Read berom Yɛshaya 33 Bible Online

Yɛshaya 33 - berom bible

Yɛshaya 33

¹Gawey e ra hwo! Hwo de hwó wey na behak, ko ba ga wey na hwo wɛt, hwo de hwó kwɛlɛng behak, ko ba ga tɔk kwɛlɛng hwo wɛt! Jeng de hwà ga tik nà wey na behak, bê wey na hwo, ko jeng de hwà tik nà kwɛlɛng behak, ko bê kwɛlɛng hwo arɔng.

²À Dagwi Darwey, wok nemwishish mot, wot a sɛt bayis e ra hwo. Sè vwɔ̂ gap mot kayɛ jeng, wò sey ot jeng reyɔm.

³E jeng lwɛ́lɛ sogô nehywɛ, yére bemât jey ye tele, jeng de segwɔm mo se sogo, yére bemât jey ye shara hɛ.

⁴Ba tula pyɛ̂ jugu, sede bekǔt be tula, sede rewûk rawal, bemat bê hwo e ra yɛ.

⁵Dagwi Darwey a sé sangal e rak o yikyik e kwɔ̂n nerey mɛ. A sila Siyɔn na gâs badu e tē na necik.

⁶Yɛ̀ ê tɛ̀ vwel min he sè tɛk, e jeng min. Ê sila hɛ na sêy neken, na netsitsɛng na tɔ́k, bengyip Dagwi Darwey vɛ̀ à yas mwin.

⁷Di in! Vê gap bé ra sesin e jey mwa, betom sangal tyang bé tosho na lashê yey.

⁸Bègbɔng begwòng ba ga hala vɛ̀ hal, vit à bemât kwɛngɛl e gwòng o. Ba ga kwɔrɔ wuna-na-sira, ba ga byɛs vê nuha sira mo, bé gyeng nekên mwasi wɛt.

⁹Vwel o he ra sesin, ha ga tɛ́ ɛ yapyi, bahwot Lɛbanɔn, ba ga tē nɔɔshɔsh, ba ga lashe hɛn. Tyɛl Sharon ya ga tɛ́ ɛ hêy gbingiring, ko cɔ́gɔt Bashan na yê Raku Karmɛl, ya ga tē zùt a berang mɛn.

¹⁰Dagwi Darwey a ye, “A remo mê sogo, a remo mê jut kwɔn hom e rak o, a remo mê jut nerey hom.

¹¹Yin a sey jim ko yin a tɔ, ko yere min o ya sé byɛmɛ na cugul zɔng, Nesong min na sé sede kya de hê re in.

¹²Ko yere bemat o bê sè sede kya ha re ɛn ba tɛ́ ɛn fongol pwɛng, sede rɔgɔ de ba tow hɛ, ba bomo hɛ e kya.”

¹³À yin vê yikyik, wok in pyɛ de ma ga ra, À yin vê bagat, di in gap hom.

¹⁴Bemât banɛn e Siyɔn ba vɔk bengyip, Vôw rebek ha ga vo vê ligis. “Wà e ji mot de ê tɔk sǎ na kya hemo de he re pyɛ̂ mwa ɛ? Wà e ji mot ê tɔk sǎ na nebelem kya nemo nesheneshey ɛ?”

¹⁵Womo de e kyè cik ko e ha tsak o, womo de e byɛs pyɔlɔ̂ mɔ̂t bemat, womo de e gang pyɛ bâng nu e jey e tô sêy yɛ̀, womo de e dul betong mɛ yi e wôk hâ lushâ nemi, ko e bang bayis mɛ yi e bɛrɛng neves,

¹⁶yɛ ê sangal e kwɔ̂n garang tyang, kwɔ̂n dal mɛ hê sè e sɔ̂s beta, bê nɔngɔs hɛ pyɛ̂ re mɛ, yɛ ê bidɛ nshi wɛt.

¹⁷Bayis min bê di gbɔng gwɔ̀m e ji nerat mɛ, yɛn ê di vwel de ha nára hɛ yikyik.

¹⁸Yey min yê vɔk bengyip jeng de a di tomông Dagwi Darwey. “Mwat de á bara hot o á wɛ̀? Mwat de á masa nedirîk yas mot á wɛ? Mwat de á bara tyɔ̌n yas mot á wɛ̀?”

¹⁹Yin ê to di bemât kaa vane wɛt, bemat de be ha na lem sɔgɔlɔk, lêm negbang, bemât jɔgɔy e lem de hwà tɔk hɛ wɛt.

²⁰Tɛ̀ bayis e ra Siyɔn, gbɔng repomô nzem mot detidetu. Bayis mo bê di Yɛrusalɛm, kwɔ̂n sangal rat, buk de gwô sek wɛt, gwomo de bê sang hwɔlɔ bekpɛk o be paa vɛ wɛt, ko vit a rwîk gwɛ hwak de gwô tùt ɛ.

²¹Ko e hwomo, Dagwi Darwey ê sangal e ji mot e ji segwɔm mɛ. Ê sè kwɔ̂n nerɔt netes o, ko bedwa-nshi bê tɔk wɔ e nɛ wɛt, ko bedwa-nshî begwɔ̀m bê tɔk kwey nɛ wɛt.

²²Rǐk bedwa-nshî vê repugu mot bê vibis hɛn dɔshɔk, bê tɔk kaba swesêk dwa-nshi mo gak wɛt, kɛ bê kaba berugû vôs gul o pyot wɛt. Yi ano wot ê sɛ̀ pyɛ̂ jugu pyak de wot ê gas, bemât yɔmɔng mwa bê gabsa e ra pyɛ̂ jugu mo. Yaga Dagwi Darwey ê sè wò shɔt mot, Dagwi Darwey ê sè wò nɔngɔ̂s badu, Dagwi Darwey ê sè gbɔng gwɔ̀m mot, e yɛ de ê sey ot.

²⁴Vit a mwât e hwomo de ê ye, “A sé a me tyang wɛt.” Dagwi Darwey ê hala a yɛn banɛn mɛn.