Read berom Yɛshaya 14 Bible Online

Yɛshaya 14 - berom bible

Yɛshaya 14

¹Dagwi Darwey a rɔda tosho reyɔ̂m Yakɔp, ko ê to kasa BeIsrayɛl na be sè bemɛ. Ê tík ɛn be to sangal e vwel mɛn. Bemât yére dyuk bê sangal ɛ̀ tanga yɛn ko be man ɛn na lɔ Yakɔp.

²Yére bemât jey pyak yê sɛlɛ BeIsrayɛl o na be toyo e vwêl Dagwi Darwey, ko e hwomo, yére bemât jey o yê ra a BeIsrayɛl fwôm sesam. Vemo de bá kana hashe BeIsrayɛl e como raane, BeIsrayɛl o bê re ɛn a remo arɔng, ko BeIsrayɛl bê re negwɔm e ra vemo de bá kana tak a yɛn raane.

³Jeng de Dagwi Darwey ê nɔ́ng in, yin BeIsrayɛl pɔngɔ yi e reyɔm na rezot tanga fwom de gwa kat de bá tɛ̀ in gbing-gbing yin ra raane,

⁴e jeng o yin ê ha cinat ha e ra gbɔng gwɔ̀m Babilɔn, yin ye: “Di in de gbɔng gwɔ̀m vwes a ga gaba! Ê sang to tak a mwat hwak wɛt!

⁵Dagwi Darwey a ga kwɔrɔ gwelê negwɔm mwat vwes, na tô gwɔ̀m vê rê negwɔm o.

⁶Yɛn vemo de bá tak a bemat o na shom vyes, bê tɛ̀ kwɔ̂k tak a yerê bemât jey de yɛn á re na como wɛt.

⁷Ko a remo bemât jey mwa ba sé wok netâ pɔngɔ na yêy dyɛngɛ, tanga lɛlɛ̂ yey pyɛng.

⁸Batîn cɔ́gɔt fir na sida Lɛbanɔn be feng e ra gaba mo, yaga vit a mwat de ê to kpɔgɔm hɛn!

⁹“Jêy bevuvwel ya sé yong ɛ na ye sey o. Begabîk vemo de bá vɔk reto hyiw e jey raane ba sé sensa, ba sé sogso yi e beta negwɔm mɛn.

¹⁰Mwa vɛ ba sé remo hɛ, be tē: ‘A remo hwà ga tɛ́ o gbɛrɛk sede wot! Hwà ga tɛ́ o hwak e ji mot!

¹¹Bá nɔngɔs hwo nerey raane na râ lɛlɛ̂ yōm, ko di a remo, hwo à womo e jêy bevuvwel. Ba lásha hwo e ra gwât bekpùrus, ko ba bang o na pyɛ banga ye bekǔt.’

¹²“À dàt bop nagasi, hwà ga gaba yi e lagwi! Raane hwá tak a yére bemât jey, ko a remo ba ga barak hwo vey e vwel.

¹³Hwá tɛ̀ e yey mo na hwo tút vɔk e lagwi, na hwo wɔ̀ tɛ̀ gwofwa negwɔm mo e kwɔn de ha dal hê kawɛ tangacɛn na neyikyik. Hwá bare, hwô sangal sede gbɔng gwɔ̀m e ra rakû kwɔ̂n tula bedagwi e rwa bato.

¹⁴Hwá ye, hwô tut vɔk e ra rak bale, na hwo sè sede Dagwi De A Dal Na Reto Mwa.

¹⁵Ko di, ba ga vey na hwo e vwel, e tîn hwês ciwil.

¹⁶“Bevuvwel bê lolo bayis mɛn e ra hwo ko be bɛrɛng hwo kpɔrɔk. Yɛn ê rangal, be ye, ‘E mwat a womo de á digis jey, na a tɛ̀ segwɔm jey sē vow a?

¹⁷E mwat a womo de á wey na bagbɔng bapomo, ko á tɛ̀ jey ye tɛ́ ɛ gbingiring a? E mwat a womo de á sang tik besam como na be kyè wɛrɛn wɛt a?’

