Read berom Lwɛlɛ Sɔlɔmɔn 5 Bible Online

Lwɛlɛ Sɔlɔmɔn 5 - berom bible

Lwɛlɛ Sɔlɔmɔn 5

¹À hwong hom, à gwel hom, ma ga vey e bwi hom, ma sé vos mir na behal cɔ́gɔt nesang hyɔɔlɔl, ma sé sɔ shok e ji bèhamal yɛ, ma sé sɔ nshî anap na nevasâl yas. À besa yeey, re in, sɔ in, sɛ̌ mân bek ha vey a yin.

²Ma sè e ji nevwa, ma ranas negwi, ko ma wok fwɔ̂ wò yey hom e kwɔgɔt rwi duk, e tē: Wunta a me, à gwa hom, à sa hom, gwobɔp hom, de gwa sé gyat. Rato hom wa ga sing ɛ na mwɛngɛ, setot hom sa ga sing ɛ na wut naturuk.

³Ma ga pat berugu hom, ko sɛ̌ me to me tɛ̀ vɛ a? Ma ga kus bol hom, ko sɛ̌ me to me pɔrɔk vɛ a?

⁴Wò yey hom a tɛ̀ vwɔ mɛ e pɔk hom, ma pere wok cwey mɛ.

⁵Ma sogo na me wunta a yɛ. Vɔ hom be tɔngɔt něy mir, bekɛn vɔ hom be tele nshi mir, e ra gwông pɔk hom.

⁶Ma wunta a wò yey hom, ko a ga kana ruru. A yang me gbɛrɛk de ma wok fwɔ mɛ wɛt, ma bɛrɛng, ko ma di ɛ wɛt, ma yila hɛ, ko a hanat wɛt.

⁷Bemât gyêng repomo ba man na me, yɛn a sé gwɔsɔ, yɛn a dak me, ba zére me, bemât gyêng jwa-pomo ba sey ɛ rugû dûl rato hom.

⁸À yin behwông Yɛrusalɛm, sira hin a me, ka yin a sɛ̀ wò yey hom, e sé de yin ê ha a yɛ ɛ? Yang in hɛ, me wok cwey mɛ.

⁹À hwo zɛrɛ e ji beha, wò yey mo a dal wò behak a? Wò yey mo a dal wo behak ka hwó tɛ̀ wot a sira a?

¹⁰Wò yey hom a sé zɛrɛ̂ wen, kasang a hɛ, e nusu zɛɛt e ji bewen gu kuru.

¹¹To mɛ sede dyam shinang, setôt rato mɛ gyisak, gwim-gwim sede mâ gwohwǎk.

¹²Bayis mɛ sede bebɔp, de bà ga kus ɛn e ji nevasal yas, de be sangal e hagât rɔt kɛ kadung.

¹³Ranang mɛ ba sé sede bwî cɔ́gɔt behal, de gwo ro nesang hyɔɔlɔl, bebɛrɛ̂k nu mɛ sede bejamuk besinang, de ba paa nesang nshi mir.

¹⁴Vɔ mɛ ba sé sede bewɔ́rɔ dyam shinang, de ba tɛ̀ dyéngere ryat, rebek mɛ hyul-hyul sede hwîn gbin de ba tɔrɔ na safir.

¹⁵Bol mɛ sede sesêk duk nɛp de ba gyisa vɛ e celes dyam shinang. Nerât bayis mɛ na sé sede sevwêl Lɛbanɔn, sede cɔgɔ̂t sida.

¹⁶Hâ nu mɛ ha sé mwɛɛsɛs, vit a pyɛ de ya tik nà sé pyɛ somo e ji mɛ. E yɛ wɛ a wò yey hom, sa hom, à behwông Yɛrusalɛm!