Read berom Mwat Ngyɛgɛt Pyɛ́ 5 Bible Online

Mwat Ngyɛgɛt Pyɛ́ 5 - berom bible

Mwat Ngyɛgɛt Pyɛ́ 5

¹Bare hywɛ pyɛ de hwà sé ra jeng de hwó yel e lɔ Dagwi. A dal naka na hwo vey bagat, na hwo wok, hwo gyeng, de hwô nára nɔrɔ sede tɔn. Tɔ́n a ka tɔk yɛ̀ a sé ra pyɛ vyes wɛt.

²Hwo tele nu wɛt, bare naka e yey mō na hwo de vo a Dagwi nu. Dagwi a sé e lagwi, ko hwo e vwel, yaga ano, tik ha mo he sè bagat zɔng.

³Hwà vɔk bɔrɔk pyak, hwó ranas negwi-ywey pyak. Hwà kat ha, hé tɛ̀ hwo ha neha netɔn.

⁴Kayɛ jeng de hwà vo a Dagwi nu, ra dey-dey e ra pyɛ de hwà vo nu. Dagwi a vɔk yey pyɛng na netɔn wɛt.

⁵A dal hwo vo nu wɛt, de hwo vo nu vit à sila.

⁶Hwo simo na nu mo hɛ tɛ̀ hwo ra renɛn wɛt, hwo ha e nuyel piris wɔgɔ, “Ma ga dun de ma vo nu.” Hwo tɛ̀ Dagwi a tɛ̀ shom na hwo yaga hwà gyeng vonu mo wɛt, ê tɔk wey na kayɛ pyɛ de hwó ra.

⁷Negwi ná gwɔrɔ-há pyak, be vey na neha pyak, ko hwo, hwo sap Dagwi.

⁸Ka sede hwà di ba sé tak a bepɛng, bé gas a yɛn badu e tē wɛt, ba sey ɛ pyɛ de ya sé myɛn na retek, hwo langat hwo e ra pyɛ mo wɛt, wò nuyel a vɔk hwak e ra rak mɛ, ko yɛ arɔng a vɔk hwak e ra rak mɛ.

⁹Pyɔlɔ̂ cap ya sé pyɛ bemat mwa, ko mwa ano, câp mwa de ba how ya vɔk dâ yɛ.

¹⁰Sede hwó tɛ̀ yey e ra dyām, yê sang vey a hwo wɛt, kɛ hwó tɛ̀ yey e ra nedanerey, hwô sang sɛ̀ nerey de nê vey wɛt. Hemo ha sé yapyi arɔng.

¹¹Jeng de hwà gwɛ nerey pyɛ́, vê re mo bê gwɛ hɛn arɔng, ko da mo, mɛ́ à bayis zɔng.

¹²Nevwa mwat fwom na tá, kɛ a sirik pyɛ̂ re, a sirik wɛt, ko ka darwey a sirik, ê pɔl bare vit a nevwa e yis mɛ.

¹³Gbɔng neves à nemo de ma ga de di e jey, darwey e gyeng dyām mɛ de ye vuru hɛ wɛt,

¹⁴ko dyām mɛ mo ya wey e gwong vwes, sede a vɔk hwey, hwey o hê sè vɔ sǎn arɔng.

¹⁵Sede remo de hwey he nusu warap yi e jîm neng mɛ, ano de ê to toyo. Be tɔ hwey vit a pyɛ cak de he vey mɛ e jey, ano he to gas ɛ na jey e jeng reku.

¹⁶Hemo ha sé pyɛ vyes arɔng. E sé ye a pyɔlɔ mwat fwom ɛ? A sé rô gul zɔng. Sede remo de a vey, ano e to toyo.

¹⁷Mwa nepɔlɔ mɛ reku na sesin, na shom, na serɔ tanga bɔrɔ̂k yey ba gwɔrɔ hɛ.

¹⁸Mwin pyɛ de ma ga bɛrɛng de ya dal naka de mwat e tɔk ra, e yɛ̀ a re, a sɔ na a wok netâ mwa fwom de Dagwi a nɔng ɛ e jey nepɔlɔ̂ neken mɛ, yaga gwông sangal mwasi a gwane.

¹⁹Sede Dagwi a nɔ̂ng mwat dyām na yas, ko a nɔng ɛ reto na a wok neta yɛ na a sey nu mo mɛ, na a vɔk yey pyɛng e fwom mɛ, hemo ha sé nɔrɔ yi na Dagwi.

²⁰Mwin, Dagwi e nɔ̂ng mwat yey pyɛng sizɔng, ano e vɔk jeng na a bare e ra nepɔlɔ neken mɛ wɛt.