¹⁸“Mwa begbɔng begwɔ̀m jey ba sé e dyɛngɛ e besak mɛn vê gbɔng nerat,

¹⁹ko di, hwà vɔk sak wɛt, ba ga barak revin mo na re bɔsɔ. Bavîn bemât como de ba mɔbɔs ba ga bang revin o mó, ba ga bomos vɛ mwa e beta e tîn hwes, sede bavin de ba byɛs vɛ.

²⁰Bê lɛrɛ hwo sede bwang begbɔng begwɔ̀m wɛt, yaga hwà ga wey na sevwel mo, hwà ga mɔbɔs bemat mo pyɛ mo. Hwak e ji yere mo vyes a kwon dal wɛt!

²¹Tik na be hwo mɔbɔs nèy gbɔng gwɔ̀m yaga banɛ̂n beda mɛn. Hwak e ji mɛn a kwon to re negwɔm e ra jey, kɛ a lɔk bagbɔng bapomo mɛ mwa wɛt.”

²²Dagwi Darwey, Dâ Jey Mwa a ye, “Ma rɔda hwo Babilɔn na como, na me wey na wɛ. Mê tɛ̄t ɛ̀ pyɛ cak wɛt — mê wey na yěp mɛn mwa. Me, Dagwi Darwey ma ha ano.

²³Mê tɛ̀ Babilɔn wo tɛ́ ɛ bèy, ko beying-gyi bê sangal e hwomo. Mê jut gwɛs de gwô yishing kayɛ pyɛ Babilɔn vɔk e jey. Me Dagwi Darwey Dâ Jey Mwa ma ha ano.”

²⁴Dagwi Darwey Dâ Jey Mwa a ga sira, a ye, “Pyɛ de ma ga yong, yê té ano. Pyɛ de ma ga tɛ̀ e yey na me ra, mê ra yɛ ano.

²⁵Mê wey na BeAsirya e vwel hom, ko bê fɔnɔt hɛn e ra beraku hom. Mê viri bemat hom sede yi e swesêk vɔk berɔndɔng de BeAsirya ba tɛ̀ a yɛn tanga pyɛ de ya sé dirik e batô vɔ mɛn.

²⁶Pyɛ de ma yong yaga jey à yemo, ko ma ga nára vwɔ hom na me tabak mɛ yerê bemât jey.”

²⁷Dagwi Darwey Dâ Jey Mwa a ga yong na a ra, ko wà ê fugut pyɛ mo ɛ? A ga nára vwɔ mɛ na a tabak hɛn mɛ, ko vit a mwat de ê tɔk tusa hɛ.

²⁸E shey de Gbɔng Gwɔ̀m Ahas á ku, ma sey hâ siitit hemo:

²⁹À yin bemât Filistya, wɔ́rɔ dyam de bá dak in mɛ wa ga kwɔrɔ hɛ, ko a kwon sè a yin pyɛ yey pyɛng wɛt! Gwɔ̄m hwak wo ku, ko gàbak gwó yi e tô wɛ! Regyi gwɔ̄m rê kwɛk yùmung!

³⁰Dagwi Darwey ê sè lwêk bemat mɛ de ba sé bepɛng, ko ê tik ɛn na yɛn a sangal e ji netyang. Ê tomo na vyong vyes e ra yin BeFilisti, yin ê kushu, ko bwang min bê kushu arɔng.

³¹Dak in sekun, na yin a tosho yaga sɛlɛ, à mwa yin bapomô BeFilisti! Vɔk in bengyip sizɔng mwa hin! Sekyeng sa sé tugus e rwa bato — ra sé regyɛng bemât como de re kyè vey, ko mwa hɛn ba sé besuga.

³²Wot ê toyo á betom de ba yi e vwêl yére dyuk na wot yi e Filistya na sɛ́ ɛ? Wot ê yang ɛn, Dagwi Darwey a ga tɛ̀ retis mɛ e Siyɔn, ko bemat mɛ de be tak a yɛn bê sɛ̀ kwɔ̂n sangal tyang e hwomo.