Read berom Yɛshaya 23 Bible Online

Yɛshaya 23 - berom bible

Yɛshaya 23

¹Dak in sekun! À yin bedwa-nshî Tarshish, yaga ba ga wey na nekwɔn dál min. Jeng de yɛn a vey yi e Kipirus, yɛn a wok ha mó.

²Sè in tin, à yin bemât sangal e kwogom. À yin bejik Sidɔn, betom min ba ga ye dɔ à gworep,

³ko yɛn a sé e gwogbɔng gworep. Dyâm yel min yɛ a pyɛ̂ yenêng Shihor, bwâl Gwɔrɔt Nil, yin vɛ a bejik yére bemât jey.

⁴Vo rekyen, à Sidɔn, yaga gworep gwa ga hanat, kwɔ̂n dâl gworep ha ye: “Ma ga rus tɔ́ kɛ ma ga tɔ wɛt, ma ga ras bewen kɛ behwong wɛt.”

⁵Jeng de há mo hê wul Misra, yey mɛn yê lɔl e ra rehâ Tur.

⁶Yē in dɔ vɔk e Tarshish — dak in sekun, à yin bemât sangal e kwogom!

⁷Gbɔng repomo min á hemo de há sè e ji yey pyɛng sizɔng, de há susu yimo raane, de há kyè na bol hɛ wɔ̀ sangal yikyik arɛt?

⁸E wa de á yong pyɛ́ yemo e ra Tur, de wá nɔngɔs bekpîn negwɔm, de bejik wɛ̀ bá sè bemât fwôm gwɔ̀m, de bemât byɛ̂ wɛ bá sè vemo de bá nɔ́ng ɛn nerey e jey arɛt?

⁹Dagwi Darwey, Dâ Jey Mwa de a yong ano — na a tɛ̀ kaà gbɔng nerat mwa ligis, na a nɔ̂ng mwa vê nerêy jey rekyen.

¹⁰Yē in dɔ vɔk e vwel min, à yin bedwa-nshî Tarshish, ngamo ê to se kwɔ̂n pɔngɔ̂ bedwa-nshi wɛt.

¹¹Dagwi Darwey a ga nára vwɔ mɛ e ra gworep, a ga digis segwɔm detidetu. A ga nɔng nu e ra Kanaan na a wey na nekwɔn dâl wɛ.

¹²A ye: Yin ê to vɔk yey pyɛng sizɔng wɛt, à yin behwông Sidɔn de be tak a yin, sogo hin, yē in dɔ vɔk e Kipirus — ko e hwomo mwa yin ê sɛ̀ pɔngɔ wɛt.

¹³Di in vwêl BeBabilɔn! E yɛn a bemat o, e BeAsirya wɛt. Yɛn a yong ɛ̀ na Tur wo sè kwɔ̂n ngyāma. Yɛn a lɔk tyɔ̌n bâng repomo mo, ko ba gangas nelɔ negwɔm o, ba tɛ̀ nɛ ne tɛ́ ɛ barin.

¹⁴Dak in sekun, à yin bedwa-nshî Tarshish, yaga ba ga wey na nekwɔn dál min.

¹⁵Yi e tuk hane, ba rɔda ye bam a Tur neshey kuru bataama, neshey rôs gwɔ̀m gwining. E yɛnɛ̂ neshey o, ê té na Tur sede e lwɛ̄lɛ devwes gwomo:

¹⁶“Jut yom, kyě kyè e gbɔng repomo, a hwo devwes de ba ga ye bam a hwo! Rá lwɛ̄lɛ de gwa tá, rá lɛlɛ pyak, yaga na be bare na hwo.”

¹⁷E yɛnɛ̂ neshey kuru bataama mo, Dagwi Darwey ê to wɔ́ e Tur, ko wô to toyo e de byɛ̂ wɛ, ko wô to re nuyel na nedeneves wɛ̀ na mwa segwɔm de sa sé e jey o mwa.

¹⁸Pyɛ̂ nejik wɛ na dyām de be talsâ wɛ bê nára a Dagwi Darwey yɛ, pyɔlɔ̂ wɛ bê bang yɛ kɛ bê sǎ e de tula mo wɛt, ko pyɛ̂ nejik wɛ yê nɔngɔs pyɛ̂ re shɛrɛk, na berugu berat, yaga mwa vemo de be ra a Dagwi Darwey fwom.