Read berom Yɛshaya 19 Bible Online

Yɛshaya 19 - berom bible

Yɛshaya 19

¹Ha siitit e ra Misra a hemo. Di, Dagwi Darwey a sé laga rele de re tele dey-dey, na a vey e Misra, ko pyɛ̂ sekwît Misra yê vow e nuyel mɛ, ko neyey BeMisra mo nê ye ywey e ji mɛn.

²Mê tɛ̀ BeMisra be ra repugu na bemɛn ko yɛn ê ra yol, hwak na mumwɛ, mwât vwara na mwât vwara mɛ, repomo na repomo, segwɔm na segwɔm,

³ko gabîk BeMisra hê nusu yi e ji mɛn, ko mê suk pyɛ́ de yɛn e yong, yɛn ê vos badu na cī na begabîk bevuvwel, na bevwoshon tanga vê begabik beves.

⁴Mê nára BeMisra e vwɔ̂ dalɔ vwes, Gbɔng gwɔ̀m vwes ê re negwɔm e ra yɛn, Darwey Dagwi Darwey, Dâ Jey Mwa a ye ano.

⁵Nshî Gwɔrɔt Nil nê ye jɔng, ko gwɔrɔt o gwô tele e nedem nehak ko nehak ne hworok.

⁶Gwòng nshi de yɛn a yong bê ro nesang hwoolol, ko nelang gwɔrɔt o nê tɛ́ ɛn nesɛl o, ne hworok, sere na sɔ̂ng rɔt bê bɔsɔ.

⁷Nekwɔn nehak e bakwogôm gwɔrɔt o nê sè hal sana pyɛ́, e bahagât gwɔrɔt o mwa, ko kayɛ pyɛ de ba tus e bakwogom o yê hworok, gul gwô gangas yɛ, ko ye to sè wɛt.

⁸Bemât vôs betɔk bê ra sesin, mwa vemo de be nása begúk mɛn e gwɔrɔt o bê lashe yey, ko vemo de be shara bagun e ra nshi mo ê yang ɛn jwɛɛnɛn.

⁹Bemât fwôm shwey ê sè a yɛn waa ko vê tabâs shwey o na vê nekwɔn lɔk bê gyɔrɔs.

¹⁰Bemat lɔkɔs berugu ê yang ɛn yɔɔt, ko mwa vê râ fwôm byɛ, be lashe yey.

¹¹Bemât fwôm gwɔ̀m Zowan ba sé betɔn tyɔng wɛt, bemât vôs badu Farawo de ba sé tsɛng-tsɛng be vos badu baves. Yi e rɛ̌ de hwô yâng Farawo, “Ma sé hwak e ji vê tɔ́k tyɔng wɛt, wo yerê begwɔ̀m raane ɛ?”

¹²Bemat min vê tɔ́k tyɔng wɛt o ba sé e gwa a remo ɛ? Tik na yɛn a ha a hwo, na hwo dura pyɛ de Dagwi Darwey, Dâ Jey Mwa a ga yong e ra Misra.

¹³Bemât fwôm gwɔ̀m Zowan ba ga tɛ́ ɛn betɔn, ko bemât fwôm gwɔ̀m Mɛmfis ba ga kwɛlɛng hɛn, vemo de ba sé bedâ yere mo, ba ga tɛ̀ Misra wo vuru gwong.

¹⁴Dagwi Darwey a ga shushu hɛn na gabîk súk ɛn, ko yɛn a ga tɛ̀ Misra wo tē tàrak e kayɛ pyɛ de wó ra, sede mwât sefeng e tē tarak e ra hwɔs.

¹⁵Vit à pyɛ de hwak e Misra ê tɔk ra, kɛ a sé rwey kɛ swɛl ayi.

¹⁶E jeng o, BeMisra bê sè sede beha, ko bê vow na bengyip e nuyêl vwɔ de Dagwi Darwey, Dâ Jey Mwa ê nára e ra yɛn.

¹⁷Ko sevwêl Yuda sê sè a BeMisra mo pyɛ bengyip, kawɛ mwat de ba ha a yɛ hâ sɛ̀ ê wok bengyip yaga pyɛ de Dagwi Darwey, Dâ Jey Mwa a sé yong e ra yɛn.

¹⁸E jeng o, bê vɔk bapomo batungun e sevwêl Misra de be ha lêm Kanaan ko ba ga sira na be gyeng hâ Dagwi Darwey, Dâ Jey Mwa. Bê yila hak e ji vɛ à Repomô Gwi.

¹⁹E jeng o, bê vɔk ɛ̀ gàgbang rangas yas Dagwi Darwey e tê vwêl Misra, na swesek vɔk na Dagwi Darwey e yɛnɛ̂ hɛ.

²⁰Gwô sè pyɛ dura na ye nuha vɔk na Dagwi Darwey, Dâ Jey Mwa e vwêl Misra, jeng de yɛn a tosho á Dagwi Darwey yaga be tak a yɛn, ê tomo a yɛn na mwât sey ɛn, ko ê gyep ɛn, a sey ɛn arɔng.

²¹Dagwi Darwey ê tɛ̀ BeMisra be tɔk ɛ, ko yɛn ê tɔk ɛ e jeng o, yɛn ê re a yɛ fongol na nɔrɔ̂ rangâs yas, na hê rangâs yas burang, ko yɛn ê sisa hɛn na Dagwi Darwey, ko be sila sisa mo.

²²Dagwi Darwey ê fala Misra, ê fala ko a to tɛ̀ ɛn tyang, yɛn ê to toyo vey na Dagwi Darwey, ko ê wet betong na newon mɛn ko a tɛ̀ ɛn tyang.

²³E jeng o, bê vɔk gbɔng gwong yi e Misra vɔk e Asirya, ko WoAsirya ê vey e Misra, ko WoMisra ê wɔ e Asirya, ko BeMisra bê re fongol na vê Asirya.

²⁴E jeng o, Israyɛl wô sè wo netat tanga Misra na Asirya vê nerat e tê jey,

²⁵de Dagwi Darwey, Dâ Jey Mwa a tɛ̀ a yɛ nerat, a ye, “Vê yey pyɛng a BeMisra bemat hom, na BeAsirya fwôm vɔ hom tanga BeIsrayɛl pyɛ̂ nedanelɔ hom.”