Read berom Lwɛlɛ Sɔlɔmɔn 3 Bible Online

Lwɛlɛ Sɔlɔmɔn 3 - berom bible

Lwɛlɛ Sɔlɔmɔn 3

¹Naturuk e ji nevwa ma rànas negwi, ma jama di wò yey hom, ma jama hɛ, ko ma sɛ̀ ɛ wɛt.

²Mê sogo me gwɔrɔ repomo, mê raa nehyok na cwɛ̂l jɔgɔ, mê jama di wò yey hom. Ma ga jama, ko ma sɛ̀ ɛ wɛt.

³Bemât gyêng repomo ba man na me, yɛn a sé gwɔrɔ, ko ma rangal hɛn, “Yin a ga di wò yey hom arɛt?”

⁴Ras de ma sé kwey ɛn, ko ma sɛ̀ wò yey hom. Ma kura hɛ veng, ma hala hɛ wɛt, sɛ̌ ma wɔ wul na yɛ e lɔ neng-gwɔ hom, e ji duk womo de a tɔ me.

⁵À yin behwông Yɛrusalɛm, sira hin na bevow na begaros hey, yin sogo hot na yin dul mân rebek mot wɛt, sɛ̌ wot a yɛnɛ.

⁶E wà a wane de a sé nusu yi e hey ɛ? Sede kyeng de hé tugus vɔk e rak o, ha sila na nesang nerat ne mir tanga firankinsɛn, na pyɛ̂ nesang hyɔɔlɔl mwa yi na bejik.

⁷Di woow! E Sɔlɔmɔn de ba jut ɛ, a sé kyè na bemât como kuru batyiimin, wò besugâ BeIsrayɛl.

⁸Ba ga kyé ɛn e tô como, ba vɔk sekwɛl, kawɛ mɛn a ga gana wal mɛ e hagat, be bɛrɛng nekanang yaga jugu naturuk.

⁹Gbɔng Gwɔ̀m Sɔlɔmɔn a yong pyɛ jut mɛ, a yong yɛ na cɔ́gɔt sida yi e Lɛbanɔn.

¹⁰A yong sesêk yɛ na dyam pyɛng, retis yɛ na dyam shinang, kwɔ̂n sangal yɛ, ba bang na rugu zwey, behwông Yɛrusalɛm ba yong yɛ sizɔng.

¹¹“Tá in e majey à behwông Yɛrusalɛm, bɛrɛng hin Gbɔng Gwɔ̀m Sɔlɔmɔn de a tɛ̀ kpîn negwɔm, de neng-gwɔ mɛ á kana nɔng ɛ tûk weneng mɛ, tuk de á vɔk yey pyɛng sizɔng.”