Read berom Yɛshaya 31 Bible Online

Yɛshaya 31 - berom bible

Yɛshaya 31

¹Gawey e ra vemo de ba kyè vɔk e Misra e de jamâ sɛlɛ, ko yɛn a tɛ̀ gap mɛn e ra bedwa, yɛn a tɛ̀ gap mɛn e ra bekyɛkyɛ̂ bedwa yaga ba sé pyak, na e ra bemât bedwa yaga yɛn a vɔk gap pyak, ko yɛn a bɛrɛng á WoJɛrɛ wo Israyɛl wɛt, kɛ ba doyo vɔk na Dagwi Darwey wɛt!

²Mwa ano, yɛ a vɔk netsitsɛ̂ng véy na rezot, ê toyo na bama e ra ha mɛ wɛt, ko ê sogo e ra lɔ̂ vê ragas neves, na e ra vê sɛlɛ̂ vê ragas tom banɛn.

³BeMisra ba sé bemasi, ba sé Dagwi wɛt, bedwa mɛn ba sé renama, ba sé gabik wɛt. Sede Dagwi Darwey a nára vwɔ mɛ mwât sɛlɛ ê ye jògodok, ko womo de e sɛlɛ ê gaba, ko mwâ hɛn bê wey e dem o.

⁴Dagwi Darwey a yang me ngan: “Sede remo de gukum kɛ bwôt gukum wo lulum e ra vyel de wa ga vo, ko jeng de lwek o a yila bemɛn e ra wɛ, wô wok bengyip gbɔ mɛn kɛ wo tele hɛ lwɛ́lɛ mɛn wɛt. Ano, Dagwi Darwey, Dâ Jey Mwa ê gyirik na a ra como e ra Raku Siyɔn.

⁵Sede remo de non ke kyě rini e rak o na ke gyeng rɛngɛ̂ kɛ, ano de Dagwi Darwey, Dâ Jey Mwa ê gyep Yɛrusalɛm, ê gyep wɛ na a sey wɛ, ê gyili wɛ na pyɛ ye mǎ wɛ wɛt.”

⁶À yin BeIsrayɛl, to doyo hin vey na womo de yin a sogo a yɛ nehywɛ!

⁷Yaga e tuk hane, mwâ hin yin ê basak cī min yê dyam pyɛng na yê dyam shinang, de yin a yong na vɔ min e ji banɛn.

⁸Ano BeAsirya bê gaba na wal wo mwat wɛt, ko wal, wo mwasi wɛt wô re ɛn. Yɛn ê tele yi e wal o, ko bê tɛ̀ bewen mɛn be ra fwôm retek.

⁹Bemât nuyel mɛn bê hala gwofwa mɛn, ko bemât fwom mɛn bê hala túta mɛn na bengyip. Dagwi Darwey, de kya mɛ ha sé e Siyɔn ko fwam-ju mɛ gwa sé e Yɛrusalɛm, a ye ano.