Read berom Mwat Ngyɛgɛt Pyɛ́ 3 Bible Online

Mwat Ngyɛgɛt Pyɛ́ 3 - berom bible

Mwat Ngyɛgɛt Pyɛ́ 3

¹Kayɛ pyɛ ya vɔk jeng, jeng ya sé yaga kagwɛ fwom e jey.

²Jeng tɔ, na ye reku, jeng tus, na ye luyu pyɛ de ba tus.

³Jeng mɔbɔs, na ye tɛsɛ tyang, jeng gangas, na ye lɔkɔs.

⁴Jeng tosho, na ye shɛgɛsh, jeng sesin, na ye nzem.

⁵Jeng shara beta, na ye tula vɛ, jeng kula gey, na ye viri vɔ.

⁶Jeng sɛ̀, na ye bidɛ, jeng tikis pyɛ́, na ye wesek yɛ̄.

⁷Jeng hama, na ye yong, jeng sǎ yuu, na ye ha.

⁸Jeng tɛ̂ yey na ye bɛɛ ves, jeng como, na ye sangal tyang.

⁹Pyɔlɔ̂ sɛ́ de mwasi ê sɛ̀ e ji mwa fwom de a pɛngɛ hɛ e de ra e jey ɛ?

¹⁰Ma ga bɛrɛng yere fwom de Dagwi a nɔng mwasi, na a kuyɛ e ra mo.

¹¹Ko pyɛ de Dagwi e ra, e ra tyɛng e jeng o, yɛ wɛ a tɛ̀ bare bes e yey mwat, ko mwa ano, wot e tɔk mwa tomong Dagwi yi e susu mo vɔk e yɛnɛ mo wɛt.

¹²Ma sey tsak o, vit a pyɛ de ya dal de mwat e ra, sɛ̌ a vɔk yey pyɛng na a wok a to mɛ neta mwa nepɔlɔ neken mɛ,

¹³ano kayɛ jeng de a sé re na sɔ, na a wok netâ fwom vɔ mɛ, mwa ya sé nɔrɔ̂ Dagwi.

¹⁴Ma tɔk kayɛ pyɛ de Dagwi e ra, yê nàra gbak-gbak, vit a pyɛ de bê gwɛ kɛ be tɛt e ji mo, Dagwi a yong ɛ̀ ano yaga na bemat be sap ɛ.

¹⁵Pyɛ de ya sé a remo, ya kana sè a raane, pyɛ de ye kyè vey, ya kana sè arɔng. Dagwi e jama pyɛ de ba ga ye bam.

¹⁶Ma to bɛrɛng e jey, e kwɔn gas badu e tē, sɛ̌ neves, e kwɔn necik, sɛ̌ neves.

¹⁷Ma ye e yey hom, Dagwi a rɔda ra a vê cik tanga beves shɔt, a ga tɛ̀ jeng kayɛ pyɛ na kavɛ tomong.

¹⁸Ma ye e yey hom, e ra bemasi wɔgɔ, Dagwi a sé masa hɛn na a dura a yɛn, yɛn a sé ngyāma.

¹⁹Pyɛ de ye sɛ̀ bemasi e yɛ ye sɛ̀ ngyāma, sede remo de mwasi e ku, ano na ngyama arɔng. Mwa yɛn ba vɔk nesong nining o, mwat a vɔk pyɛ de a dal mɛ ngyama wɛt, mwa a sé yapyi.

²⁰Mwa hɛn be wɔ e dem hining o. Mwa hɛn ba sé yi e fongol, mwa hɛn be to toyo vɔk e fongol.

²¹Vit a mwat de a tɔk kɛ gabik mwat he vɔk e lagwi, kɛ he ngyama he vɔk e vwel.

²²Ano, ma tumal ma di, vit a pyɛ de ya dal a mwat, a vɔk yey pyɛng na fwom vwɔ mɛ, gwɛ a nu mo mɛ de Dagwi a nɔng ɛ a ra. Wà e tɔk dura a yɛ pyɛ de yê té e bama mɛ ɛ?