Read berom Yɛshaya 10 Bible Online

Yɛshaya 10 - berom bible

Yɛshaya 10

¹Gawey e ra yin! Yin e tɛ̀sɛ badu baves, yin e jɛkɛs pyɛ̂ mɔ̂t bemat.

²Yin e dul vê gbɛrɛk nà wɔ e duk shɔt, ko yin e ro bepɛng nà sɛ̀ gâs shɔt e tē. Yin e seres ɛ pyɛ̂ bekuma na nehyɛn.

³Yin ê ba ra sɛ́ jeng de Dagwi Darwey ê ba vey ngyɛgɛt hin ɛ? Yin ê ba ra sɛ́ jeng de Dagwi Darwey ê ba vey na rezot yi e vwêl yikyik ɛ? Yin ê ba tele vɔk e gwa na yin ba sɛ̀ sɛlɛ ɛ? Yin ê ba lɛsɛ pyɛ̂ nedanerey min e gwa ɛ?

⁴Bê ba mɔbɔs hin e de como, kɛ be hwɔlɔ hin vɔk e de sesam. Mwa ano, shôm Dagwi Darwey yê ye rɔ̀s wɛt, ko vwɔ mɛ gwô ba sè e nára na gwo tabak hin.

⁵Gawey e ra Asirya! Mê jut o sede gwele e ji shom hom, na sede kpurung na me tabak hɛn.

⁶Mê tomo Asirya na a wɔ̀ hwo yére de ya wok bengyip Dagwi wɛt, yére de ya lashe a me yey. Mê tomo hɛn na yɛn a wɔ̀ shigshi pyɛ̂ jugu, na be hashe yɛ, na be bɔrɔs bemat o sede serwik de sa sé e nehyok.

⁷Ko Da vwel Asirya a vɔk pyɛ mo myɛ vyes o de a ga yong e yey mɛ. A ga tɛ̀ e yey mɛ gak na a wey na yére bemât jey tyɔng wɛt.

⁸E dak kaa, e tē, “Kawɛ mwât nuyêl bemât como hom a sé gwɔ̀m!

⁹Ma ga re bapomô Kalno na Karkɛmish, bapomô Hamat na Arpat na como. Ma ga re Samariya na Damaskus arɔng.

¹⁰Ma nára me, ma wɔ̀ tabak bavwêl segwɔm de be re a dagwi mɛn fongol, bedagwi mɛn o ba dal vê Yɛrusalɛm na Samariya na nepyak.

¹¹Ma ga wey na Samariya na bedagwi mɛn mwa, ko ma rɔda ra tyɛng ano na Yɛrusalɛm na bedagwi de yɛn a yong.”

¹²Ko jeng de Darwey a yɛnɛ pyɛ de a sé ra e Raku Siyɔn tanga e Yɛrusalɛm, ko ê tabak Da vwel Asirya yaga mwa dâk kaa mɛ tanga mwa tôs rato mɛ.

¹³Da vwel Asirya e tē, “Ma ga ra pyɛ́ yemo mwa pyɛ hom. Ma vɔk gap, ma tɔk pyɛ́, na netsitsɛng. Ma ga fugut gâs vwel e tê yerê bemât jey, ko ma hashe pyɛ̂ nedanerey mɛn. Ma ga bɔrɔs bemat o na bol sede mus.

¹⁴Yerê bemât jey ya sé sede barɛngɛ̂ benon, ko ma tula pyɛ̂ nedanerey mɛn kpɛgɛrɛk sede mwat e tula bagyi e rɛngɛ. Vit à bafabâk gwonon de ba ye rwàk-rwak a vɛ na be ro mɛ yi e dem o, ko vit a bèkwok nû gwonon de bà ta a me lwɛ́lɛ!”

¹⁵Ko Dagwi Darwey a ye, “Tyěm yê ye, ya dal mwat de e ra fwom na yɛ a? Wâl-yìn wa dal mwat de e yɛt pyɛ́ na wɛ a? Kpurûng wo tɔk jut mwat e gwi a? Gwele gwo tɔk jut mwasi a?”

