Read berom Yɛshaya 16 Bible Online

Yɛshaya 16 - berom bible

Yɛshaya 16

¹Tomo na byot tyīmit vɔk na gwɔ̀m vwel o, yi e Sela, e hêy gbingiring, vɔk e Raku Siyɔn.

²E kwɔ̂n ye dɔ̂ Rɔt Arnɔn, behâ Mowap bê sè sede benon de be kyě rini, sede nenon de ba ga ro nɛ e barɛngɛ mɛn.

³Bê tē, “Vo a wot hin redu, gas a wot hin badu e tē, Tɛ̀ necam mo e ra wot sede naturuk e tê-gwi, lɛrɛ vemo de ba ga ro ɛn e jey, hwo row vemo de be kyě tele kpɛɛ wɛt.

⁴Tik vê Mowap de be kyě tele kpɛɛ, be sangal na yin, sè kwɔ̂n lɛrɛ yaga yɛn, yi na vê wey na yɛn.” Jeng de mwât tak a yɛn a to sé wɛt, ko ba ga tik wey na yɛn, jeng de bemât wey na yɛn ba ga hala vwel o.

⁵Ano bê tɛ̀ gwofwa negwɔm gwo tsak tɛ̂ yey, e bûk Davit, ko mwât shɔt wo tsak o ê sangal e ra gwɛ, ê gas badu e tē ê ra pyɛ́ de ya sé cik dey-dey.

⁶Wot a ga wok dâk kaa Mowap — e dak kaa tyɔng wɛt! Wot a ga wok dâk gèy, na dâk kaa, na dúsa mɛ, tôs to mɛ ha sé hê bɔs zɔng.

⁷Yaga ano tik na Mowap wo dak sekun, tik kawɛ e ji mɛn a dak kun yaga Mowap. Be tosho, be lashe yey, yaga bagàt regwi Kir-Hareset de ba shumung bê to sè wɛt.

⁸Hirî anap Hɛshbɔn na batîn anap Sibma ba ga hworok, Nshî anap mɛn ná vos bedaberêy yére bemât jey. Batîn anap o bá nǎ vɔk e Yazɛr raane, ko bá wɔ̀ wul hêy gbingiring, nelang o ná shara hɛn kpɛɛ nè wɔ ye dɔ à gworep.

⁹Ano mê tosho yaga batîn anap Sibma, sede remo de me tosho yaga Yazɛr. Mê vɔ́n in na nemwishil hom, à yin Hɛshbɔn na Ɛlɛyalɛ, yaga lwɛ́lɛ bemât bwâl nèy anap min, na gwô vê bwâl pyɛ̂ yeneng min gwa ga wɛrɛ yuu.

¹⁰Yey pyɛng na shɛgɛsh ba to sé e hirî pyɛ́ min rat wɛt, ko e hirî anap min be ra lɛlɛ wɛt, be to wok gbɔ̂ bemat wɛt, be to farang nèy anap e nekwɔn farang o wɛt, tâ lwɛ́lɛ bemât bwal ha ga yɛnɛ hɛ.

¹¹Yaga ano, yey hom ye dak sede yòm yaga Mowap, simo hom mwa arɔng yaga Kir-Hareset.

¹²Jeng de BeMowap bê kyese e nekwɔn sekwit mɛn ne rahwol, ko be yel e kwɔ̂n rê fongol mɛn na be ra won, ko yɛn ê sɛ̀ nerat nehak wɛt.

¹³Hâ Dagwi Darwey à hemo e ra Mowap raane.

¹⁴Ko a remo Dagwi Darwey a ye, e ji neshey netat, sede neshey mwât fwôm byɛ, gbɔng nerât Mowap nê tɛ́ ɛn pyɛ byɛs, mwa na nepyak bemat mɛ, ko vemo de ba tɛt ɛ, bê sè tyɔng zɔng, vit à gap.