Read berom Yɛshaya 35 Bible Online

Yɛshaya 35 - berom bible

Yɛshaya 35

¹Tik na hêy gbingiring na bavwel bahwogot be vɔk yey pyɛng! Tik na hêy gbarak he feng ko he tá pyɛ́, sede bejamuk de be tē gbuk!

²Hê tā pyɛ́ tyɔng wɛt, ko he feng, na yey pyɛng, na râ biibi! Bê nɔ̂ng hɛ gbɔng nerât Lɛbanɔn, na nɛ̂p Raku Karmɛl tanga hê Tyɛl Sharon. Yɛn ê vɔk gbɔng nerât Dagwi Darwey na nɛ̂p Dagwi mot.

³Nɔ́ng în vɔ de ba ga ruru gap, na yin tɛ̀ bakwot de ba sé gbɛrɛk ting!

⁴Yang în vemo de neyey mɛn na vɔk bengyip: “Vɔk in gap, vɔk in bengyip wɛt! Dagwi min à womo ê vey na a tala tomong ves, na a tala tomong rat — ê vey na a sey in.”

⁵Ano bayîs bebók bê to di, ko betong bekpey bê to wok.

⁶Vê yɔmɔng bê gyilsit sede bevow, ko balêm bebébe bê ra lwɛlɛ̂ yey pyɛng. Yaga nshi nê takla yi e hey hwogot, ko nerɔt nê sè e hêy gbingiring;

⁷bazɛk de ba fes sizɔng bê tɛ́ ɛn dideng, ko vwel hwogot he tɛ́ ɛ lel nshi, kwɔ̂n sangâl nevû-hey hê tɛ́ ɛ bèy, sɔng o gwô sè sere na bedɛnɛ.

⁸Gbɔng gwong gwô sè e hwomo, ko bê tâng gwɛ à Gwông Nejɛrɛ. Vê ligis na betɔn bê kyè e gwɛ wɛt, ko gwô sè yaga vê raà gwong o.

⁹Vit a gukum de wô sè e gwɛ, kɛ ngyāma rê banama yê vey e gwɛ, ko e vemo de ba ga vibis hɛn de bê kyè e gwɛ.

¹⁰Ko vemo de Dagwi Darwey a ga sey ɛ̀ hɛn bê toyo, ko bê vey e Siyɔn na râ lwɛlɛ, bê tɔrɔ bato mɛn na bekpîn yey pyɛng, yɛn ê vɔk yey pyɛng na feng de vit à yɛnɛ, ko lashê yey na vôs yey bê tele e jey.