Read berom Lwɛlɛ Sɔlɔmɔn 7 Bible Online

Lwɛlɛ Sɔlɔmɔn 7 - berom bible

Lwɛlɛ Sɔlɔmɔn 7

¹À hwông lɔ gwɔ̀m bekpatak o ba sé a hwo berat e bol mo tyɔng wɛt, tà mo ba sé rat sizɔng sede dyéngere de mwât sekwɛl a yong.

²Hwop mo ha sé hyul-hyul sede tsung, de be bidɛ nshî anap nerat wɛt, rebek mo sede gwɔ̂t alkama de bejamuk besinang ba gwɔrɔ hɛ.

³Bavasal mo ba sé barat sede beshambyâ vow.

⁴Fwɔ mo gwa sé sede tyɔ̌n de ba tɔrɔ na yìn gbin, bayis mo sede nshî bekadûng Hɛshbɔn e hagât rwi yêl Bat-Rabim, wol mo ha sé lis sede tyɔ̌n Lɛbanɔn de yɛ bɛrɛng rwa Damaskus.

⁵Rato mo wa tɛ̀ hwà sé tabat sede Raku Karmɛl, tot lis mo ha sé sit, ha sé gwɛs-gwɛs hé tɔk jut nehywɛ gbɔng gwɔ̀m.

⁶Hwà sé pyɛ bɛrɛng, hwà sé zɛrɛ tyɔng wɛt, À wò yey hom, ma vɔk yey pyɛng na hwo.

⁷Hwà hwo sede retîn tyet, bavasal mo sede gushuk nèy gǎrum.

⁸Tik me tut e ra retîn tyet o, na me vos nèy nelang rɛ mwa. Bavasal mo gushuk sede nèy anap, nesang pɔngɔ mo na sɛ hyɔɔlɔl sede nèy apɛl.

⁹Mân ranang na hwo ha dal nshî anap de na dal na neta, ne gyirik e fwɔ hom sede nshî anap nepas o, ne kweres hyuululul e bɛrɛk nu tanga yìn.

¹⁰Wò yey hom a simo me, me arɔng ma sé mwɛ.

¹¹Vey, à wò yey hom, tik wot a kyè wo e hey, na wot a wɔ̀ tɛ̀ nepɔlɔ e nebapomo.

¹²Wot ê sogo hywiinin nagasi wɔ e bwî anap na wot a di kɛ batîn anap ba ga turuk, ba ga paa cúyu, kɛ bepomigiranet ba ga paa cúyu. E hwomo mê nɔng to hom na hwo.

¹³Nezap pyâl-gwi ye nɔngɔs nesang nerat, ko nèy cɔ́gɔt nerat sizɔng na gwɔrɔ ri duk mot, nepas mwa na neroso, ma ga ngyɛrɛ a hwo, à hwo wo yey hom.