Read berom Mwat Ngyɛgɛt Pyɛ́ 9 Bible Online

Mwat Ngyɛgɛt Pyɛ́ 9 - berom bible

Mwat Ngyɛgɛt Pyɛ́ 9

¹Mwa pyɛ yemo ma tɛ̀ yɛ e barê yey, ma masa yɛ mwa, bemat de ba sé cik na vê netsitsɛng tanga tomong mɛn mwa ba sé e vwɔ Dagwi. Pyɛ́ de be tɛ̀ yey e ra yɛ, kɛ pyɛ́ de be bɛɛ yɛ vyes, mwat a tɔk wɛt. Kayɛ pyɛ e nuyel mɛn ya sé yapyi.

²Vit a detu, yɛnɛ mo ha sé hining o, bemat de ba sé cik na vemo de ba sé beves, na mwat rwat na wo banɛn, na womo de a sé haalal na womo de a sé ligis, womo de e nára nenɔrɔ rangas na womo de e ra wɛt. Sede remo de mwat rwat a sé, ano de wo banɛn arɔng, womo de a sira a dal womo de a tik nà sira wɛt.

³Neves a nemo e pyɛ́ mwa de be ra e jey, pyɛ jining o yé hwo e ra yɛn mwa, neyey bemat arɔng na sila na neves, ko selolong sa sé e ji neyey mɛn, gbak neken mɛn, e bama mo be ku.

⁴Ko womo de a sé kwen e jey yemo, a sɛt yey, vu de wa sé kwen wa dal gukum de wa ga ku.

⁵Bemat de ba sé beken ba tɔk bê ku. Ko bavin ba tɔk pyɛ cak wɛt, ko ba to vɔk bwang pyɔlɔ wɛt, yaga ba ga ye bam a hɛn.

⁶Tɛ̂ yey na bɛɛ ves tanga repugu mɛn ha ga tala hɛ, vit a hɛn na nû pyɛ cak nesheneshey e ra pyɛ́ mwa de bemat be ra e jey.

⁷Ci re pyɛ́ mo na yey pyɛng, sɔ nshi anap mo na yêy dyɛngɛ, Dagwi a ga sey pyɛ de hwà ra.

⁸Tik berugu mō be pɛngɛ kayɛ jeng, rato mō wo bidɛ něy wɛt.

⁹Re jey mo na hwā de hwà tɛ̀ yey na yɛ mwa nepɔlɔ neken mo ne yapyi de Dagwi a nɔng o e jey, yaga nu mo mō hê sangal mō e jey, tanga fwôm yɔ́m mo de hwó sɔ e jey.

¹⁰Kayɛ pyɛ de vwɔ mo gwa sɛ̀ yè ra, ra yɛ na gap mo, yaga vit a fwom, kɛ bare, kɛ tɔ́k, kɛ netsitsɛng e kwɔ̂n bevuvwel de hwà sé kyè vɔk ɛ.

¹¹Ma to bɛrɛng e jey. Wo ziri e sǎ rê setele wɛt, suga e sǎ rê como wɛt, wo netsitsɛng e sǎ rê pyɛ̂ re wɛt, wo sekwɛl e sǎ rê dyām wɛt, mwa hɛn, be kyè e begwong sangal jey.

¹²Mwat a tɔk jeng mɛ wɛt sede betɔk de ba vos e ji segun, sede benon de ba vos e ji soro, ano de jeng vyes ye hwo e ra bemasi hak.

¹³Ma ga to di pyɛ dura netsitsɛng e jey, ko yá sè a me pyɛ ryey.

¹⁴Kerepomo kehak ka kana sè kesɛl o, bemat tyɔng e ji mo. Ko gbɔng gwɔ̀m hwak á hwo kerepomo mo na como á gwɔrɔ ke, bá tula gwot beta wɔ wul yɛnɛ jwâ-pomo kɛ.

¹⁵Mwat hwak á sè e ji kerepomo mo, mwat pwɛng de a vɔk netsitsɛng, ko yi na netsitsɛng mɛ a sey kerepomo mo. Mwa ano vit a mwat de a bare na pwɛng wane.

¹⁶Ko ma ye, netsitsɛng na dal gap, mwa ano de ba byɛs netsitsɛ̂ng mwat pwɛng wane, ko ba wok ha mɛ wɛt.

¹⁷Hâ mwat netsitsɛng de ba wok e ji nehywɛ ha dal dak sekûn gwɔ̀m betɔn.

¹⁸Netsitsɛng na dal pyɛ̂ como, ko mwat banɛn gwining e lashe pyɛ́ ryat pyak.