Read berom Yɛshaya 25 Bible Online

Yɛshaya 25 - berom bible

Yɛshaya 25

¹À Dagwi Darwey, hwo wɛ̀ a Dagwi hom, Mê nɔng o nerey, mê somo reza mo, yaga hwà ga ra pyɛ̂ langat, pyɛ́ de hwá yong raane, na tsak o na negāk.

²Hwà ga tɛ̀ gbɔng repomo re tɛ́ ɛ regwɔt, ko repomô dál barin, lɔ̂ negwɔm yére dyuk ha to sé gbɔng repomo wɛt, bê sang to lɔk rɛ wɛt.

³Yaga ano bemât gap bê nɔng o nerat, bagbɔng bapomô yére bemât jey de ya vɔk nemwishish wɛt yê wok bengyip mo.

⁴Yaga hwà sé kwɔ̂n lɛrɛ̂ bepɛng, kwɔ̂n lɛrɛ̂ vemo de be jama pyɛ́ zii e ji rezot mɛn, bûk ye ngyɔk yi e gûl rwak na necam yi e nefɔɔ. Yaga nesong vê nemwishish wɛt na sé sede gûl rwâk nabolos,

⁵ko lwɛ́lɛ yére dyuk gwa sé sede nefɔɔ e dem hwogot, hwà tɛ́t nefɔɔ mo na necam bale, lwɛlɛ̂ vê nemwishish wɛt gwa ye yuu.

⁶E ra raku womo Dagwi Darwey, Dâ Jey Mwa ê yong a yére bemat mwa nzem pyɛ̂ re ryat, nzem nshî anap de na ga ros naka, ne pyɛ̂ re ryat de ya vɔk sɔrɔng bekup sɔ̀ksɔk, ne nshî anap de na ga ros naka de ba ga tɛrɛ nɛ gwiiri.

⁷E ra raku womo ê hama kerugû bemât sesin de kà bang yére bemat mwa, kerugu de ba shara kɛ e ra mwa yére bemât jey.

⁸Ê wey na reku neshey gbak-gbak, ko Darwey Dagwi Darwey ê yishing nemwishil yi e mwâ bayis. Ê pat yi e mwa jey dusâ bemat mɛ. Dagwi Darwey a ha ano.

⁹E jeng o bê ye: “Di, Dagwi mot à womo, wot a ga gyeng ɛ yaga na a sey ot. Dagwi Darwey à womo de wot a ga gyeng ɛ, tik na wot vɔk yey pyɛng de a ga sey ot.

¹⁰Yaga vwɔ̂ Dagwi Darwey gwô sǎ e ra raku womo, ko bê bɔrɔs BeMowap e kwɔn mɛn sede be bɔrɔs cugul e vɔng beving.

¹¹Mwa ano de yɛn ê nása vɔ mɛn e tê pyɛ́ yemo, sede bemât sefwa be nása vɔ mɛn e de sefwa, kaa mɛn hê gaba mwa na sekwɛl nása vɔ mɛn o.

¹²Ê gangas bejwâ-pomô BeMowap de ba lɔk vɛ e rak o na be gyep ɛn, ê gangas vɛ e vwel na be sè tyɛng na fongôl vwel.”