey yɛ bê tyɛngrɛ na nɛ wɛt.

¹²Me, netsitsɛng, ma sangal tanga nehywɛ râ pyɛ́, ma sɛ̀ yi na nehywɛ ha.

¹³Sâp Dagwi Darwey hɛ a kyɛ́ ɛ pyɛ́ vyes. Me kyɛ́ me dâk kaa na paà kwas, me kyɛ́ me begwong beves na neha kwɛlɛng.

¹⁴Me tɔk vo redu, na gwông râ pyɛ́ naka, ma vɔk tɔ́k-tsik, ma vɔk gap.

¹⁵Yi na me begbɔng begwɔ̀m be re negwɔm, ko bemat nuyel be nɔng badu tyɛng.

¹⁶Yi na me begwɔ̀m be re negwɔm, bemakuk be gas badu e jey.

¹⁷Me tɛ̀ yey na vemo de be tɛ̀ yey na me, ko vemo de be jama me na té ngyɛ́k be sɛ̀ me.

¹⁸Nedanerey na gbɔng nerey na sé na me, yele na rê nuyel vit à yɛnɛ.

¹⁹Pyɔlɔ hom ya dal dyam shinang, ya dal celes dyam shinang pyɛ de be sɛ̀ na me ya dal dyam pyɛng ryat.

²⁰Me kyè e begwong necik, e begwong gas badu e tē,

²¹me nɔ̂ng vemo nedanerey de ba tɛ̀ yey na me, ko me sila begban mɛn.

²²Dagwi Darwey a yong me e pɛrɛ̂ fwom mɛ, wo pɛrɛ mo e ji tomong de a ra yimo raane.

²³Yimo raane Dagwi Darwey a yong me, gyam na a hwo yong jey.

²⁴Ba vey na me, jeng o vit a berep, vit a lel de be dɔng nshi.

²⁵Gyam na a tɛ̀ beraku a yong me, bē rɔngɔl nà tɛ̀ berahwol, ba ga vey na me,

²⁶gyam a sè rɔngɔl nà yong jey na hey, kɛ fongol gwo mɛsɛng o e jey.

²⁷Jeng de a tɛ̀ lagwi ma sè e hwomo, na jeng de a wɔrɔ yɛnɛ̂ gworep,

²⁸jeng de a tɛ̀ bale e lagwi, na jeng de a tɛ̀ lel nshi e gworep,

²⁹na jeng de a tɛ̀ a nshî berep yɛnɛ̂ nɛ̀, ano nshi nê gyili vonu mɛ wɛt, jeng de a bomo retîs jey,

³⁰me netsitsɛng ma sé e hagat mɛ sede mwât fwom mɛ, ko kahɛ tuk ma sé yey mɛ, kayɛ jeng ma vɔk yey pyɛng na fwom mɛ,

³¹ma ra yey pyɛng na bemât sangal e jey mwa, yey pɛngɛ na bemasi.

³²A yin nèy hom wet in betong na me, vê wɛng a vemo de be gyeng begwong hom,

³³wok in gyong hom na yin vɔk netsitsɛng, ko yin kyɛ́ in hɛ wɛt.

³⁴Wo wɛng a womo de e wet betong na me, kahɛ tuk e bɛrɛng nekanang e lɔ hom, e gyeng e hagat ri mo.

³⁵Yɛ womo de a sɛ̀ me a ga sɛ̀ neken, ko e sɛ̀ nemi nepɛng na Dagwi Darwey,

³⁶ko womo de a bidɛ mɛ, a ga mǎ hɛ, mwa vemo de be kyɛ́ ɛn me be tɛ̀ yey na reku.”