Read berom Yɛshaya 11 Bible Online

Yɛshaya 11 - berom bible

Yɛshaya 11

¹Gbɔng gwɔ̀m pwas ê yi e yerê Davit sede kelang de ka turuk yi e kpɔk tîn cɔgɔt, ko gwolang o gwô sɛ̀ pyɛ́ yi e bwang berinis o.

²Gabik Dagwi Darwey hê sangal e ra yɛ, Gabîk netsitsɛng na bɛrɛng yɛɛlɛl, Gabîk vô redu na hê gap. Gabîk tɔk, na bengyip Dagwi Darwey.

³Yey mɛ yê pɛngɛ na bengyip Dagwi Darwey A rɔda ra shɔt yi na bɛrɛng bayis wɛt kɛ a yɛrɛ shɔt yi na pyɛ de a wok wɛt.

⁴A rɔda ra a bepɛng shɔt na necik, ko a gas a vemo de be tak a yɛn badu e tē. Ê dak bemât jey na ha mɛ sede na gwele, ko ê wunta nu mɛ ê mɔrɔ vê neves.

⁵Necik nê sè sede gyindi de a rɔgɔs mɛ wit mɛ, ko tsak o sede gyindi de wo rɔgɔs nɛ́n mɛ.

⁶Gbɔng bwá tanga byôt tyimit ko cwey tanga hwêy vyel shi bê sangal tyang e dem hining. Hwêy rɔndɔng na hê gukum bê re pyɛ́ e dem o, ko hwey sɛl hê gyeng yɛ̄ mwa.

⁷Benêng rɔndɔng na vê beyar bê re pyɛ́ e dem hining, ko nèy mɛn nê dyɛng tyang e kwɔn hining arɔng. Gukum wô re sɔng sede rɔndɔng.

⁸Hwêy-vɔ hê ra jɔgɔ e dem dyɛngɛ̂ gàbak, ko hwey de ba ga kang hɛ hê tɛ̀ vwɔ e vɔng mazɛrɛ.

⁹Ko vit a pyɛ de yê mǎ hɛ, kɛ pyɛ vyes cak yê sɛ̀ hɛ e ra raku hom wo jɛrɛ mwa. Vwel o ha rɔda sila na tɔ̂k Dagwi Darwey sede gworep gwa sila na nshi.

¹⁰E jeng o lɔ̂ negwɔm Davit de ha sé rwinîs Yɛsɛ hê sè tuta e nuyêl yére bemât jey. Mwa yére bemât jey yê vey yang ɛ show, e gbɔng repomô negwɔm mɛ nê gbɔng nerey mɛ.

¹¹E jeng o, Darwey ê to nára vwɔ mɛ na a toyo na bwang bemat mɛ e lɔ, yɛn vemo de bà kana hala hɛn e Asirya, na Misra, na Sudan, na Etiyopya, na Ɛlam, na Babilɔn na Hamat, tanga bavwêl rekwogôm gworep.

¹²Darwey ê nára túta na a yila yére bemât jey, ê tula BeIsrayɛl de ba ga kana shara vɛ, na a to toyo na BeYuda yi e jey mwa.

¹³BeIsrayɛl bê to ra repugu na BeYuda wɛt, ko BeYuda bê to bɛɛ BeIsrayɛl ves wɛt. Repugu mɛn rê tala hɛ vit.

¹⁴Yɛn ê wuna hɛn be hwo BeFilisti e rwa ta, ko be wɔ̀ jugu bemât rwa rak. Yɛn ê re BeƐdɔm na BeMowap na como, ko BeAmɔn bê gyeng ha mɛn.

¹⁵Dagwi Darwey ê wey na nû Rep Sere hywiri, ko ê tɛ̀ gul pwep gwo tɛ̀ Gwɔrɔt Ɛifaratɛs gwo hworok, bê tik ɛ nerɔt netaama nesɛl o de bemat bê tɔk tē dɔ à nɛ e ji kwɛngɛl zɔng.

¹⁶Ano, ê tɛ̀ gbɔng gwong yi e Asirya yaga bwang bemat mɛ BeIsrayɛl de ba tɛ́t ɛ̀ e hwomo, sede remo de bá ra a bedabeda mɛn jeng de yɛn á nusu yi e Misra.