Read berom Yɛshaya 32 Bible Online

Yɛshaya 32 - berom bible

Yɛshaya 32

¹E jeng o gbɔng gwɔ̀m ê re negwɔm na necik, ko bemât fwom mɛ bê gas badu e tē.

²Kawɛ e ji mɛn ê sè sede kwɔ̂n lɛrɛ yi e gul, kwɔ̂n sangal tyang yi e gûl rwak, sede nerɔt nshi e kwɔn hwogot, sede necam gwogbɔng gwofwa e vwêl hal.

³Ano vê bɛrɛng bê di, ko vê wêt betong bê wok ha.

⁴Neyey vê râ pyɛ́ na nefufǔl nê tɔrɔng pyɛ́ hywɛ. Balêm vê jɔgɔy bê ha dey-dey, ko hê sè tɛɛrɛ.

⁵Bê yâng tɔn à gbɔng mwat wɛt, kɛ hwêy-gul be yang hɛ a mwat rwat wɛt.

⁶Yaga betɔn be ha yapyi, ko neyey mɛn ne yong pyɛ̂ banɛn, na be ragas pyɛ́ de ya sé ligis, na be ha neha buru e ra Dagwi Darwey, na be hala vê simô pyɛ́ na vyong, na be shîm vê yêy hwɔshɔ nshi.

⁷Kayɛ pyɛ nèy-gul ya sé vyes, yɛn e yong pyɛ́ vyes, na be wey na bepɛng na neha bɔs, mwa ano de ha mɛn ha sé tyɛng.

⁸Ko mwat rwey o e ra pyɛ́ ryey o zɔng, ko yɛ e tumal e ra pyɛ́ ryey o arɔng.

⁹Sogo hin, yin behâ sangal sana reyɔm, wet in betong na neha hom, yin behwong de yin a sé sangal bɛs, wok in pyɛ de ma sé ha.

¹⁰E bamâ shey hining na kèbwang, yin ê vow, yin vê sangal bɛs, yaga jeng vôs nèy anap yê sè wɛt, jeng vôs nèy cɔ́gɔt yê vey wɛt.

¹¹Vow in, yin behâ sangal e ji netâ yas, digis hin na bengyip, yin vê sangal bɛs, hywɛrɛm hin, na yin sè kpimit, na yin tɛ̀ berugû sesin e berawit.

¹²Tɛ̀ in sekun yaga hiri de ba sé rat — bê wey! Tɛ̀ in vɔ e to yaga batîn anap de be mara — bê to sè wɛt!

¹³Yaga vwêl bemat hom rɔgɔ na shik ha sé ras ɛ, ko yaga mwa nelɔ yey pyɛng e gbɔng repomo de be shɛgɛsh ɛ̀.

¹⁴Bê kyini lɔ gwɔ̀m, be hala gbɔng repomo de ra sila na bemat, kwɔ̂n dál na tyɔ̌n nekanang yê tɛ́ ɛ regyeng nesheneshey, kwɔ̂n kyé kyè bemadung bɛs, kwɔ̂n rê sehwêy vyēl.

¹⁵Ê sè ano sɛ̌ Dagwi Darwey a shushu gabik e ra wot, yi e rak o, ko hêy gbingiring hê tɛ́ ɛ hwiri de gwô mara pyɛ́ pyak, ko hwiri mó gwô mara pyɛ́ pyak de bê tang gwɛ à rehwot.

¹⁶Ano gâs badu e tē na necik bê sè e kahɛ kwɔn, yi e hêy gbingiring vɔk e hwiri de gwó mara pyɛ́ pyak.

¹⁷Necik nê vey na sangal tyang, ko pyɔlɔ̂ necik yê sè neyaang na yêy dyɛngɛ gbak-gbak.

¹⁸Bemat hom bê nàra e kwɔ̂n sangal tyang, e nelɔ yêy dyɛngɛ, na e nekwɔn pɔngɔ sana reyɔm.

¹⁹Fwala gwô wey na rehwot, ko gbɔng repomo mo rê gaba e vwel.

²⁰Yin a di wɛng de yin e tus pyɛ́ e nekwɔn nshi naka, Yin a vɔk yey pyɛng de yin e tɔk hala berɔndɔng na bemadung be kyě re sehwey kagwa.