Read berom Yɛshaya 2 Bible Online

Yɛshaya 2 - berom bible

Yɛshaya 2

¹Ha ma hemo de Yɛshaya Amotsi a sey e ji negwi-ywey e ra Yuda na Yɛrusalɛm,

²“Jeng yɛnɛ mo ye kyè vey, raku de ba lɔk ɛ̀ Gbɔng Duk Re Fongôl Dagwi Darwey, wô sé gak, wô dal bwang o mwa e rak o, wô nusu kyɛrɛng e ra bwang berahwol mwa, yére bemât jey mwa yê dɔng vɔk e wɛ.

³Ko yére bemat jey yê vey, ko yê ye: ‘Tik na wot a tút vɔk e rakû Dagwi Darwey, vɔk e Gbɔng Duk Re Fongôl Dagwî Israyɛl, na yɛ̀ a basa a wot begwong mɛ, na wot a bin kyè e ji vɛ̄.’ Yaga badu be yi e Siyɔn, ko hâ Dagwi Darwey yi e Yɛrusalɛm.

⁴Ê gas shɔt e tê yére bemât jey, ko ê tabak bemât jey vê gap. Yɛn ê hashe bewal mɛn be turu mɛ ròn ko bebara mɛn be turu mɛ bebǎ bwal. Yerê bemât jey yê sang to wɔ̂ como na cak wɛt, bê sang to masa râ como wɛt.”

⁵À yerê Yakɔp, tik na wot a kyè e ji negbêy Dagwi Darwey.

⁶À Dagwi, hwà ga ye waa à bemat mo yerê Yakɔp! Vwel o ha sila na ragas vyoshon yi e bavwêl Babilɔn na Filistya. Be raa negwɔn yere dyuk.

⁷Vwel mɛn ha sila na dyam pyɛng na dyam shinang tyɔng wɛt, ko pyɛ̂ nedanerey mɛn ya vɔk yɛnɛ wɛt. Vwel mɛn ha sila na bedwa tyɔng wɛt, ko bekyɛkyɛ̂ bedwa mɛn ba vɔk yɛnɛ wɛt.

⁸Vwel mɛn ha sila na cī, ko yɛn e re a pyɛ́ de yɛn a yong na vɔ mɛn fongol.

⁹Kawɛ mwat a tɛ̀ tó mɛ pyɛ byɛs, na pyɛ rekyen. Hwo hala a yɛn wɛt à Dagwi Darwey!

¹⁰Yɛn ê lɛsɛ hɛn e tara e berahwol de ba vɔk beta, kɛ be cing bavɔng e vwel na be jama gwông hywit ɛn yi e shôm Dagwi Darwey, na yɛn a lɛsɛ hɛn yi e reto na gbɔng nerat mɛ!

¹¹Tuk o ha sé kyè vey de bê yɛnɛ tôs batô bemasi, ko bê wey na dâk kaa mɛn arɔng. E bama mo, e Dagwi Darwey nju mɛ zɔng de bê nɔng ɛ nerey.

¹²E tuk o, Dagwi Darwey, Dâ Jey Mwa ê tɛ̀ kawɛ mwat de a vɔk reto sizɔng, na womo de e tos rato, tanga womo de e dak kaa a dyɛng to mɛ.

¹³Ê tɛ̀ vemo de ba sé sede batîn cɔ́gɔt sida Lɛbanɔn na mwa vemo de ba sé sede cɔ́gɔt ouk e vwêl Bashan be dyɛng to mɛn.

¹⁴E tɛ̀ beraku na berahwol belis be dyɛng to mɛn,

¹⁵ê tɛ̀ tyɔ̌n lyis tanga jwâ-pomô kahɛ kwɔ̂n dál be dyɛng to mɛn.

¹⁶E tɛ̀ bedwa-nshi de ba dal na nerey tanga nerât bɛrɛng be ye pyɔp.

¹⁷Tuk o he kyè vey de bê yɛnɛ tôs batô bemasi, ko be wey na dâk kaa mɛn arɔng. E bama mo, e Dagwi Darwey nju mɛ de bê nɔng ɛ nerey.

¹⁸Cī mwa yê to sɛ̀ wɛt.

¹⁹Bemat bê ba lɛsɛ hɛn e tara beta, kɛ be cing bavɔng e vwel na be jama gwông hywit ɛn yi e shôm Dagwi Darwey, na be lɛsɛ hɛn yi e reto na gbɔng nerat mɛ, jeng de e ba vey na a dugut jey.

²⁰Jeng de tuk o hê ba vey, yɛn ê ba bomos cī dyam shinang na dyam pyɛng de yɛn a ga kana yong, ko yɛn ê hala a bèpyam tanga berǎrit yɛ.

²¹Bemat bê ba lɛsɛ hɛn e bavɔng berahwol tanga e tara beraku, na yɛn a jama gwông hywit ɛn yi e shôm Dagwi Darwey, na be lɛsɛ hɛn yi e reto na gbɔng nerat mɛ jeng de e ba vey dugut jey.

²²Hwo tɛ̀ gap mo e ra mwasi wɛt. E hɛ̌ gap de a vɔk ɛ?