Read berom Mwat Ngyɛgɛt Pyɛ́ 11 Bible Online

Mwat Ngyɛgɛt Pyɛ́ 11 - berom bible

Mwat Ngyɛgɛt Pyɛ́ 11

¹Ba ye, ka hwà werek yére e ra vwel nshi, hwô to sɛ̀ yɛ e bama nepɔlɔ pyak.

²Gas nenu mo na bemat betaama kɛ vɔk e rwit, yaga hwô tɔk jeng de reyɔm rê hwo e jey wɛt.

³Ka sede bale ba sila larwak, be rop rwak e jey, sede cɔgɔt ya gaba e rwa bato kɛ e rwa batin, bak de ya gaba e yé dyɛng e hwomo.

⁴Yɛ de e bɛrɛng gul e tus pyɛ wɛt, ko yɛ de e bɛrɛng bale, ê yɛt bwal wɛt.

⁵Sede remo de hwà tɔk gwong de gabik hwey na bekup hɛ be ras e jim neng hɛ wɛt, ano hwà tɔk fwôm Dagwi de e yong kayɛ pyɛ wɛt.

⁶Nagasi hwo tus yere mō ko hwo pɔnglɔ nahywegelek wɛt, yaga hwà tɔk wɛt kɛ e yɛ̌ mo yê ras, kɛ yemo kɛ yere, kɛ mwa yɛ yê sè ryat.

⁷Negbey na ta, a sé pyɛ yey pyɛng, na bayis be bɛrɛng negbêy gwi.

⁸Ka de mwat e ka ra neshey pyak, tik na a wok netâ nɛ mwa, ko tik a bare, nepɔlɔ̂ lwil nê ba sè pyak. Kayɛ pyɛ de yé té ya sé yapyi zɔng.

⁹Vɔk yey pyɛng à bwot mwat e ji newen mō, tik hwo vɔk yey pyɛng e nepɔlɔ̂ nebot mo, ra pyɛ de yey mo ye simo, na pyɛ de bayis mo be di nerat yɛ. Ko hwo tɔk wɔgɔ, e ji mwa pyɛ́, Dagwi e vey na hwo e kwɔ̂n shɔt e ra mwa pyɛ́ mo.

¹⁰Yaga ano, gas in na bɔrɔk yey, de yé vey a hwo na royo e rebek, yaga newen na se yapyi zɔng.