Read berom Mwat Ngyɛgɛt Pyɛ́ 8 Bible Online

Mwat Ngyɛgɛt Pyɛ́ 8 - berom bible

Mwat Ngyɛgɛt Pyɛ́ 8

¹Wa a tɔk pyɛ́ sede mwat netsitsɛng ɛ? Ko wa a tɔk nɔng cap-hâ pyɛ ɛ? Mwat de a vɔk netsitsɛng, bwang bayis mɛ gwo nɛp, ko ne tɛ̀ ɛ a vɔk yey pyɛng.

²Gyeng redu gbɔng gwɔ̀m yaga Dagwi a ga vo a yɛ nu.

³Jeng de bɔrɔk ha yel, kyè yi e nuyel mɛ, hwo lashe jeng wɛt, yaga gbɔng gwɔ̀m a vɔk reto na a ra pyɛ de e simo.

⁴Hâ gbɔng gwɔ̀m ha vɔk reto, ko wa e kyɛm a yang ɛ, “E sé de hwà sé ɛ?”

⁵Yɛ womo de e gyeng redu, vit a pyɛ de ye mǎ hɛ, ko báre mwat netsitsɛng hê tɔk tyɛng jeng, na gwông ra pyɛ.

⁶Kayɛ pyɛ ya vɔk jeng yɛ na gwong o, mwa ano de reyɔm mwasi ra sé dirik e ra yɛ̄.

⁷A tɔk pyɛ de yê té wɛt, yaga wa e tɔk ha a yɛ gwong de ye ba té ɛ?

⁸Vit a mwat de a vɔk reto e ra pɔngɔ mɛ kɛ e ra tuk reku mɛ. E ji como be tɛ̀ mwat e gwong wɛt, ko vit a mwat de e sey to mɛ yi e neves de a ga ragas.

⁹Mwa pyɛ́ yemo ma bɛrɛng, ma tɛ̀ nehywɛ hom e mwa pyɛ jey, mwat e tɛ́ ɛ wo nuyel e ra hwak, ko e yɛnɛ mo e sɛ̀ reneng yey zɔng.

¹⁰Ko ma to di be lɛsɛ bemat beves, ko ba somo hɛn e gbɔng repomô jɛrɛ, kwɔn de ba kana ra neves mɛn. Hemo arɔng ha sé yapyi.

¹¹Be yɛrɛ shɔt e ra pyɛ vyes ziri wɛt, ko yaga ano, tɛ̂ yey mwasi he vɔk gap e ra pyɛ vyes.

¹²Mwat banɛn e ra banɛn zang naga, ko a ros e jey, ko mwa ano ma tɔk mwin vemo de be sap Dagwi bê sangal tyang,

¹³ko e sè tyang na bemat beves wɛt, be gwɛ̌ a yɛ pɔlɔ lis wɛt, ba sé sede necam, yaga ba sap Dagwi wɛt.

¹⁴Yapyi a yemo de ye té e jey, behak a vê necik ko be ra na yɛn sede beves, ko beves ba sé de be ra na yɛn sede vê necik, hemo arɔng ha sé yapyi.

¹⁵Ma vo redu, bemat be wok neta yaga vit a nerat e ji jey sɛ̌ rê pyɛ́, na sɔ̂ pyɛ́ tanga wok neta, yaga a sé mwa pyɔlɔ̂ fwom mɛ, mwa nepɔlɔ de Dagwi a nɔng ɛ e ji jey.

¹⁶Jeng de ma tɛ̀ nehywɛ hom mwa na me tɔk netsitsɛng, na me di fwom de be ra e jey, nagwi na naturuk ma tɔk wɔ nevwa wɛt,

¹⁷ano ma bɛrɛng mwa fwom Dagwi, ko vit a mwat de a tɔk pyɛ de Dagwi a ga ra e jey, nepyak pyɛ de hwó ra na hwo ngyɛgɛt pyɛ́ mo hwó kyɛm hwo tɔk wɛt. Ka mwât netsitsɛng e jut wɔgɔ, a tɔk, ê kyɛm a tɔk yɛ wɛt.