Read berom Yɛshaya 30 Bible Online

Yɛshaya 30 - berom bible

Yɛshaya 30

¹Dagwi Darwey a ye, “Gawey e ra nèy sogô nehywɛ, yɛn e yong pyɛ̂ ra, sana jama bare hom, yɛn e ra gafiri, ko yi na simo hom wɛt, be gwɛsɛ banɛn e ra banɛn mɛn.

²Yɛn a yong ɛn na be kyè vɔk e Misra, sana rangal vô du hom. Yɛn ê wɔ̀ rangâl Farawo na a gyep ɛn, na yɛn a sɛ̀ dem sangal tyang e necam Misra.

³Gyêp Farawo hê sè a yin pyɛ rekyen, ko dem sangal tyang e necam Misra nê sè a yin pyɛ byɛs.

⁴Mwa ano de bemât fwom mɛ ba sé e Zowan, ko betom mɛ ba wul Hanes,

⁵ko kawɛ mwat ê vo rekyen yi na bemat o yaga bê sè pyɔlɔ na yɛn wɛt, bê vey a yɛn na sɛlɛ kɛ pyɔlɔ cak wɛt sɛ̌ rekyen na byɛs zɔng.”

⁶Ha siitit à hemo e ra ngyāma Nɛgɛf. “E ji vwêl reyɔm na rezot, hê gukum na hwā mɛ de be lulum, hê gàbak na yùmung. Yɛn e hashe yas mɛn e ra bemadung, ko pyɛ̂ nedanerey mɛn e ra bagûng bemaryat vɔk na bemat de bê nɔng ɛn pyɔlɔ wɛt.

⁷Yaga sɛlɛ̂ Misra mo ha sé yapyi, ha sé rat wɛt, yaga ano ma vo a Misra mo rezâ ‘Gwalwel-nshi.’ ”

⁸Kyè a remo, jɛk sogô nehywɛ mɛn e ra fwà bagasak, jining hɛ e bwok-basa, yaga na he ba sè e jeng de ye kyè vey, na he sè nuha e ra yɛn nesheneshey.

⁹Yɛn a sé bemât sogô nehywɛ, nèy bɔs, nèy de ne kyɛ́ ɛn nà wok basâ Dagwi Darwey.

¹⁰Nemo de ne tâng bemât bɛrɛng, “Yin kwon bɛrɛng wɛt.” Ko ne tâng bezarap Dagwi, “Yin kwon yis a wot na ha de ha sé mwin wɛt. Ha a wot hin pyɛ de ya tá, yis in na hâ neshɔngɔlɔng,

¹¹hala hin gwong, ye in rɛng yi e gwɛ, yin kwon to ha ha e ra WoJɛrɛ wo Israyɛl wɛt.”

¹²Yaga ano WoJɛrɛ wo Israyɛl a ye: “Yin a kyɛ́ in ha hom, yin a tɛ̀ gap e ra mɔt na kwɛlɛng, yin a raa yɛ e negya.

¹³Ano neves nemo nê sè a yin sede vwarâ duk lwis de gwa takla, gwa ga sek e jey, ko gwa vey bagât gaba, gwô gaba sana tɔk, e ji jeng tyɔng,

¹⁴gwô mɔbɔs hɛ sede rwêy mwât lɔ̂k nerwey, de ha bunut hɛ tyɔng wɛt, ba tɔk sɛ̀ bàk o hwak de bê vɛ́ mɛ kya e vû kya, kɛ be vɛ mɛ nshi e revɔng wɛt.”

¹⁵Yaga Darwey Dagwi Darwey, WoJɛrɛ wo Israyɛl a ye: Doyo hin vey na me yuu-yuu ko mê sey neken min. Tɛ̀ in gap min e ra me ko yin ê sangal ting, ko yin a kyɛ́ in,

¹⁶yin a ye: “Wey! Wot ê tele vɔk e hwomo e ra bedwa”, Ano tele hin! “Wot ê laga bedwa de be tele hyiw.” Ano bemat de bê ro in bê tele dey-dey.

¹⁷Bemat gu rining bê tele sede mwat gwining a shìra hɛn, ka sede bemat betungun ba shìra hin, ko yin ê tele, a dal ano, sɛ̌ ba wɔ̀ hala hin sede gwocwang tula e raku, sede pyɛ dura e rahwol.

