Read berom Mwat Ngyɛgɛt Pyɛ́ 4 Bible Online

Mwat Ngyɛgɛt Pyɛ́ 4 - berom bible

Mwat Ngyɛgɛt Pyɛ́ 4

¹Ma to bɛrɛng, ma di de bemat be zǒt behak e jey. Ma di nemwishil vemo de be tak a yɛn, ko vit a yɛn na mwat de ê wɔrɔk hɛn. Reto ra sé na vemo de be tak a yɛn o, ko vit a yɛn na mwât wɔrɔk hɛn!

²Ma bare na vemo de ba ga kushu ko ma ye, ba ga di wɛng ba dal vemo de ba rɔngɔl beken,

³ko mwat de a dal ɛn mwa, e yɛ a womo de ba ga ka tɔ ɛ wɛt, bayis mɛ ba ga di neves banɛn de be ra e jey wɛt.

⁴Ma di, mwa mwat fwom na mwa sekwɛl râ fwom mɛ a sé yaga e simo a dal mwat vwara mɛ na sɛ́. Hemo arɔng ha sé yapyi, rô gul zɔng.

⁵Tɔ́n e sangal vit a ra fwom, ko e re vɔ.

⁶Nduga hwo vɔk pyɛ́ tyɔng ko hwo sangal tyang, de hwo vɔk pyɛ́ pyak ko hwo ku o e de fwom, e de rô gul zɔng.

⁷Ma to di pyɛ yapyi e jey,

⁸mwat de a sé nju mɛ zɔng, vit a hwey kɛ gwà, e ra fwom mwa jeng, ko e ka sang sirik na dyām wɛt. A ga sangal na a bare wɛt, “Yaga wa de ma sé ra fwom pwep gwomo ɛ? Yaga wà de ma se ró a rato hom wok neta ɛ?” Hemo arɔng ha sé yapyi, na bɔrɔk yey zɔng.

⁹Be yɛnɛ fwom bemat beba wɛt, yaga bê sɛ̀ pyɔlɔ̂ fwom mɛn pyak.

¹⁰Ka sede hwak a radɛ, hwak e ye cik a mumwɛ, ko womo de a sé nju mɛ, jeng de a radɛ, ko e ye waa zɔng, yaga vit a mwat de ê ye cik à hɛ.

¹¹Sede bemat beba ba dyɛng e gwat gwining, e sè a yɛn mɔɔ, ko e rɛ̌ de mwat nju mɛ e wok nemɔɔ ɛ?

¹²Mwat gwining e kyɛm a di wɛng e ra mwât repugu mɛ, ko sede bemât repugu beba ba wuna hɛn e ra yɛ bê di wɛng, rwik de gwa vɔk nehǎl netat gwo tɔk tut ɛ kpɛgɛrɛk wɛt.

¹³A sé naka be sɛ̀ bwot mwat pwɛng de a vɔk netsitsɛng a re negwɔm, a dal mwakuk de a sé tɔn, womo de e to sey vô redu wɛt.

¹⁴Bwot mwat ê tɔk nusu yi e lɔ̂ ngyang, ko a pere re negwɔm mwa ano de a sé pwɛng e vwêl segwɔm.

¹⁵Ma bɛrɛng bemat mwa be kyě wɔ́rɔng e jey, ko ma di hwak à bwot mwat e tumal e tē mɛn de ê tut e negwɔm, e bamâ bwot mwat wo mɛsɛng o.

¹⁶A vɔk bemat vit a yɛnɛ, vemo de ba sè e nuyel mɛ, mwa ano vemo de bê vey e bama, bê vɔk yey pyɛng na pyɛ de a ra wɛt. Hemo arɔng ha sé yapyi na rô gul zɔng.