Read berom Yɛshaya 24 Bible Online

Yɛshaya 24 - berom bible

Yɛshaya 24

¹Di in, a remo Dagwi Darwey a sé kyè wɔ̀ bugut jey o na a hala yɛ hal, ê kyě tsip ra rak yɛ ko a shara bemât sangal e yɛ.

²Ko ê sè ano na bemat o, na bepiris, na besam, tyɛng na beda nelɔ mo, na behwông fwom, tyɛng na beneng o, na bemât serês pyɛ́, tyɛng na bemât rɛsɛl o, na bemat nɔngɔ̂s hwɔpɔ, tyɛng na bemât serês hwɔpɔ mo, na bemat nɔngɔ̂s badu, tyɛng na bemât serês badu mo.

³Bê bugut jey o mwa vit, ko bê jugu yɛ hywiri, yaga e Dagwi Darwey de a ha ha hemo.

⁴Vwel hê ra sesin ko he hworok, jey yê tē nɔɔshɔsh ko ye hworok, belagwi bê wey mwa na berahwôl vwel o.

⁵Vwel o hê tɛ́ ɛ ligis yi na bemât sangal e hɛ, yaga yɛn a ga gyili badu Dagwi, ba tik sana gyeng nu mɛ, ba kwɔrɔ wuna-na-sira hê nesheneshey.

⁶Yaga ano gawey ha sé re vwel, ko bemât sangal e yɛ be re yɔ́m yaga buru mɛn, yaga ano bemât sangal e jey o ba ga gyɔrɔs, bwang mɛn tyɔng zɔng de ba pɔl.

⁷Nshî anap na ga tala hɛn, batîn anap ba ga tē nɔɔshɔsh, mwa vê feng na nɛ be vos yey.

⁸Wûs bebing yey pyɛng ha ga ye yuu, lwɛ́lɛ vê feng gwa ga tɛ́ ɛ vit, wûs yòm ha ga tumal.

⁹Bé to sɔ nshî anap na râ lwɛ̄lɛ wɛt; siring wa ga tɛ́ ɛ a vê sɔ̂ wɛ kpashak.

¹⁰Gbɔng repomo de ra sé kpɛɛ ra ga gabsa vit, ba ga bang kahɛ lɔ na mwat a tɔk yel ɛ wɛt.

¹¹Bemat be dak kun e nehyok yaga vit a nshî anap, mwa shɛgɛsh ha ga wɛrɛ vit sede nawiri, mwa yey pyɛ̂ng jey ya ga wɛrɛ yuu sede e ji sesam.

¹²Ba ga hala gbɔng repomo hal, ba ga kwɔrɔ ri ruhup o.

¹³Yaga ê sè ano e vwel o na e tê yére bemât jey, sede jeng de ba ga dak tîn regwi, sede jeng nemɔ sede jeng de ba ga yɛnɛ vôs nèy anap.

¹⁴Yɛn a ra lɛlɛ̂ yey pyɛng na gap, yɛn a gbɔ yi e rwa ta e ra gbɔng nerey Dagwi Darwey.

¹⁵Yaga ano e rwa rak, nɔng în Dagwi Darwey gbɔng nerat, e bakwogôm gworep, nɔng în rezâ Dagwi Darwey, Dagwî Israyɛl gbɔng nerat.

¹⁶Yi e neyɛnɛ̂ vwel wot e wok lɛlɛ̂ somo, vè gbɔng nerat vɔk na WoCik. Ko ma ye, ma sé tɛ́ me gbɛrɛk, ma sé tɛ́ me gbɛrɛk. Gawey e ra me! Yaga vê kwɛlɛng be kwɛlɛng na neves, be re nuyel na kwɛlɛng na neves.

¹⁷Bengyip beves, na revɔng tanga segun ba sé e ra yin, a bemât sangal e vwel o!

¹⁸Kawɛ de a tele ras de a wok lwɛ́lɛ bengyip o, ê gaba e ji revɔng o, ko kawɛ de a nusu yi e revɔng o bê vo ɛ́ e ji segun o. Yaga bapɔk lagwi ba sé pyot, ko batîs vwel o be vow.

¹⁹Ba ga shara vwel o vit, ba ga hama hɛ mwa, ba ga dugut vwel o na gap.

²⁰Vwel o he tē tàrak sede mwât sefeng, he kyé rɛ̌ sede buk. Burû hɛ ha sé dirik e ra hɛ, hê gaba, ko hê to sogo wɛt.

²¹E jeng o, Dagwi Darwey ê tabak regyɛng lagwi e lagwi, ko e vwel begwɔ̀m vwel o.

²²Bê tula hɛn e dem hining sede bemât ngyang e revɔng, bê bang ɛn e lɔ̂ ngyang, ko e bamâ nepɔlɔ pyak bê tabak hɛn.

²³Pwɛl gwô tɛ́ ɛ pyɛ byɛs, ko gwi gwô vo rekyen, yaga Dagwi Darwey, Dâ Jey Mwa ê re negwɔm e ra Raku Siyɔn na e Yɛrusalɛm, ko e nuyêl bemakuk mɛ ê dura gbɔng nerat mɛ.