Read berom Lwɛlɛ Sɔlɔmɔn 6 Bible Online

Lwɛlɛ Sɔlɔmɔn 6 - berom bible

Lwɛlɛ Sɔlɔmɔn 6

¹À hwo zɛrɛ e ji beha, e gwɛ̌ gwong de wò yey mo á raa ɛ? E gwɛ̌ gwong de á doyo ɛ? Tik wot tanga hwo wot jama hɛ.

²Wò yey hom a ga vɔk e bwi mɛ, e bwî cɔ́gɔt behal nesang hyɔɔlɔl, na a gyeng vyēl mɛ e bwi mo, na a tula ɛ̀ bejamuk besinang.

³Wò yey hom a sé nwang, ko ma sé mwɛ. A sé gyeng vyēl mɛ e ji bejamuk besinang.

⁴À sa hom, hwà sé zɛrɛ sede repomô Tirza, rwat sede Yɛrusalɛm, pyɛ sap sede rwâng regyɛng bemât como.

⁵Tik bɛrɛng me, nehywɛ hom na ga vuru hɛ! Setot mo sit sede kwarâ vyēl shi de yɛ gyiris yi e Raku Gileyat.

⁶Yìn mo pɛng sede kwarâ vyēl pyɛng de ba mɛsɛ̂ng yɛ́t a yɛ setot, ko ba ga kus yɛ. Kagwɛ mo gwa sé tyɛng, vit a hwak de gwa sé vit.

⁷Rànang mo e ji rugû bang bayis ba sé sede pomigiranet de ba vugu hɛ.

⁸Bedeberey ba sé kuru batyiimin na bejɛn-beha kuru bataama, tanga behwong vit à yɛnɛ.

⁹E ji mɛn mwa gwining zɔng a sé wò tɛ̂ yey hom, gwobɔp hom, de gwa sé gyat, wò yêy neng-gwɔ mɛ, haalal e bayîs womo de a tɔ ɛ, behwong be di ɛ ko be somo hɛ, bedaberey na bejɛn-beha, be nɔng ɛ nerey wɔgɔ,

¹⁰“E wa à wane de e nɛp sede rwa hwol gasi, rwat sede pwɛl, dyɛ̌t sede gwi, pyɛ sap sede rwâng regyɛng bemât como ɛ?”

¹¹Ma gyirik vɔk e kerehwôt gǎrum, na me bɛrɛng bejamuk de ba sé turuk e nɛk o, na me di kɛ retîn anap ra ga ye gbuk, kɛ nèy cɔ́gɔt bepomigiranet na sé e nû vél arɛt?

¹²Sana tɔk, báre hom ha wɔ̀ tɛ̀ me e ji kyɛkyɛ e hagât gwɔ̀m.

¹³To ò, to ò, à hwông BeShulam, To ò, to ò, na wot a di o! Sɛ́ ya tɛ̀ yin e simo bɛrɛng me WoShulam, de ma sé rɛ̌ e tê bemât bɛrɛng ɛ?