Read berom Mwat Ngyɛgɛt Pyɛ́ 2 Bible Online

Mwat Ngyɛgɛt Pyɛ́ 2 - berom bible

Mwat Ngyɛgɛt Pyɛ́ 2

¹Ma ye, “Mê wok a to hom neta, na me tɔk e sɛ́ de ye nɔng yey pyɛng arɛt?”

²Ma yâng shɛgɛsh a lolong, ko wok neta né gwɛ pyɛ ryat wɛt.

³Ma tɛ̀ to hom e sɔ̂ nshi anap, ma wɔ̀ wul kwɔn hak; ma ra ano na me tɔk netsitsɛng tanga netɔn. Me bare e yey hom gwong rwat a gwomo de bemat be sangal e jey kepɔlɔ neken mɛn.

⁴Ma ra gbɔng tomong, ma lɔk a to hom nelɔ, ko ma tus batîn anap,

⁵ma how bɛ̌, ma yong nekwɔn sɔ gul ko ma tus ɛ mwa yerê nèy cɔ́gɔt.

⁶Ma yong bekadung yaga tɛsɛ nshi e batin cɔ́gɔt o.

⁷Ma sey besam beras na beha, ma vɔk nèy besam de ba tɔs e lɔ hom, ma to vɔk yas pyak de ya dal ye kawɛ mwat de a ga sangal e Yɛrusalɛm gyam me.

⁸Ma tula a to hom dyam pyɛng na dyam shinang yi e bak bavwêl negwɔm hom, ma vɔk bemat ra a me lwɛlɛ beras na beha, ma vɔk bejɛn-beha de rwas ê mara ɛ yis.

⁹Ano ma tɛ̀ nerey, ma dal vemo de ba kana sè e Yɛrusalɛm, netsitsɛng hom na gas ɛn na me wɛt.

¹⁰Ko kayɛ pyɛ de yey hom ya simo ma nɔng yɛ, ma ro a neken hom na wok neta wɛt, yey hom ya pɛngɛ na mwa fwom de ma ra, pyɔlɔ hom à yane.

¹¹Ma bare na mwa pyɛ́ de ma ga ra na mwa fwom de ma sɔ reyɔ̂m ra mo, ko mwin, a sé yapyi, na rô gul zɔng, vit a gwɛɛ e jey mwa.

¹²Ma sangal na me bare e ra netsitsɛng, na lolong tanga netɔn, ko ma di, mwat de ê tut e negwɔm ê raa pyɛ de begbɔng begwɔ̀m de ba tanga ra gyam yɛ.

¹³E bama mo mwa, ma tɔk netsitsɛng na dal netɔn, sede remo de negbey na dal lwil.

¹⁴Mwat netsitsɛng a tɔk pyɛ de e ra, ko tɔn a sé buu a hɛ, ko pyɛ jining yê sɛ ɛn mwa.

¹⁵Ma yâng to hom, pyɛ de yé sɛ̀ tɔn, e yɛ yé sɛ̀ me arɔng ko sɛ́ à pyɛ ryat de ma vɔk yaga netsitsɛng hom o arɛt? Ma ye, hemo arɔng ha sé yapyi.

¹⁶Be ye bam a mwât netsitsɛng na tɔn vɔk e jeng cak, ko mwa yɛn beba ba rɔda ba ye bam na yɛn e nepɔlɔ de ne kyè vey. Sede remo de mwât netsitsɛng e ku, a sé tyɛng ano na tɔn.

¹⁷Yaga ano, neken na sé pyɛ na me wɛt, mwa fwom de be ra e jey gwa vey a me na pyɛ cak wɛt, yaga a sé yapyi na rô gul zɔng.

¹⁸Ma di kayɛ pyɛ de ma sɔ reyɔm e ra yɛ e jey, vit a pyɔlɔ de mê sɛ̀, mê tik a mwat de ê re nedanelɔ hom,

¹⁹ko ma tɔk wɛt kɛ mwat de ê re nedanelɔ hom ê sè wo netsitsɛng kɛ tɔn ayi. Ê vɔk negwɔm e ra pyɛ́ mwa, de ma ra fwom na netsitsɛng hom e jey. Hemo arɔng ha sé yapyi.

²⁰Ano ma pat yey e ra fwom mwa de ma ga ra e jey.

²¹Behak a bemat ba sé de be ra fwom na netsitsɛng na tɔk tanga sekwɛl, ko be tik a mwat hwak netâ pyɛ́ de a ra fwom o wɛt, hemo arɔng ha sé yapyi, gbɔng pyɛ vyes.

²²E sé de mwat ê sɛ̀ na mwa fwom de a pɛngɛ ra mo e jey ɛ?

²³Nepɔlɔ mɛ mwa na sila na sɔ̂ zot na bɔrɔk yey e ra fwom, naturuk a sɛ̀ yêy dyɛngɛ wɛt. Hemo arɔng ha sé yapyi.

²⁴Vit a pyɛ de ya dal a mwat na nerat, a re pyɛ́, a sɔ pyɛ̂ sɔ na a wok a neken mɛ netâ long mɛ, yé a pyɛ de Dagwi a simo a wot,

²⁵yaga sana yɛ, wa e re pyɛ́ na a sɛ̀ netâ sangal fwom mɛ ɛ?

²⁶Na mwat de a pɛngɛ a Dagwi yey, e gwɛsɛ a yɛ netsitsɛng na tɔk tanga yey pyɛng, ko tɔn e pɛngɛ hɛ e de râ fwom tula yas na a nɔng mwat de a pɛngɛ a Dagwi yey. Hemo arɔng ha sé yapyi na rô gul zɔng.