Read berom Lwɛlɛ Sɔlɔmɔn 8 Bible Online

Lwɛlɛ Sɔlɔmɔn 8 - berom bible

Lwɛlɛ Sɔlɔmɔn 8

¹Ka ma yang sè na hwo sede mwat na gwa, de wot a sɔ nevasal nining o, mê tɔk man ranang na hwo jeng de ma man na hwo e hyok, ko mwat hwak ê ye mwɛt à me wɛt.

²Ma yang kyè na hwo, ma yang wɔ na hwo e lɔ neng-gwɔ hom, yɛ de a basa a me, mê nɔng o nshî anap de ba tɛ̀ hwâl nesang nerat na hwo sɔ, na nèy pomigiranet hom.

³Vwɔ mwɛlɛng mɛ gwá sè e nɛ̂n rato hom, a kula me na vwɔ yege mɛ.

⁴À yin behwông Yɛrusalɛm, yin sogo hot na yin dul man rebek mot wɛt, sɛ̌ wot a yɛnɛ.

⁵E wɛ̌ hwong à wane de e kyè vey yi e hey, e tē yɛndɛng e ra wò yey mɛ ɛ? Ma sene hwo yi e nɛ̂n cɔ́gɔt apɛl, e hwomo de neng-gwɔ mo a tɔ o.

⁶Bana me e yey mō, sede tô gwɔ̀m e yey mō, yaga tɛ̂ yey he royo sede reku, ha vɔk gbɔng reyɔm sede kwɔ̂n bevuvwel, he tē belem à kya, he lolo sede kya he re hey.

⁷Tɛmɛ-nshi wó tɔk rimi tɛ̂ yey wɛt, kɛ nshî rɔt ne tɔk re hɛ wɛt, ka mwat a ye ê nɔng yas na a ye ngyɛ́k a sey mɛ tɛ̂ yey, hê vey a yɛ na byɛs na shɛgɛsh.

⁸Wot a vɔk gwa mot hwong swɛl o, de a rɔngɔl nà ta bavasal. Wot ê ra sé yaga gwa mot hwong o e jeng pyap mɛ ɛ?

⁹Ka a sé sede vwarâ duk wot ê lɔk ɛ tyɔ̌n dyam pyɛng, ko ka a sé sede rwi duk, wot ê gwɔrɔ gwɛ na bebak cɔ́gɔt sida.

¹⁰Ey, ma sé sede vwarâ duk, ko bavasal hom ba sé tabat sede tyɔ̌n. Ano de wo yey hom ê di, ma ga vey hwā.

¹¹Sɔlɔmɔn a vɔk bwî anap e ji Baal-Hamɔn, a tik gwɛ e vwɔ̂ bemât fwom, e yang kawɛ a tala dyam pyɛng gu rining yaga nèy o.

¹²Sɔlɔmɔn, bê nɔng o gu dyam pyɛng, ko bemat fwom mo bê vɔkɔs kuru baba! Ko me arɔng, ma vɔk bwî anap gwô tó hom!

¹³À hwo wo yey hom, de hwà sé sangal e ji bě anap, besa de ba sé tanga me, ba sé wet betong na fwɔ mo, tik na me wok gwɛ.

¹⁴Ci ziri, à wò yey hom, ra dey sede davow kɛ bwot ros e ra berakû cɔ́gɔt behal nesang hyɔɔlɔl.