Read berom Yɛshaya 17 Bible Online

Yɛshaya 17 - berom bible

Yɛshaya 17

¹Ha siitit e ra Damaskus a hemo. Di, Damaskus wô to sè gbɔng repomo wɛt, ko wô sè gwɔ̂t barin.

²Bê hala bapomô wɛ hal gbak-gbak, bê tɛ́ ɛn nekwɔn vyēl, yê dyɛngɛs ɛ̀, ko vit a mwat de ê tɛ̀sɛ a yɛ bengyip.

³Kwɔ̂n dál hê to sè e Israyɛl wɛt, ko Damaskus wô vɔk segwɔm wɛt, ko bwang Aram wô sè sede gbɔng nerât BeIsrayɛl. Dagwi Darwey, Dâ Jey Mwa a ye ano.

⁴E jeng o, gbɔng nerât Yakɔp nê tɛ́t ɛn, ko sebwêp bek mɛ sê tala hɛ.

⁵Ê sè sede jeng de bemât bwal ba sé yɛt pyɛ̂ yeneng de ya rɔngɔl ko a ga yɛt bwang pyɛ́ mo na vwɔ mɛ, kɛ sede womo de a sé kyě yɛt nemɔ pyɛ̂ yeneng, e Nɛk Rɛfayim.

⁶Yɛn ê sè sede bagbát regwi e ra cɔgɔt bama de ba ga dak nèy o, bagbàt o baba kɛ batat e lang o, banaas kɛ batungun e gbɔng lâng cɔgɔt o. Dagwi Darwey, Dagwi wo Israyɛl a ha ano.

⁷E jeng o, bemat bê bɛrɛng á womo de a yong ɛn, ko bê doyo bayis mɛn vɔk na yɛ WoJɛrɛ wo Israyɛl.

⁸Yɛn ê to bɛrɛng á begagbang rangâs yas wɛt — pyɛ́ de yɛn a yong na vɔ mɛn, kɛ pyɛ́ de nekɛn vɔ mɛn na yong, yɛ à sesêk Ashera kɛ begagbang rangâs pyɛ̂ nesang hyɔɔlɔl.

⁹E jeng o, bagbɔng bapomô dál mɛn vê gap bê sè sede nekwɔn de ba ga hala nɛ hal, ne BeHivi na ne BeAmɔr, de yɛn á hala jeng de BeIsrayɛl bá sè kyè wɔ̀ hwo e ra yɛn, kayɛ pyɛ yê sè hal.

¹⁰Yaga yin a ye waa a Dagwi de a sey in, yin a ye bam à Gwofwa, kwɔ̂n lɛrɛ min. Yaga ano, mwa ano de yin a tus pyɛ́ ryat e bě min yaga cī, yin a zep cɔ́gɔt ryat yaga dagwi dūk.

¹¹Mwa ano de yin a tɛ̀ yɛ ye hwo ras e tûk zep o, ko yin tɛ̀ ye tá cúyu e nagasî zep o, mwa ano, nèy o nê hworok e tuk de rɔ na royo de he ye rɔ̀s wɛt ha hwo e ra nɛ.

¹²Wok in, lulûm regyɛng bemat! Be lulum sede gbara e gworep. Wok in lulûm yére bemât jey! Lulum o ha sé sede hê nshî gworep!

¹³Yére bemât jey ye lulum sede hê tɛmɛ-nshi, ko Dagwi ê gyong ɛn, ko yɛn ê tele e jey yikyik, bê ro ɛn sede byɛmɛ e beraku gyam na gul gwo hwo, na sede bûm wúla gyam na gûl rwak gwo hwo.

¹⁴Nahywegelek kayɛ pyɛ yê sè kpɛɛ, ko gyam nagasi, bê to sè wɛt. Pyɛ de yê té na vemo de be jugu hot a yemo, pyɛ de yê té na vemo de ba hashe pyɛ́ mot na retek a yemo.