Read berom Mwat Ngyɛgɛt Pyɛ́ 12 Bible Online

Mwat Ngyɛgɛt Pyɛ́ 12 - berom bible

Mwat Ngyɛgɛt Pyɛ́ 12

¹Bare na womo de a yong o e nepɔlɔ newen mō. Nepɔlɔ neves né vey, neshey ne vey, hwo kwon ye, “Me wok netâ nɛ̀ wɛt.”

²Gwi, na negbey, na pwɛl tanga netangacɛn be tɛ́ ɛn mwangalang, ko bale be to man e bama rwak.

³Bemat bɛ́rɛng lɔ bé vow rebek, ko bemat gap be ye gup, be tɛ́ ɛn gbɛrɛk. Behâ hwongo be hala fwom yaga ba tɛt nepyak mɛn, vemo de be tē bíi e bapɔk ba sé tɛ́ ɛn bebók.

⁴Bê bang ri duk mwa, bê to wok fwɔ̂ hwongo yɛt wɛt. Lwɛlɛ̂ non zɔng gwo sene hwo, mwa fwɔ̂ behâ râ lɛlɛ gwô ye lɔ̀ɔ.

⁵Be tele hɛn kwɔn de ha sé turus lis, gwong o arɔng gwo nɔngɔs bengyip. Hwô tɔk jeng neken mō yi e tîn rɔgɔ de he turuk. Yɔrɔ de ya kana gyilsit yê ngungu zɔng. Hwô vɔk cwey pyɛ cak wɛt, yaga mwat a sé e gwong wɔ e sak, kwɔn sangal mɛ hê nesheneshey, ko bemat sesin be kyě kyè e nehyok.

⁶Rwik dyam pyɛng gwo tut ɛ, shǐ dyam shinang he mɔrɔ hɛ, tsung wo mɔrɔ hɛ e jɔt nshi, ko rwik vos nshi gwo tut ɛ e nû hwes.

⁷Fongol gwo to toyo vɔk e fongol, sede raane, ko gabik he toyo vɔk na Dagwi de a nɔng hɛ.

⁸A sé yapyi, a sé yapyi zɔng, mwat ngyɛgɛt pyɛ a ye, mwa pyɛ́ ya sé yapyi.

⁹E ra netsitsɛng mɛ, Mwat Ngyɛgɛt Pyɛ́ a to basa a bemat tɔk, na masâ pyɛ́, na ngyɛgɛ̂t pyɛ́, na ngyɛrɛ̂ cīnat neha e ji nehywɛ.

¹⁰A jama batin ha vê neta, ko a jɛk tsak neha.

¹¹Neha bemât netsitsɛng na sé sede begbayìn bemât suga e ra bedwa, be kara mɛ vɛ na be gwɛ̌ tele. Nà sé sede begbayìn Gbɔng Suga pyɛ mɛ.

¹²À hwey hom, tē naka, hwo wɔ́ yikyik e pyɛ́ yemo wɛt. Jɛkɛ̂s bebok-basa pyak ha vɔk yɛnɛ wɛt, ko kât ngyɛgɛt pyɛ́, he tɛ̀ rebek re ruru.

¹³Há hê yɛnɛ mo à hemo, bwang o mwa ba ga wo. Hwo sap Dagwi, hwo gyeng badu mɛ, yaga hemo hɛ à fwom zɔng de gwa sé gbing-gbing na mwasi.

¹⁴Dagwi ê vey na kavɛ tomong e nuyel shɔt, kayɛ pyɛ de ya sé e lɛrɛ, ryat o, kɛ vyes o.