Read berom Yɛshaya 21 Bible Online

Yɛshaya 21 - berom bible

Yɛshaya 21

¹Ha siitit e ra hêy gbingiring e vwarâ gworep. Sede remo de wúla gwo kyě yishing pyɛ́ e gwông gwɛ e Nɛgɛf, gwó yi e vwêl gbingiring, yi e vwel de ha sé pyɛ bengyip.

²Ba dura a me pyɛ de ya sé vyes, mwât jugu e jugu, mwât wey na pyɛ́ e wey na yɛ. À Ɛlam, tut! À Medya, gwɔrɔ pomo mó na como! Mwa vôs yey de ha ga vey mɛ, ma ga tɛ̀ kwɔ̂k hɛ.

³Yaga ano jim hom ya sé pyep, me rus na royô yɛ sizɔng sede hwā e rus na jîm tɔ. Ma ga ye ngyuk, ano me wok ha wɛt. A sé a me kpɛɛ, ano me tɔk di wɛt.

⁴Báre hom he kyě doysa, neves o ne nɔngɔs me bengyip. Ma sɛt bayis hom e ra nawiri de jey ye kuyɛ, ko na ga tɛ́ ɛn a me jeng vôw rebek.

⁵Yɛn a ga yong kwɔ̂n rê pyɛ́, yɛn a ga shara beput, yɛn e re, yɛn e sɔ. Sogo hin, à bemât nuyêl como! Yong in beruga min na něy!

⁶Yaga Darwey a yang me ngan: “Ci, wɔ̀ tɛ̀ mwât nekanang, tik na a ha pyɛ de e bɛrɛng.

⁷Sede a di bemat comô bedwa, bemat bibeba e ra bedwa, bemat e ra bemadung, bemat e ra bemaryat, tik na a wet betong naka, a tɛ̀ nehywɛ mɛ naka tyɔng wɛt.”

⁸Ano mwât nekanang o e moklo, a ye, “À Darwey, me tumal e ra tyɔ̌n nekanang kayɛ jeng nagwi, me nàra e kwɔ̂n fwom hom mwa turuk.

⁹Di, á vane vey pom, bemât comô bedwa, bemat bibeba e ra bedwa!” Ko a toyo mɛ̀, a ye: “Wà ga gaba, Babilɔn wa ga gaba! Mwa na pyɛ́ de ba yong yê bedagwi mɛ a ga shara yɛ tɔ̌l e vwel.”

¹⁰Áa, à hwo de ma ga dak sede pyɛ̂ yeneng, ko ma ga wolom, pyɛ de ma ga wok na Dagwi Darwey, Dâ Jey Mwa, Dagwi wo Israyɛl, e yɛ̀ de ma sé ha a hwo.

¹¹Ha siitit e ra Duma. Mwat hwak a sé yila me yi e Seyir, e tē: “À mwât nekanang, túruk o ha sé e rɛ? À mwât nekanang, túruk o ha sé e rɛ?”

¹²Mwât nekanang a ye: “Nagasi ne kyè vey, ano naturuk arɔng. Ka sede hwô simo to rangal, ra ano, to toyo.”

¹³Ha siitit e ra Arabya. À yin bagyɛng bemât kwɛngɛl BeDedan, yin ê ye ngyɔk e hêy gbingiring hê tyɛl.

¹⁴À yin bemât sangal e vwêl Tema Sey in vê tele yi e vwel mɛn de ba vɔk yêy hwɔshɔ na nshi, man in na yɛn na kpam-tuk.

¹⁵Yaga yɛn a tele yi e bewâl como, yi e bewal de ba ga hwɔlɔ vɛ, yi e begbang de bê tā, tanga yi na fês como.

¹⁶Yaga Darwey a yang me ngan: “E ji shey hining, sede remo de mwât fwôm byɛ e bara neshey, mwa gbɔng nerât Kedar nê tala hɛn,

¹⁷ko bwang begbang bemât comô Kedar bê tɛt ɛ tyɔng zɔng. Yaga e Dagwi Darwey, Dagwi wo Israyɛl, a ha ano.”