Read berom Lwɛlɛ Sɔlɔmɔn 2 Bible Online

Lwɛlɛ Sɔlɔmɔn 2 - berom bible

Lwɛlɛ Sɔlɔmɔn 2

¹Ma sé zɛrɛ sede jamûk hêy Sharon, sede jamuk swinang e nɛk.

²Sede jamuk swinang e tê serɔgɔ, ano sa hom a sé e ji behwong.

³Sede cɔgɔ̂t apɛl e tê cɔ́gɔt rehwot, ano wò yey hom a sé e ji bewen. Me simo sangal bagat na yɛ, me wok neta mɛ sede nèy apɛl.

⁴A wɔ́ na me e duk rê pyɛ̂ nzem, a tɛ̀ yey e ra me sede tɛ̂ gút e cap.

⁵Turu hin me na nèy anap nehwogot, nɔng me hin apɛl me re na a yang me wɛng-wɛng, gap hom ha ga tala hɛ yaga mân rebek.

⁶Vwɔ mwɛlɛng mɛ gwa sé e tɛ̂t rato hom, a kura me na vwɔ yege mɛ.

⁷À yin behwông Yɛrusalɛm, sira hom na bevow na begaros hey, yin sogo hot na yin dul mân rebek mot wɛt, sɛ̌ wot a yɛnɛ.

⁸Wok! Fwɔ̂ wò yey hom! Á woro e kyè vey, e gyilsit e beraku, e tē lōm e berahwol.

⁹Wò yey hom a sé sede davow kɛ bwôt ros, di ɛ e tumal e bamâ vwarâ duk mot. E tē byak e bapɔk, e bɛɛ e bewɔ́rɔ dúl.

¹⁰Wò yey hom e ha, e tē: Sogo, à sa hom! Vey, à zɛrɛ hom!

¹¹Di, zɛng ha ga kwey, swigi gwa ga vey.

¹²Bejamuk ba ga tē gbuk e vwel, jeng lwɛlɛ ya ga vey, ko be wokos fwɔ̂ lwɛlɛ̂ wǔtut e sevwel mot.

¹³Retîn regwi re tɔs nèy, retîn anap re turuk, re paa nesang hyɔɔlɔl. Sogo, à sa hom! Vey, à zɛrɛ hom!

¹⁴À gwobɔp hom, e sangal e tákla beta, e lɛrɛ hɛ e zomzom beta. Tik me di bayis mo, tik me wok fwɔ mo, yaga fwɔ mo gwa sé wɛng-wɛng, ko bayis mo ba sé barat.

¹⁵Vos in begam, de be wey na bwî anap, yaga batîn anap mot ba sé turuk.

¹⁶Wò yey hom a sé nwang me, me arɔng ma sé mwɛ, e gyenges vyēl mɛ e ji bejamuk besinang.

¹⁷Sɛ̌ gasi ha ye gbey, vit a di rezina, toyo vey na me ziri. À wò yey hom, ra dey sede davow kɛ bwôt ros e ra beraku de sarang ha sé e tê vɛ.