Read berom Yɛshaya 3 Bible Online

Yɛshaya 3 - berom bible

Yɛshaya 3

¹À remo Darwey Dagwi Darwey, Dâ Jey Mwa, a sé kyè wɔ̀ jut kayɛ pyɛ, na kawɛ mwat de bemât Yɛrusalɛm tanga BeYuda be tɛ̀ gap mɛn e ra yɛ. A sé kyè wɔ̀ jut pyɛ̂ re na nshî sɔ mɛn,

²kawɛ suga na kawɛ mwât como, kawɛ mwât shɔt na kawɛ zarap Dagwi, kawɛ mwât vyoshon na kawɛ mwakuk,

³Kawɛ mwât nuyêl como na kawɛ mwât nuyêl vwel, kawɛ mwât badu na kawɛ mwât vwoshon, tanga kawɛ mwât sekwit.

⁴Mê tɛ̀ bewen be sè bemat nuyel, ko nèy-vɔ ne re negwɔm e ra yɛn.

⁵Kawɛ mwat ê mɔt mumwɛ, kawɛ na mwât vwara mɛ arɔng. Bebôt bemat bê tak a bemakuk mɛn, ko bemât zɔng-reng bê tak a bemat de ba dal ɛn arɔng.

⁶Jeng ye kyè vey de bemât ruhup hwak bê kasa hwak e ji mɛn, be yang ɛ, “Nduga hwo hwà vɔk pyɛ de hwô tɛ̀, yaga ano, hwo sè mwât nuyêl gwɔ̂t fongol gwomo.”

⁷Ko mwat o ê toyo a yɛn, a ye, “Wey ow, me wɛt! Mê tɔk sɛlɛ hin wɛt. Ma vɔk pyɛ̂ re kɛ berugu wɛt. Yin tɛ̀ me sè mwât nuyel min wɛt!”

⁸Gawey ha ga hwo e ra Yɛrusalɛm, ko Yuda wa ga gaba! Kayɛ pyɛ de yɛn e ye, na yemo de yɛn e ra ya sé e ra Dagwi Darwey, yɛn e sogo a yɛ nehywɛ, mwa ano de a sé e tē mɛn na gbɔng nerat mɛ.

⁹Yɛn e dura banɛn mɛn e bayis mɛn. Yɛn e ragas banɛn dɛdɛrɛng sede bemât Sɔdɔm, yɛn e lɛrɛ vɛ wɛt. Gawey e ra yɛn! Yaga yɛn a ga vey na neves e ra bato mɛn.

¹⁰Yâng vemo de ba sé cik ba sé vê wɛng, yaga yɛn ê re nerât tomong mɛn.

¹¹Gawey e ra bemat beves! Yɛn ê di wɛng wɛt, yaga bê ra a yɛn pyɛ de ya sé tyɛng na tomong mɛn.

¹²À bemat hom, bemât hwɔpɔ̂s dyām e ndi be mɔt in, ko bemat de be hwɔpɔs a yɛn pyɛ́ be re negwɔm e ra yɛn. À bemat hom, bemât nuyel min ba sé kwɛlɛng hin, yaga na yin a tɔk gwong de yin ê kwey ɛ wɛt.

¹³Dagwi Darwey a ga yong ɛ́ na a tɛ̀ kun mɛn, a ga yong ɛ́ na a yɛrɛ a bemat mɛ shɔt.

¹⁴Dagwi Darwey a sé pɛrɛ tɛ̂ kûn bemakuk na bemât nuyel wɔgɔ, “Yin a ga vos bwî anap na retek, ko yin a ga sila nelɔ min na pyɛ́ de yin a seres ɛ̀ yi na bepɛng.

¹⁵Yaga sɛ́ de yin a bugut bemat hom, na yin a mɔt bepɛng ɛ? Me Darwey Dagwi Darwey, Dâ Jey Mwa ma ha ano.”

¹⁶Dagwi Darwey a ye, “Di kaa de behâ Yɛrusalɛm be dak! Yɛn e kyě kyè na bato e gwi. Be kyě bɛɛ ywey-ye-ywey be tē mwɛ̀ɛ na beras. Be kyě bɔrɔs bagat-bagat yaga na nerwěy bol mɛn ne kyě tosho na bemat be wokos,

¹⁷Darwey ê paa pyɛ̂ bâng bato mɛn. Dagwi Darwey ê hywɛrɛm hɛn.”

¹⁸E tuk o, Darwey ê sey ɛ̀ yi e behâ Yɛrusalɛm o kayɛ pyɛ de yɛn e ra kaa na yɛ — yɛ à nerwěy bwol, na rwán, na bèlɛlɛ fwɔ,

¹⁹na dyam tong, na nerwěy vɔ, na nerugû bâng bato mɛn,

²⁰na bediko mɛn, na balow de be tɛ̀sɛ e bègasɔ mɛn, tanga e berawit mɛn, na nefus něy nesang hyɔɔlɔl mɛn, na belɛl bekauri mɛn,

²¹na yɔ̄bɔ de yɛn e tɛ̀sɛ e bekɛn vɔ mɛn, tanga e bawol mɛn,

²²na berugu berat mɛn, na bègbɔng berugu belis mɛn, na besháwùl banga mɛn, na begyɛm mɛn,

²³na berugu de ba sé zělzel de be tē mɛ jík, na berugû ji mo, na toro rato tanga besháwùl.

²⁴E tô nesang hyɔɔlɔl yɛn e ró nesang fwirting, e tô tsɛ́p yɛn ê rɔgɔs shwey, e tô tâk tot, bato mɛn bê sè hulhul, e tô berugu berat yɛn ê tɛ̀sɛ berugû sesin, e tô nerat yɛn ê wok rekyen!

²⁵Beras mɛn bê wey na bewal, ko besuga mɛn e de como.

²⁶Ri rùhup gbɔng repomo bê sila na sesîn bemakuk, ko mwa repomo mo rê sè sede hwā de ba hywɛrɛm hɛ ko a sé sangal e vwel tashak.