Read berom Yɛshaya 1 Bible Online

Yɛshaya 1 - berom bible

Yɛshaya 1

¹Pyɛ́ ma yemo de Dagwi a dura a Yɛshaya Amotsi e ji negwi-ywey e ra Yuda na Yɛrusalɛm jeng de Uziya, na Yɔtam, na Ahas tanga Hɛzɛkiya ba re negwɔm Yuda.

²Dagwi Darwey a ye, “À jey na lagwi, wet in betong naka, a sé Dagwi Darwey de a sé ha. Ma ras nèy, mà tɛ̀ nɛ̀ ne tɛ́ ɛn begbɔng o, ko nà ga sogo a me nehywɛ.

³Berɔndɔng ba tɔk da mɛn, bemadung ba tɔk kwɔn de da mɛn e nɔngɔs hɛn ɛ̀ pyɛ́, ko BeIsrayɛl ba tɔk ano wɛt, bemat hom ba tɔk pyɛ cak wɛt.

⁴Gawey e ra yin yerê bemat jey ye banɛn! Nedirîk banɛn min ne hwɔlɔ hin vey e vwel, yere yè bemât ragas neves, nèy lashê pyɛ́! Yin a ga ye waa a Dagwi Darwey, yin a byɛs WoJɛrɛ wo Israyɛl. Yin a ga doyo a yɛ ma.

⁵Yaga sɛ́ de yin a simo be kyě dak in ɛ? Yaga sɛ́ de yin e sǎ sogo nehywɛ ɛ? À Israyɛl, to min ha sila na baram, yey min mwa ye royo.

⁶Yi e tas bwol min vɔk e rato vit a dem de ha sé tyang. Bek min ha sila na baram, na nedem de na zére hɛn, na bebweykanang. Ba kus baram o na be bang vɛ wɛt, ba mɔmɔ vɛ na něy wɛt.

⁷Ba ga lashe vwel min, ba ga dak kya e bapomo min hywiri. Yére dyuk ya sé re vwel min e bayis min, ya tɛ̀ kahɛ kwɔn he tɛ́ ɛ barin, ya wey na nɛ.

⁸E Yɛrusalɛm zɔng de wa pɔl gbɔ́rɛy, sede bûk mwât gyeng e bwî anap, sede kekwɔn ye ngyɔk e bwî babe, sede pomo de ba gwɔrɔ na como.

⁹Ka Dagwi Darwey, Dâ Jey Mwa a yâng tik a wot bwang bemat o behak be dal wɛt, ka ba yâng wey na wot hywiri, tyɛng sede bá ra a Sɔdɔm na Gɔmɔra.”

¹⁰À yin begwɔ̀m Yɛrusalɛm sede vê Sɔdɔm, wet in betong na hâ Dagwi Darwey! A yin bemât Yɛrusalɛm sede vê Gɔmɔra, wok in basâ Dagwi mot.

¹¹Dagwi Darwey a ye, “Mê ra sɛ́ na mwa nenɔrɔ̂ yas min ɛ? Beturuk de yin e rangas a me yaga nenɔrɔ̂ yas burang tanga sebwêp yas min de ya dal na nerat mwa ba ga kat a me. A ga yang me sha na nemî bemus, na ne vyēl min pyɛng o na shi mo.

¹²E wa a rangal hin, pyɛ́ yemo mwa jeng de yin e vɛ̀sɛ re a me fongol ɛ? Yin e lashe Gbɔng Duk Re Fongol hom.

¹³A sé yapyi de yin e vɛ̀sɛ na nenɔrɔ̂ yas nemo. Nesang pyɛ̂ hyɔɔlɔl min na sé a me byɛm-byɛm. Me tɔk niri na gyengês Nzem Pwɛl Pwas, na ne Shábat, tanga netula min ne raà Dagwi wɛt, yaga yin e wunsa netulâ raà Dagwi na banɛn.

¹⁴“Me kyɛ́ me Nzem Pwɛl Pwas min, na ne Wusal min. Ya sé a me sede pyɛ̂ nedirik de ma ga ruru na hashe mo.

