Read berom Lwɛlɛ Sɔlɔmɔn 4 Bible Online

Lwɛlɛ Sɔlɔmɔn 4 - berom bible

Lwɛlɛ Sɔlɔmɔn 4

¹À sa hom, hwà sé zɛrɛ, hwà sé zɛrɛ e ryat wɛt! Bayis mo ba vɔk nehywɛ sede bebɔp, ba sé e lɛrɛ e ji rugû bang bayis. Setot mo sit sede kwarâ vyēl shi de yɛ gyiris yi e rakû Gileyat.

²Yìn mo pɛng sede kwarâ shɛ̂p vyēl pyɛng de ba mɛsɛ̂ng yɛt a yɛ setot, ko ba ga kus yɛ. Kagwɛ mo gwa sɛ tyɛng, vit a hwak de gwa sé vit.

³Bwɛrɛ̂k nu mo gwa sé sede shwey sinang, nu mo ha sé rat. Rànang mo e ji rugû bang bayis ba sé sede pomigiranet de ba vugu hɛ.

⁴Fwɔ mo tabat sede tyɔ̌n Davit de ba lɔk yaga tɛ́sɛ pyɛ̂ como. Ba gana ɛ beruga gu, beruga besuga.

⁵Bavasal mō ba sé barat sede beshambyâ vow e kwɔ̂n rê sehwey, e ji bejamuk besinang.

⁶Sɛ̌ gasi ha ye gbey, vit a di rezina, mê kaba gwong wɔ e rakû mir, wɔ e rahwôl firankinsɛn.

⁷À sa hom, kahɛ dem mo ha sé rat, vit a pyɛ cak vyes e ji mo.

⁸À gwel hom, dopɛ e me yi e berakû Lɛbanɔn, dopɛ e me yi e berakû Lɛbanɔn, gyirik yi e ra tɛ̂t Raku Amana, yi e ra tɛ̂t Raku Senir tanga Raku Hɛrmɔn, yi e bavɔng begukum na tara cwēy.

⁹Hwà ga yel a me e yey, à hwong hom, à gwel hom, hwà ga yel a me e yey na kurâ bayis mo, na dî lwɛlɛ̂ fwɔ mo.

¹⁰Ma vɔk yey pyɛng na tɛ̂ yey mo, à hwong hom, à gwel hom! Tɛ̂ yey mo ha tá a me ha dal nshî anap, něy mɔmɔ mo na dal kagwɛ hwâl cɔ́gɔt nesang hyɔɔlɔl.

¹¹À gwel, bebɛrɛ̂k nu mo ba sé rɔkrɔk sede man-goro, relem mo re rɔgɔm sede shok na nevasal, berugu mo be ró nesang nerat sede Raku Lɛbanɔn.

¹²À hwong hom, à gwel hom, hwà sé sede bwi de ba bang na makwili, lwêl nshi de gwa sé e lɛrɛ, hwês nshi de ba ga bang gwɛ.

¹³Batîn cɔ́gɔt bwi mo ba vɔk nèy nerat, nezap o detidetu, bepomigiranet na hena tanga nât.

¹⁴Safrɔn, kalamus na sinamɔn, na firankinsɛn na mir tanga alowe, na kayɛ yerê cɔgɔ̂t behal nesang hyɔɔlɔl.

¹⁵Hwà sé sede hwês nshi e bwi, lwêl nshi jɛrɛ, nerɔt de ne tele nshi yi e Raku Lɛbanɔn.

¹⁶À gûl bato, pɛsɛl, ko vey, à gwô rwa batin! Tik na nesang hyɔɔlɔl ne shara hɛn! Tik wò yey hom a vey e bwi mɛ, na a re nèy cɔ́gɔt de na ta a yɛ.