¹⁸Yaga ano Dagwi Darwey a sé gyeng na a nɔng in nɔrɔ rat mɛ — yaga ano ê sogo na a dura a yin toshô reyɔm mɛ. Yaga Dagwi Darwey a sé wo gâs badu e tē. Vê wɛng à vemo de ba sɛt bayis mɛn e ra yɛ!

¹⁹Mwin, à yin bemât Siyɔn, vê sangal e Yɛrusalɛm, yin ê to tosho wɛt. Ê nɔng in nɔrɔ rat mɛ mwin jeng de a wok yin a sé tosho, ê wok na a vey.

²⁰Darwey ê nɔng in kpam-tûk negbang na nshî reyɔm. Mwat-basa min ê to lɛrɛ tó mɛ wɛt, ko bayis min bê di ɛ.

²¹Ko jeng de yin a doyo e vwɔ yege, kɛ mwɛlɛng, betong min bê wok retîn ha e bama min, he tē, “Gwong a gwomo, kyè in e gwɛ.”

²²Ano yin ê tɛ̀ ligis cī min de yin a lolom na dyam pyɛng, tanga yemo de yin a lolom na dyam shinang. Yin ê shara yɛ sede cɛ̂k rugu ríshik-rishik, yin ê yâng yɛ, “Kyè in e jey!”

²³Ê nɔng rwak yaga yére de yin e tus, na pyɛ̂ yeneng — pyɛ̂ hwiri, de yê vo yeneng naka ko ye sè pyak arɔng. E jeng o, berɔndɔng min bê re pyɛ́ e nekwɔn netes,

²⁴ko behywarak na bemadung de be how cap bê re sehwey de ba ga báng a vɛ, hemo de ba ga tā hɛ na cebut na cebut-yìn.

²⁵E ra kawɛ raku lwis, na kawɛ rahwol lwis bê sɛ̀ nerɔt de ne tele nshi — e tûk mɔbɔs bemat pyak, jeng de nekwɔn dál na ga gabsa.

²⁶Ano arɔng negbêy pwɛl nê sè sede nè gwi, ko negbêy gwi nê dal ano zang taama, sede negbêy nepɔlɔ netaama, e jeng de Dagwi Darwey ê rɔgɔs barâm bemat mɛ, ko a tɛ̀ baram de a ga mǎ hɛn mɛ be vel.

²⁷Di, rezâ Dagwi Darwey re yis yikyik, ré re kya na shom, na sekyeng pyak de sé tugus vɔk e rak o, bebɛrɛ̂k nu mɛ ba sila na yol, ko lem mɛ ha sé sede kya de he re.

²⁸Nesong mɛ na sé sede rɔt de ha tá nshi de na wul fwɔ — ê jàngat yere bemât jey na pyɛ jangât gawey, ê tɛ̀ a bèkarin mɛn nerwěy de ne kyè na yɛn e regyeng.

²⁹Hwô ra lwɛlɛ yerê gwo naturûk nzem Dagwi, na yey pyɛng sede mwat de e nusu jeng de ba pɛl ju na be wɔ́ e rakû Dagwi Darwey, vɔk e Raku Israyɛl.

³⁰Ko Dagwi Darwey ê tɛ̀ be wok fwɔ̂ negwɔm mɛ, na be di vwɔ mɛ de gwa sé gyirik wɔ̀ tabak mwat, e ji shom vyes na nebelem kya de ne wey na pyɛ́, na wûk rele, na gûl rwak tanga fwala.

³¹Bengyip bê hwo e ra BeAsirya mo sizɔng ras de ba wok fwɔ̂ Dagwi Darwey, na jeng de ba rusu hɛn na wɔ́rɔ dyam.

³²Ko e ra kahɛ rusu na gwelê tabak de Dagwi Darwey e rá ɛn mɛ, BeIsrayɛl bê dak bebing na yōm e ji como de ê ra na yɛn na vwɔ mɛ de a ga jut e rak o.

³³Yaga ba ga kana yong kwɔ̂n kya mɛ, mwin ba ga yong hɛ yaga gbɔng gwɔ̀m o, ba ga yong gàgbang rangâs revin mɛ twes o, ko ciwil arɔng, ba vɔk ɛ̀ kya na cɔ́gɔt kya mo shɛrɛk, ko nesong Dagwi Darwey sede rɔt kyâ negang nê tɛ̀ kya mo he sey.