¹⁵“Jeng de yin e nára vɔ min e gwi e de won, me doyo bayis hom e jey. Ka yin a ka ra won e rɛ̌ ayi, mê tɛ̀ tong na yin wɛt, yaga nemi na sé ríishish e vɔ min.

¹⁶Kush in haalal. Tik in ragas tomong ves e bayis hom! Ey, tik in ragas neves!

¹⁷Masa hin ragas nerat! Di in bé gas badu e tē! Sɛlɛ hin vemo de be mɔt ɛn! Nɔng in nehyɛn pyɛ́ de ya sé myɛn! Gyep in bekuma e de shɔt!”

¹⁸Dagwi Darwey a ye, “Vey in remo na wot a ra badu. Mwa ano de banɛn min ba sé sede rugu swinang, ko ma rɔda kús in pes sede nemuk-fwala. Mwa ano de yin a senge zoyong na vɛ, ko yin ê to pɛngɛ sede toro.

¹⁹Ka sede yin ê simo yin gyeng ha hom, ko yin ê re pyɛ́ ryat de vwel o he nɔngɔs.

²⁰Ko ka sede yin a kyɛ́ in na yin a sogo nehywɛ, ko wâl como wô re in vit, yaga e Dagwi Darwey de a ha ano.”

²¹Gbɔng repomo de ra sé sede hwā de a man ɛ na rwas mɛ ra ga tɛ́ ɛ sede devwes! Raane gbɔng repomo mo rá sila na gâs badu e tē, ko naturuk e ji rɛ na sila na râ pyɛ́ cik, ko a remo e vê mɔbɔs bemat zɔng e ji mo.

²²À Yɛrusalɛm, raane hwá sè sede dyam pyɛng, ko a remo hwà to vɔk byɛ cak wɛt. Raane hwá sè sede nshî anap nerat, ko a remo hwà sé sede nshî rɛngɛt zɔng.

²³Bemât nuyel mo ba ga tɛ́ ɛn bemât sogô nehywɛ na besâ begbik. Yɛn e raa nenɔrɔ na pyɛ̂ bâng nu. Yɛn e nɔ̂ng nehyɛn pyɛ́ de ya se myɛn wɛt ko bé tɛ̀ tong na bekuma e de shɔt wɛt!

²⁴Yaga ano, wet betong na hwo wok pyɛ de Darwey Dagwi Darwey, Dâ Jey Mwa, Sugâ BeIsrayɛl a yɛ, “Haay, mê shusha shom hom e ra vê repugu hom, ko ma rɔda tala hɛn pyɔ̌n neves mɛn.

²⁵Mê nára vwɔ hom e ra hwo na me ra a hwo shɔt. Mê tɛ̀ o haalal sede remo de be rugut dyam na be paa gbàrak tanga neves o.

²⁶Mê to nɔng o bemat shɔt sede raane na bemât vôs badu yerê vemo de yin á kana vɔk. E bama mo, bê yila hwo à gbɔng repomo de ra sé cik ko ré ra pyɛ́ na tsak o.”

²⁷A sé e gas badu e tē de hê to sey Yɛrusalɛm ko a sé râ pyɛ́ cik de hê sey kawɛ mwat de a tosho gabɔk.

²⁸Ko Dagwi Darwey ê bunut vê râ pyɛ́ vyes na vê banɛn. A rɔda wey na kawɛ mwat de a ye waa à hɛ.

²⁹Hwô vo rekyen de hwá kana re a cɔ́gɔt ouk fongol na hwo nára a cī bě mo.

³⁰Yaga hwô hworok sede cɔgɔ̂t ouk de ra sé kyè wɔ̀ ku, kɛ sede pyɛ̂ bwi de vit à yɛ na nshi.

³¹Sede remo de kecilâ kya ke re cugul hywiri, ano arɔng tom ves begbɔng bemat de ba vɔk reto sizɔng bê wey na yɛn, ko vit a mwat de ê tɔk dul wey na yɛn o.