Read berom Yɛshaya 15 Bible Online

Yɛshaya 15 - berom bible

Yɛshaya 15

¹Hâ siitit hemo ha sé e ra Mowap. Ba wey na bapomô Ar na Kir e túruk hining, ko vwêl Mowap ha ga wɛrɛ yuu.

²Bemât Dibon ba ga tut vɔk e rahwol na be wɔ̀ tosho e nekwɔn sekwit sede behwong. Bemât Mowap be dak sekun e ra bapomô Nebo na Medeba, yɛn a ga wula bato na negyɛk mɛn yaga sesin o.

³Bemat de be kyě kyè e nehyok ba tɛ̀sɛ berugû sesin, ko bemat ba sé kyě tosho na râ sesin e majêy repomo tanga e ra beragyip nelɔ mɛn.

⁴Bemât Hɛshbɔn na Ɛlɛyalɛ ba sé dak sekun, ko be wokos sɛ̄ yikyik vɔk e Yahas mwa. Bemât como mwa arɔng ba sé vow, vit à yey ting.

⁵Yey hom ye tosho e ra Mowap! Bemat o ba ga tele vɔk e repomô Zowar, na Eglat Shɛlishiya. Behak ba raa gwong wo tut vɔk e Luhit, ba kyè ba raa be tosho. Behak ba hywit ɛn vɔk e Hɔrɔnayim, ba raa be tosho ngyat-ngyat.

⁶Kadûng Nimrim ha ga hworok, sɔ̂ng bahagat o gwa ga tē nɔɔshɔsh, ko sɔng lwa gwa to sɛ́ wɛt.

⁷Bemat o be tē dɔ e Nɛk Cɔ́gɔt Babɔnɔng be jama gwông hywit ɛn na nedok nekyɔrɔk mɛn mwa de yɛn a sɛ̀.

⁸Kawɛ bak e yɛnɛ̂ vwel Mowap be wokos lwɛ́lɛ sesin. Be wok gwɛ e bapomô Eglayim na Beerelim.

⁹E repomô Dibon nshî rɔt mɛn na senge na nemi, ko Dagwi a rɔngɔl vɔk tabak de ha dal hemo na neves e ra bemat o. Ey, bê mɔbɔs bwang bemat mwa de ba pɔl e Mowap.