Read berom Yɛshaya 28 Bible Online

Yɛshaya 28 - berom bible

Yɛshaya 28

¹Gawey e ra bemât sefeng Israyɛl, de be dak kaa na kpîn jamuk wo gbɔng nerat de wo tē zùt, vemo de ba mɔsɔ na pyɛ́ ryat, na vemo de be feng nshî anap.

²Di in, Darwey a sé tomo gbɔng mwat wo gap hwak, a sé sede gûl rwâk fwala, wúla de wó wey na kayɛ pyɛ, sede gworwak de gwó tɛ̀ tɛmɛ-nshi, yi na vwɔ mɛ ê gangas hɛn e vwel.

³Bê bɔrɔs kpîn jamuk mɛn na bol, bemât sefeng Israyɛl de be dak kaa na wɛ.

⁴Ko kpîn jamuk wo gbɔng nerat e batô vê mɔsɔ wô yē zùt wô sè sede nèy regwi de ne tanga vel nahywɛp, kawɛ mwat de a di nɛ, e re nɛ ras de a ga vos nɛ e vwɔ.

⁵E Jeng o Dagwi Darwey, Dâ Jey Mwa ê ba sè kpîn jamuk wo gbɔng nerat, ê ba sè rwat e tɔrɔ̂ bwang bemat mɛ.

⁶Yɛ ê sè gabîk gas badu e tē yaga vemo de be ra shɔt, ko ê sè gap yaga vemo de be dul bemât como e ruhûp repomo.

⁷Behak arɔng be feng na nshî anap ko be tē tàrak na siring, bepiris na bezarap mɛ be feng siring, he tɛ̀ yɛn a ha kpɛɛ, yɛn e tē tàrak, he tɛ̀ yɛn a bɛɛ pyɛ́ kpɛɛ, yɛn e buru e de yɛ̂t shɔt.

⁸Mwa kwɔ̂n sɔ mo ha ga sila na hwɔs, vit à kwɔn de ha sé hal.

⁹“Yɛn ê basa a beva tɔ́k ɛ? Yɛn ê misang a beva há ɛ? Yɛn ê há a nèy de ba mɛsɛng kang nɛ a? Yɛn ê basa a nemo de ba sé tùt a nɛ nevasal a?

¹⁰A sé jama na a basa a wot, tîn jɛk, tin jɛk, gwong jɛk, gwong jɛk, regâp jɛk, regâp jɛk” vit à to.

¹¹Yaga ano, Dagwi Darwey ê ha na bemat mɛ, na lêm yére dyuk yi e vwêl yikyik.

¹²A ga yang ɛn: “Pɔngɔ à hemo, nɔng in vemo de ba sé gbɛrɛk pɔngɔ. Sangâl yêy dyɛngɛ à hemo”, ko yin a kyɛ́ in nà wok.

¹³Yaga ano, hâ Dagwi Darwey hê sè a yɛn, “Tin jɛk, tîn jɛk, gwong, gwong, gap, gap” vit à to, yaga na yɛn a gabsa na bama, be kwɔrɔs bekup mɛn, bê wɔ̀ rɔnɔ hɛn, be vos ɛn besam.

¹⁴Yaga ano, wok in hâ Dagwi Darwey, à yin bemât kaa, yin de yin e re negwɔm e ra bemat vemo e Yɛrusalɛm.

¹⁵Yin a ga ye, “Wot a ga wuna hot na sira na reku, wot a ga ra gafiri na kwɔ̂n bevuvwel. Jeng de gawey ha sé kwey, hê wul ot wɛt, yaga bɔs hɛ à kwɔ̂n dál mot, ko kwɛlɛng hɛ de hê lɛrɛ hot.”

¹⁶Yaga ano, Darwey Dagwi Darwey a ye: Di in, ma sé bomo gwofwa retis e Siyɔn, ba ga mara gwɛ naka, gwa sé gwofwa to-kwɔng gworwat, gwo retîs nerat sizɔng. “Vemo de ba tɛ̀ gap e ra gwɛ, bê vɔ bengyip wɛt.”

¹⁷Mê tɛ̀ gas badu e tē he sè sede rwîk masa, ko necik ne sè sede nedirik o, rwâk fwala wô yishing kwɔ̂n dâl hɛ̂ retîs bɔs, ko tɛmɛ-nshi hê rung kwɔ̂n lɛrɛ hê retîs kwɛlɛng.

¹⁸Ano bê gang wuna-na-sira min na reku, ko gafiri min na kwɔ̂n bevuvwel hê tumal wɛt. Jeng de gawey hê sè kwey, ko hê gangas hin e vwel vit.

¹⁹Kayɛ jeng de ha sé gyiris, hê vos in yaga gasi e ra gasi tanga nagwi na naturuk bê kweres. Hê basa a yin ha de hê nɔngɔs hin bengyip.

²⁰Yaga gwat min gwa radɛ bwit na mwat a nàta hɛ ɛ, ko pyɛ banga min ya sé yɔ́lsɔng na a gunung hɛ mɛ.

²¹Dagwi Darwey ê sogo na shom sede á ra e Raku Pɛrazim, ê ra nu sede á ra e nɛk Gibɛyɔn, na a ra pyɛ yey mɛ — pyɛ bes na a ra fwom mɛ — fwom duk o!

²²Ko di, tik dâk kaa mo, ka ano wɛt bê gwɛ̌ rɔgɔs hwo na ngyang gak, yaga ma ga wok redu wéy na vwel o mwa yi na Darwey, Dagwi Darwey, Dâ Jey Mwa.

²³Wet betong, na hwo wok fwɔ hom, tɛ̀ nehywɛ, na hwo wok ha hom.

²⁴Womo de e how cap tûs pyɛ́ e sǎ e de how o a? E sǎ e de vugus na bugût cap o a?

²⁵Jeng de a ga tɛ̀ yɛ tas, e bere ɛ dyara lyu na shɔngɔl ko e tus alkama na baale e kwɔn mɛn, na dyarâ bàk e bato mo wɛt a?

²⁶A ga masa fwom o naka, Dagwi mɛ a ga basa a yɛ gwɛ.

²⁷Be dak dyara na gbɔng gwele wɛt! Be ngwɔgɔt shɔngɔl na kyɛkyɛ̂ rɔndɔng wɛt! Wey! Be rwagat dyara na cwang, be dak shɔngɔl na bīlik.

²⁸Be dak alkama yaga kpam-tuk, ko be sǎ e de dak o gbak-gbak wɛt, be ngwɔgɔt wɛ na kyɛkyɛ̂ rɔndɔng, ko be bunut mɛ wɛ wɛt.

²⁹Yemo ya sé nɔrɔ arɔng yi na Dagwi Darwey, Dâ Jey Mwa, e vos badu vê langat, ko netsitsɛng mɛ na sé nerat vit à yere mo.