Read berom Yɛshaya 22 Bible Online

Yɛshaya 22 - berom bible

Yɛshaya 22

¹Ha siitit e ra nɛk negwi-ywey. E sɛ́ de yin e bare de yin a tút mwa hin, e raduk,

²yin de yin e ta lwɛ́lɛ, gbɔng repomo de re gbɔ, repomo de re wàshey ɛ? Ba mɔbɔs bavîn bemat min na wal wɛt, ba kushu e como wɛt.

³Begwɔ̀m min mwa ba ga tele, ba vos ɛn sana ra fwom na begbang. Mwa hin de ba sɛ̀ in, ba ga vos in, mwa ano de yɛn a ga kana tele yikyik.

⁴Yaga ano ma ye: “Doyo hin bayis min yi na me, tik in me tosho na nemwishil tyɔng wɛt, yin jama wɔrɔk me yaga wey na bemât yey hom wɛt.

⁵Yaga Darwey Dagwi Darwey, Dâ Jey Mwa a vɔk tûk rewɔng, na fɔnɔ̂t bemat tanga nekpɛɛ e nɛk negwi-ywey, tûk gangâs varâ duk, tanga dâk kun vɔk e beraku.

⁶BeElam ba vɔk bezìng ket, na bekyɛkyɛ bedwa tanga bemât bedwa, ko BeKir ba vibis beruga.

⁷Benɛk de ba dal na nerat ba sila na bekyɛkyɛ bedwa, ko bemât bedwa ba tumal e rwi repomo.

⁸Dagwi a ga wunta pyɛ bangâ Yuda.” E jeng o, hwà ngyɛgɛt pyɛ̂ como yê Lɔ̂ Rehwot,

⁹ko hwà di bavɔng pyak e gbɔng repomô Davit, ko hwà vɛ nshî dideng wò batin.

¹⁰Hwà basa nelɔ Yɛrusalɛm ko hwà gangas nehak na be gwɛ̌ a jwâ-pomo mo gap.

¹¹Hwà yong kwɔ̂n tulâ nshi e tê bejwâ-pomo beba mo yaga nshî dideng roso. Ko hwà bɛrɛng a mwat de a ra fwom o, kɛ hwo vɔk bare e ra mwat de a yong pyɛ mo yimo raane wɛt.

¹²E jeng o Darwey Dagwi Darwey, Dâ Jey Mwa a yila na be tosho, na be ra sesin, na be wula bato, na be tɛ̀ berugû sesin,

¹³ko ba ra yey pyɛng na nzem e negya, ba yɛt behywarak na tyimit, ba re banama na sɔ̂ nshî anap, ba tē: “Tik na wot re wot sɔ, yaga nahwol wot ê kushu.”

¹⁴Dagwi Darwey, Dâ Jey Mwa a ga dura tó mɛ wɛshɛrɛk e betong hom, a ye: “Mwin bê hala a yin buru hemo wɛt sɛ̌ yin a kushu.” Darwey Dagwi Darwey, Dâ Jey Mwa a ha ano.

¹⁵Darwey Dagwi Darwey, Dâ Jey Mwa a ye ngan: “Vey, wɔ na mwât fwôm lɔ womo, vɔk na Shɛbna, de e bɛrɛng lɔ mó, na hwo yang ɛ:

¹⁶‘Retô sɛ́ de hwà vɔk e ngamo ɛ? Beva à cáng mo e ngamo de hwà ga kas a tó mo sak e ngamo, hwà ga kas sak e ji beta e rak o, na hwo yong a tó mo kwɔ̂n sangal e ji gwofwa ɛ?

¹⁷Dagwi Darwey a sé kyè wɔ̀ barak hwo e jey na gap, à mwat hom. Ê kaba hwo kpá,

¹⁸a vigim hwo pyak, ko a bomo hwo sede púnung vɔk e vwel tes, e hwomo hwô ku, ko e hwomo arɔng bekyɛkyɛ̂ bedwa mo berat o bê wey arɔng, à hwo de hwà sé pyɛ byɛs e lɔ dalɔ mo!

¹⁹Mê gang o na retek yi e kwɔ̂n fwom mo, ko bê pat o yi e fwom mo.

²⁰“ ‘E jeng o mê yila mwât fwom hom Ɛliyakim Hilkiya,

²¹ko mê tɛ̀ a yɛ rugû fwom mo, na me rɔgɔs hɛ na gyindi mo, na me nára a yɛ retô fwom mo, ko yɛ a rɔda sè dâ bemât sangal e Yɛrusalɛm, na e ra lɔ Yuda.

²²Mê nɔ́ng ɛ vɔ̂k makwilî lɔ Davit e ragey mɛ, ê wunta ko vit a mwat de ê bang, ê bang ko vit à mwat de ê wunta.

²³Mê man ɛ́ sede kwagam e kwɔn de wô sè ɛ gak, ko yɛ ê sè sede gwofwa negwɔm gwo nerey e lɔ̂ yere mɛ.

²⁴Ko yɛn ê tɛ̀ e rafwɔ mɛ mwa nedirik lɔ̂ yere mɛ, na nèy mɛ mwa, na kakɛ keshi, yi e bekwɔ̂p vɔk e pyɛ̂ bangas neshǐ.

²⁵E jeng o, Dagwi Darwey, Dâ Jey Mwa a ye, kwagam de ba tɛs wɛ e kwɔn de wô sè gak wô nusu hɛ, bê tow wɛ, wô gaba, ko pyɛ̂ dirik de yá kana sè e ra wɛ yê wey, yaga Dagwi Darwey a ha ano.’ ”