Read berom Mwat Ngyɛgɛt Pyɛ́ 1 Bible Online

Mwat Ngyɛgɛt Pyɛ́ 1 - berom bible

Mwat Ngyɛgɛt Pyɛ́ 1

¹Neha Mwat Ngyɛgɛt pyɛ́, hwêy Davit gbɔng gwɔ̀m Yɛrusalɛm.

²A sé yapyi, a sé yapyi zɔng, mwât ngyɛgɛt pyɛ́ a ye, yapyi zɔng mwa pyɛ́ ya sé yapyi.

³Pyɔlɔ̂ sɛ́ de mwasi ê sɛ̀ e ji mwa fwom de e ra e jey ɛ?

⁴Zamang he vey, zamang he kwey ko jey yê nàra gbak-gbak.

⁵Gwi gwo nusu ko gwo gaba, gwo tele vɔk e kwɔ̂n nusu gwɛ.

⁶Gul gwo pɛsɛl wɔ̀ e batin, gwo gwɔsɔ wɔ̄ e bato, gwo kyě gwɔsɔ ano, sɛ̌ gwa to toyo e kwɔn de gwa yi ɛ.

⁷Mwa nerɔt ne tele nshi wɔ e gworep, ko gworep o gwo ka sila wɛt, nshi mo ne to toyo e kwɔn de na pɛrɛ nerɔt, ne to tele wɔ e gworep.

⁸Kayɛ pyɛ ye ruru, mwat e tɔk ha ɛ wɛt, bɛ́rɛng he vey a bayis kɛ wokos he vey a fwong wɛt.

⁹Kayɛ pyɛ de ya kana sé, yê re nuyel na sè, pyɛ de bá ra jeng de ya kwey, e yɛ de bê ra e nuyel, vit a pyɛ pyas e jey.

¹⁰Gyeng bemat bê ye, “Di, pyɛ́ pyas à yemo a?” Wey, pyɛ́ mo ya ga ros, yà sé yimo gyam be tɔs ot.

¹¹Vit à bare na pyɛ́ de ya ga kwey, a remo vit a bare na nezamang de nà ga kwey, ko jeng ye kyè vey bê to bare na wot wɛt!

¹²Me, mwat ngyɛgɛt pyɛ́, ma sè gbɔng gwɔ̀m BeIsrayɛl e Yɛrusalɛm.

¹³Ma tɛ̀ e yey hom na me jama, me ngyɛgɛt yi na tɔk na netsitsɛng, mwa pyɛ́ de be ra e jey. A sé pyɛ̂ gbang de Dagwi a tɛ̀ wot e kushu hot e de ra mo.

¹⁴Ma ga di kayɛ pyɛ de be ra e jey, ko mwin, a sé yapyi na rô gul zɔng.

¹⁵Pyɛ gwɔrɔdɔk be tɔk tɛ̀ ye cik wɛt, be tɔk bara vit wɛt.

¹⁶Ma yang to hom, “Ma ga sɛ̀ netsitsɛng pyak, na dal nɛ kawɛ de a ga re negwɔm Yɛrusalɛm gyam me, ma ga wɔ yikyik e ji sɛ̂ tɔk tanga netsitsɛng.”

¹⁷Ma tɛ̀ e yey hom na me gas e tê netsitsɛng na netɔn, na me gas e tê tɔk na selolong, ko ma to di, a sé rô gul zɔng arɔng.

¹⁸Gwɛ̂ netsitsɛng, gwɛ̂ bɔrɔk yey, gwɛ̂ tɔk, gwɛ̂ reyɔm.