Read berom Yɛshaya 29 Bible Online

Yɛshaya 29 - berom bible

Yɛshaya 29

¹Gawey e ra Ariyɛl, Ariyɛl repomo de Davit a ye ɛ ngyɔk! Tik na shey he raa shey, tik na nezap nzem ne re nuyel.

²Ko mê vey na rezot e ra Ariyɛl, bê tosho, be dak sekun, ko Yɛrusalɛm wô sè a me sede Ariyɛl, gàgbang rangâs yas.

³Ko sede Davit, mê hwo e ra hwo, mê rɔnɔ hwo na tyɔ̌n como, mê rɔnɔ jwâ-pomo mo na gwofongol yaga como.

⁴Ano hwô ha yi e hwomo e nɛ̂n vwel, neha mo nê nunus yi e búm, fwɔ mo gwô wus yi e vwel sede gwô wovuvwel ko batîn ha mo bê nunus shɛng-gɛt yi e búm.

⁵Ko regyɛng vê repugu mo rê sè pyak sede búm, ko regyɛng besuga mɛn rê vey sede byɛmɛ.

⁶Ko e ji jeng tyɔng, Dagwi Darwey, Dâ Jey Mwa, ê vey tabak hin, na gbara, na digîs jey, na rewɔng, na wula, na gûl rwak, na balêm kya de be wey na kayɛ pyɛ.

⁷Ko bagyɛng yére bemât jey mwa de ba tó como na Ariyɛl, mwa vemo de ba tó como na yɛ, na kwɔ̂n dal mɛ, ko be tɛ̀ a yɛ rezot, bê sè sede negwi — negwi-ywey ne naturuk.

⁸Sede remo de mwât vyong e ranas negwi rê pyɛ́ ko e sene na vyong o gbak, kɛ wo yêy hwɔshɔ de e ranas negwi sɔ̂ nshi, ko e sene gbɛrɛk, na yêy hwɔshɔ mo, ano de bagyɛng yére bemât jey mwa bê sè, de ba tó como na Raku Siyɔn.

⁹Tɛ́ in betɔn, tɛ́ in bebók, sede a jam a yin ano! Feng in, ko yi na nshî anap wɛt, tɛ̄ in tàrak, ko yi na siring wɛt!

¹⁰Yaga Dagwi Darwey a ga shushu hin na gabîk nevwa ding-ding. Bezarap Dagwi ba sé sede bayis min, bemât bɛrɛng ba sé sede bato min, ko Dagwi a ga bang bayis na bato mo.

¹¹Mwa pyɛ̂ dura yemo ya sé a hwo sede neha de ba man ne e ji bwok-basa. Ka sede ba nɔ̂ng mwat de a tɔk basa, ko be nɔng ɛ nu, “Basa womo”, ko ê ye, “Mê kyɛm wɛt, yaga ba man wɛ.”

¹²Ko ka sede ba nɔ̂ng womo de a tɔk basa wɛt, be yang ɛ, “Basa womo”, ê ye, “Ma tɔk basa wɛt.”

¹³Darwey a ye: Bemat vemo be vey bagat na me na hâ nu mɛn, ko be nɔng me nerey na bebɛrɛ̂k nu mɛn, ko neyey mɛn na sé yikyik na me, ko sâp Dagwi min ha sé yi na badu mwasi de yɛn a masa na rato zɔng.

¹⁴Yaga ano, mê to ra pyɛ̂ langat na bemat vemo, ê sè a yɛn yɔɔt, na pyɛ̂ bes, Netsitsɛ̂ng vê tsɛng-tsɛng mɛn nê wey, ko tɔ̂k pyɛ̂ vê tɔk mɛn hê bang ɛ.

¹⁵Gawey e ra vemo de be lɛrɛ a Dagwi Darwey pyɛ de yɛn e yong na be ra, vemo de tomong mɛn ba sé ve lwil, ko yɛn e tē, “Wà e bɛrɛng hot ɛ̀, wa a tɔk tomong mot ɛ?”

¹⁶Yin e doyo pyɛ́ gup! Bê bɛrɛng mwât lɔ̂k nerwey sede secwem a? Pyɛ de ba yong, yê yang mwât yong o, “Hwà yong me wɛt”, kɛ pyɛ mo ye yang da mo, “A tɔk pyɛ cak wɛt” a?

¹⁷E jeng tyɔng vwêl Lɛbanɔn hê tɛ́ ɛ hwiri de gwo marâ pyɛ́ pyak, ko hwiri mó gwô marâ pyɛ́ pyak de bê tang gwɛ à rehwot.

¹⁸E jeng o, bekpey bê wok neha bwok-basa, ko bebók bê nusu yi e newàa na nehywiinin mɛn ko bayis mɛn bê bɛrɛng jey.

¹⁹Vê dyɛ̂ng to bê sɛ̀ yey pyɛng pyas yi na Dagwi Darwey. Ko vemo de be jama pyɛ́ zii, bê ra biibi na WoJɛrɛ wo Israyɛl.

²⁰Yaga wo gap ves ê to sè wɛt, ko wo nengyas ê tala hɛ. Ko mwa vemo de ba ga yong ɛn na be ra neves bê ro ɛn.

²¹Vemo de be tɛ̀ mwat a re shɔt wɛt, vemo de be rene mwât yông hâ shɔt e ruhûp repomo, bê tɛ̀ be gang mwât cik na shɔt vit à tin.

²²Yaga ano Dagwi Darwey de a viri Abraham a yâng yerê Yakɔp ngan: “Yerê Yakɔp yê to vo rekyen wɛt, bwang bayis mɛ gwô to dura bengyip wɛt.

²³“Yaga jeng de ê to di nèy mɛ, fwôm vɔ hom, e lɔ na yɛ, ko yɛn ê tɛ̀ reza hom jɛrɛ. Yɛn ê tɛ̀ WoJɛrɛ wo Yakɔp jɛrɛ, ko yɛn ê sap Dagwi wo Israyɛl.

²⁴Ko vemo de gabik mɛn ha ga buru, bê vey tɔk pyɛ́, ko vemo de be gwɔrɔng, bê sey hâ basa.”