Read berom Yɛshaya 26 Bible Online

Yɛshaya 26 - berom bible

Yɛshaya 26

¹E jeng o vemo de ba sé e vwêl Yuda bê ra lwɛlɛ gwomo: Gbɔng repomo mot ra vɔk gap! Sêy nekên yi na Dagwi hê dal jwâ-pomo wo gap.

²Wuma hin ri ruhup o! Tík in yerê bemat jey ye raà Dagwi na tsak o ye yel!

³Vemo de barê yey mɛn ha sé tiing, hwo Dagwi hwô gyeng ɛn e ji yêy dyɛngɛ yêy dyɛngɛ yaga yɛn a tɛ̀ gap mɛn e ra hwo.

⁴Tɛ̀ in gap min e ra Dagwi Darwey nesheneshey, yaga Dagwi Darwey a sé gwofwa gbak-gbak.

⁵A ga gang vemo de ba sangal e repomô dál mɛn, repomô rê rak o de be tɔk wul rɛ wɛt. A ga gangas rɛ vey e vwel, ko ra gaba e fongol.

⁶Bé bɔrɔs rɛ na bol, bol vemo de ba ga tak a yɛn, na vè bepɛng.

⁷Gwông vê cik gwa sé rwat. Hwo, wo nerat hwà tɛ̀ gwông vemo de ba sé cik gwo sè hyuulul.

⁸Wot e raa gwông shɔt mo, À Dagwi Darwey, wot a sɛt bayis mot e ra hwo, Reza mo, na báre mot na hwo zɔng de yey mot ye simo.

⁹Naturuk yey hom ye lingsit vey na hwo, gabik hom e ji hom he jama hwo sizɔng. Yaga jeng de hwà nɔ̂ng jey badu mo, bemât sangal e ji yɛ be masa necik.

¹⁰Hwó ra a mwa bemat beves pyɛ́ ryat, ko yɛn a ga masa necik wɛt. E vwel de be ra pyɛ́ na necik, ko yɛn e ragas pyɛ́ na tsak o wɛt, yɛn e di gbɔng nerêy Dagwi Darwey wɛt.

¹¹À Dagwi Darwey, hwà ga nára vwɔ̂ wɛng mo ko yɛn a di gwɛ wɛt. Tik na yɛn a di tɛ̂ yey mo na bemat mo, na yɛn a vo rekyen. Tik na kyâ repugu mo he re ɛn.

¹²À Dagwi Darwey, hwô nɔng ot yêy dyɛngɛ, kayɛ pyɛ ryat de wot a vɔk ya yi na hwo.

¹³À Dagwi Darwey, Dagwi mot, bedaberey beduk ba ga re negwɔm e ra wot, ko a remo wot ê yila reza mo nju rɛ.

¹⁴Bavin be to vɔk neken wɛt, bazina mɛn be to sogo wɛt. Hwà ga tabak hɛn, ko hwo wey na yɛn, hwà ga fugut bare na yɛn.

¹⁵À Dagwi Darwey, hwà ga gwɛ̌ nerêy yere bemât jey mot, hwà ga gwɛ̌ nerêy yere bemât jey mot na ne gwɛ̌ gbɔng nerat mo, hwà ga gwɛ̌ netês yɛnɛ̂ sevwel o.

¹⁶À Dagwi Darwey, yɛn a doyo vey na hwo e jeng rezot mɛn, yɛn a nɔng bato mɛn e de won jeng de hwà sé tabak hɛn.

¹⁷Sede hwâ jim de e ririm, e tosho na jîm tɔ, ano de wot á sè e vɔ mo, à Dagwi Darwey.

¹⁸Wot á vɔk jîm tɔ, wot á ririm, ko wot á tɔ gul. Wot a ga di wɛng hak wɛt, wot a ga gang begwɔ̀m behak wɛt.

¹⁹À bemat hom, bemat min de ba ga kushu bê to sè beken, bavin mɛn bê sogo. À yin vê sangal e fongol, sene hin na yin ra lwɛlɛ̂ yey pyɛng! Sede remo de mwɛngɛ de gwo nɛp gwo gaba e ra sɔng, ano de yin ê tɛ̀ mwɛngɛ de gwo nɔng neken gwo gaba e ra vemo de ba ga kushu.

²⁰Vey in à bemat hom, yel in e beduk ji mo min, ko bang in ri duk o. Lɛsɛ hin e hwomo yaga jeng tyɔng sɛ̌ shôm Dagwi Darwey ya ga kwey.

²¹Di in, Dagwi Darwey ê nusu yi e kwɔn mɛ na a tabak bemât jey yaga neves mɛn. Vwel hê dura nemi de ba lusha e ra hɛ, hê to bang vemo de ba ga mɔbɔs wɛt.