¹⁶Darwey Dagwi Darwey, Dâ Jey Mwa, a sé kyè wɔ̀ tomo serɔ na sē sɔ bemât como mɛ. Kya hê hwo re nerey mɛ.

¹⁷Dagwi de a sé negbêy Israyɛl ê tɛ́ ɛ kya. WoJɛrɛ wo Israyɛl ê sè kyâ nebep, de hê re shik na serɔgɔ mɛ mwa e tuk hining.

¹⁸Bê wey na bahwôt cɔ́gɔt na hiri de ba siri naka, tyɛng sede remo de serɔ seves sé wey na rebek mwat.

¹⁹Bwang cɔ́gɔt de yê pɔl yê sè tyɔng zɔng, ko hwey sɛl zɔng hê tɔk bara nepyak yɛ.

²⁰Jeng ye kyè vey de bwang BeIsrayɛl na vê lɔ Yakɔp de ba dal bê ye yɛndɛng e ra gwele de gwa ga dak ɛn. Yɛn ê ye yɛndɛng e ra Dagwi Darwey, Dagwi WoJɛrɛ wo Israyɛl.

²¹Kebwang o kê toyo, kebwang BeIsrayɛl kê toyo vey na Sugâ Dagwi.

²²Mwa ano de BeIsrayɛl bá sè pyak sede bazɛ̂k gworep, kebwang o kê toyo. Ba ga yɛrɛ a yɛn gawey tanga gâs badu e tē.

²³E yɛnɛ̂ mwa vwel o, Darwey Dagwi Darwey, Dâ Jey Mwa, a rɔda vey na gawey e ra yɛn, sede remo de a ga ye ê ra.

²⁴Darwey Dagwi Darwey, Dâ Jey Mwa, a ye, “À bemat hom, de yin a sé sangal e Siyɔn, yin wok bengyip BeAsirya wɛt, mwa ano de yɛn e dak in na gwele tanga kpurung sede BeMisra bá dak in raane.

²⁵Bwang jeng tyɔng zɔng de mê yɛnɛ lashê yey hom, ko shom hom yê doyo vɔk e ra yɛn.

²⁶Me, Dagwi Darwey, Dâ Jey Mwa mê dak ɛn na zining hom sede remo de má dak BeMidyan e gwofwa Orep. Ma sé jut gwele hom e ra gwɔrɔt Asirya sede remo de mà ra e Gworep Sere e Misra na me wey na yɛn.

²⁷Jeng ye kyè vey de mê viri hin washak yi e nedirîk Asirya, na a sè sede ma kwɔrɔ swesêk vɔk berɔndɔng.”

²⁸Bemât como ba ga re repomô Ayat. Yɛn a ga kwey e Migrɔn! Ko yɛn a pere tik pyɛ́ mɛn e Mikmash![6]

²⁹Yɛn a ga ye dɔ a vwâk beta ko yɛn a sé pɔl e Geba! Bemât Rama ba wok bengyip, ko bemât Gibeya, repomô Gbɔng Gwɔ̀m Saul ba ga tele.

³⁰Dak in sekun à yin bemât Galim! Wet in betong à yin bemât Layisha! Toyo hin a yɛn mɛ, à yin bemât Anatot!

³¹Bemât Madmena na vê Gebim ba sé tele na be wɔ̀ sey neken mɛn.

³²Yunung vê repugu mo ba sé e repomô Nɔp, ko yi e hwomo yɛn e nása vɔ vɔk e Raku Siyɔn, de wa sé e gbɔng repomô Yɛrusalɛm.

³³Darwey Dagwi Darwey, Dâ Jey Mwa a rɔda tɛ̀ yɛn a gabsa vey e vwel sede nelang cɔgɔt de ba tow na nengyas. Vemo de ba dal mwa na dâk kaa, bê tow ɛn, be gabsa e vwel, ko be sè pyɛ byɛs.

³⁴Dagwi Darwey ê tow ɛn sede cɔgɔ̂t rehwot de ba tow yɛ na tyem; ko yɛn ê gabsa sede cɔ́gɔt Lɛbanɔn ryat!