Read berom Yɛshaya 27 Bible Online

Yɛshaya 27 - berom bible

Yɛshaya 27

¹E jeng o Dagwi Darwey ê jut wal mɛ de wa sé vwes, rwey o, wò gap, ê tabak mɛ Gwalwel, gwogwɔ̀m ji gworep de gwa tsip ɛ ko gwó kyě mirik hɛ.

²E jeng o: Ra lwɛlɛ e ra bwî anap rwat.

³Me, Dagwi Darwey me bɛrɛng gwɛ, me tɛ̀sɛ a gwɛ nshi kayɛ jeng. Me gyeng gwɛ nagwi na naturuk na mwat hwak a mǎ gwɛ wɛt.

⁴Ma lashe yey na gwɛ wɛt. Ko ka gwa nɔng me rɔgɔ na shik, mê wɔ̀ hwo gwɛ na como, mê dak kya e gwɛ.

⁵Tik gwo man ɛ́ na me na me gyep gwɛ! Tik gwo gang-nshi na me, na gwo sangal tyang na me!

⁶E jeng o, yerê Israyɛl yê sè sede tîn cɔgɔt ryat, yê tɛ̀ berinis, yê túruk, yê tá cúyu, ko yê sila jey mwa na nèy.

⁷A ga tow bemat mɛ sede remo de a tow vemo de ba tow ɛn a? Kɛ a ga mɔbɔs bemat mɛ sede remo de a mɔbɔs vemo de ba mɔbɔs hɛn a?

⁸Dagwi Darwey a tabak bemat mɛ na neves, na sesam. A paa ɛn sede na gûl rak de gwa fes ding-ding.

⁹Ano BeIsrayɛl bê fugut banɛn mɛn, pyɔlɔ̂ halâ pyɛ́ vyes mɛn à yemo: bê hwongo beta begagbang nása nenɔrɔ̂ yas be tɛ́ ɛn fongol, bê to tik sesêk Ashera na gàgbang rangâs pyɛ̂ nesang hyɔɔlɔl e tumal wɛt.

¹⁰Ba ga hala gbɔng repomô dál, ba ga tik nelɔ mɛn barin sede hêy gbingiring, berɔndɔng be re ɛ̀ sehwey, be dyɛngɛs ɛ̀, be wey na nelang cɔ́gɔt o.

¹¹Jeng de nelang o na ga hworok, ne kwɔrɔs hɛn, beha be vɛ́sɛ mɛ cɔ́gɔt kya. Bemat vemo ba tɔk pyɛ cak wɛt, yaga ano, womo de a yong ɛn e wok nemwishish mɛn wɛt.

¹²E jeng o Dagwi Darwey ê dak bemat mwa sede pyɛ̂ yeneng yi e Gwɔrɔt Ɛifaratɛs vɔk e Nɛk Misra, na a tula hin bemat mɛ vivining sede yére.

¹³E jeng o, bê pɛl durum rɛng-rɛng ko vemo de ba ro ɛn vɔk e vwêl Asirya, na vemo de ba ro ɛn vɔk e vwêl Misra bê vey re a Dagwi Darwey fongol e raku wo jɛrɛ e Yɛrusalɛm.