Read berom Yɛshaya 13 Bible Online

Yɛshaya 13 - berom bible

Yɛshaya 13

¹Hâ siitit e ra Babilɔn de Dagwi Darwey a ha a Yɛshaya Amotsi e ji negwi-ywey à hemo:

²Nára hin túta e ra rak rahwol de wa sé gbɛngɛrɛng! Moklo á bemât como, na hwo nára vwɔ mo e rak o na hwo dura a yɛn, na yɛn a hwo como e ruhûp gbɔng repomo de ra kat dâk kaa.

³Dagwi Darwey a ga yila bemât como mɛ vê jɛrɛ, ko be tó yêy râ como wɛt, yaga ba sé ra fwôm shôm Dagwi Darwey.

⁴Wok in rewɔng e beraku — rewɔ̂ng gbɔng regyɛng bemat, rewɔ̂ng yére bemât jey pyak na bemât bavwêl begwɔ̀m detidetu de ba sé tula hɛn. Dagwi Darwey a sé tula bemât como mɛ yaga tô como.

⁵Yɛn a sé kyè vey yi e bavwel yikyik vê yɛnɛ̂ jey. Dagwi Darwey a sé kyè vey na pyɛ̂ fwôm shom mɛ na a vey bugut vwel o mwa.

⁶Dak in sekun yaga jeng Dagwi Darwey ya ga vey lɛs, yê sè jeng wey yi e Wo Reto Mwa.

⁷Vɔ kawɛ mwat bê sè gbɛrɛk, ko vit a mwat de ê to vɔk yey ting.

⁸Kawɛ mwat ê vo bengyip ko ê ririm na nepep, sede hwā de e rus na jîm tɔ. Yɛn ê bɛrɛng bemɛn na bengyip, ko bayis mɛn bê sila na rekyen.

⁹Jeng Dagwi Darwey ya sé kyè vey — jeng vyes, na jeng shom tanga jeng lashê yey. Jey yê tɛ́ ɛ barin, ko bê wey na kawɛ mwât banɛn.

¹⁰Kawɛ tangacɛn tanga karɛ regyɛng netangacɛn bê to lolo negbey wɛt, gwi gwô sè mwangalang jeng de gwa sé nusu, ko pwɛl arɔng gwô nɔng negbey wɛt.

¹¹Dagwi Darwey a ye, “Mê tabak nevês jey mwa tanga banɛ̂n bemat beves. Mê tɛ̀ kawɛ mwat de e dak kaa a dyɛng to mɛ,

¹²Mê tɛ̀ bemat be sè tyɔng zɔng sede celes dyam shinang, ko nekên mwasi nê sè pyak wɛt sede dyam shinang ye sevwêl Ofir.

¹³Yaga ano, mê tɛ̀ lagwi wo vow na bengyip, ko jey ye digis, jeng de me Dagwi Dâ Jey Mwa mê dura shom hom.

¹⁴“Bemât yére dyuk de ba sangal e Babilɔn bê tele vɔk e bavwel mɛn, be shara hɛn sede bevow de ba sé tele yi na begbam, sede vyēl de ya vɔk lwek wɛt.

¹⁵Kawɛ mwat de ba sɛ̀ ɛ, bê luga hɛ, ko kawɛ mwat de ba vo ɛ bê mɔrɔ hɛ na wal.

¹⁶Yɛn ê bɛrɛng yɔɔt be sè basak nèy-vɔ mɛn e ra beta. Bê jugu nelɔ mɛn, ko be dyɛngɛs na beha mɛn na retek.”

¹⁷Dagwi Darwey a ye, “Ma sé tɔgɔs BeMedya na be hwo Babilɔn na como. Yɛn a tɛ̀ dyam pyɛng ya sé a yɛn pyɛ wɛt, ko bê tɔk tɔgɔs hɛn na dyam shinang arɔng wɛt.

¹⁸Yɛn ê mɔbɔs bebôt bemat na begbang. Yɛn ê tosho reyɔ̂m nèy-vɔ wɛt, kɛ be wok nemwishish nèy.

¹⁹Yɛnɛ̂ segwɔm Babilɔn sa dal bwang segwɔm mwa na nerât bɛrɛng ko bemat o bá ra kaa na sɛ̄ sizɔng. Ko sê tɛ́ ɛ sede Sɔdɔm na Gɔmɔra jeng de Dagwi a bugut hɛn.

²⁰Vit a mwat de ê sang to sangal e hwomo gbak-gbak, vit a lwêk yas de ê tɛ̀ buk mɛ e hwomo, ko vit a lwêk vyēl de ê wɔ̀ gyeng yɛ e hwomo.

²¹Ngyāma yê sangsal e hwomo, ko nelɔ mo nê sila na ngyāma vyes — beying-gyi, na bengyuwa, ko vyēl shî hey yê kyě gyilsit ɛ̀.

²²Bemurum bê tosho, ko nevu-hey bê bǔ e nelɔ negwɔm mɛn. Jeng Babilɔn ya ga vey lɛs, yê ros wɛt.”