Read berom Yɛshaya 34 Bible Online

Yɛshaya 34 - berom bible

Yɛshaya 34

¹Vèy in bagat na yin a wok, à yin yére bemât jey. Wet in betong à yin bemat! Tik na jey ye wok, na pyɛ̂ mwa de ya sila yɛ. Tik na sevwel se wok na pyɛ̂ mwa de ya vɔk neken e sɛ.

²Yaga Dagwi Darwey a vɔk shom na mwa yére bemât jey, e lashe yey e ra bagyɛng mɛn mwa, a ga sira na a wey na yɛn hywiri, a ga nára hɛn na be mɔbɔs hɛn, sede nɔrɔ̂ rangas.

³Bê bomos bavin mɛn e majey, ko nesang bavin o nê tugus, beraku bê senge na nemi mɛn de ne tele.

⁴Mwa regyɛng lagwi rê bɔsɔ, ko larwak wô gunus hɛ sede bwok-basa. Mwa regyɛng wɛ rê ye nɔɔshɔsh, sede gworwang e ra tîn anap, gwô gaba, kɛ sede nèy regwi e ra tin o.

⁵Jeng de wal hom wa ga sila fwom shom wɛ e lagwi, ko wô hwo e ra Ɛdɔm, yaga râ shɔt, e ra bemat de Dagwi a yɛrɛ a yɛn wey hywiri.

⁶Dagwi Darwey a vɔk wal de nemi na ga bang wɛ, de wa ga tɛ́ ɛ tɔlɔt na sebwep, na nemî byôt vyel pyɛng na shi, na sebwêp pyîk beturuk. Yaga Dagwi Darwey a yong nɔrɔ̂ yas e repomô Bɔsra, gbɔng yɛ̂t yas e vwêl Ɛdɔm.

⁷Bemus hey bê wey ɛ̀ tanga yɛn, na berɔndɔng mwa na bemùs lɔ, vwel mɛn o hê sing ɛ na nemi, ko fongol o gwô sè tɔlɔt na sebwep.

⁸Yaga Dagwi Darwey a vɔk tûk talâ pyɔ̌n, shêy virî Siyɔn yi e kûn bɔs.

⁹Ko nerɔt Ɛdɔm nê tɛ́ ɛn negang, ko fongol o gwo tɛ́ ɛ kya, ko vwel mwa hê tɛ́ ɛ negang de kya he re.

¹⁰Nagwi na naturuk bê tɔk rimi hɛ wɛt, sekyêng hɛ sê turus e rak o sana yɛnɛ. Yi e zamang hemo vɔk e het, hê nàra gbingiring, vit a mwat de ê kwey e hɛ nesheneshey.

¹¹Ko kwɛng na ying-gyi bê sè e hɛ, ying-gyi na hwǎk be sangal ɛ. Ê nára rwîk masâ nètabat na pyɛ dirik o na a tɛ̀ vwel o gbingiring sede jeng susu mo.

¹²Yɛn ê yila rɛ à Vwêl Tɔɔlɔl, vit a segwɔm.

¹³Jaal yê ras e nelɔ begwɔ̀m, rɔgɔ na shik e nekwɔn dál o. Hê sè kwɔ̂n sangâl nèvu-hey na nelɔ bengyuwa.

¹⁴Shálum yê manas na bemurum e hwomo, vyêl-cēng yê tosho e ra bemɛn, ying-gyi-chit yê wɔ e hwomo ye sɛ̀ kwɔ̂n pɔngɔ.

¹⁵Ying-gyi yê tɛ̀ rɛngɛ e hwomo, ye tɛ̀sɛ bagyi, ye kwɛk vɛ, ye ras nèy o e necam yɛ. E hwomo bekim bê tula hɛn ɛ, kawɛ na hwā mɛ.

¹⁶Jama hin na yin basa bwok-basâ Dagwi Darwey: Vit à cak e ji pyɛ́ yemo de yê sè vit, vit a cak de yê sè sana hwā mɛ. Dagwi Darwey a nɔng nu ano, ko gabik mɛ ha tula yɛ̄ ano.

¹⁷Yɛ̀ a ga gas a yɛn yɛ mwa, vwɔ mɛ gwa ga nɔ̂ng kayɛ mo nu mo mɛ. Yɛn ê vɔk yɛ nesheneshey, yi e zamang vɔk e zamang yɛn ê sangal e vwêl Ɛdɔm de ba ga wey mɛ.