Read berom Yɛshaya 36 Bible Online

Yɛshaya 36 - berom bible

Yɛshaya 36

¹E shey hê kuru na hɛ naas de Hɛzɛkiya a re negwɔm e Yuda, Da vwel Asirya, Senakerip a vey hwo e ra vwel o, a vo karɛ repomo de ba gwɔrɔ na jwâ-pomo sɛ̌ Yɛrusalɛm nju wɛ de a re wɛt.

²Ko mwa ano, Da vwel Asirya mo a tomo begbɔng bemât nuyel mɛ betat yi e Lakish tanga gbɔng regyɛng bemât como, na be kyè vɔk e Yɛrusalɛm. Jeng de yɛn a pom, begbɔng o mo ba tumal bagat na cwɛl de ba kus ɛ berugu e gwông nshi de gwa yi e kadûng bato.

³Yɛn a tomo, ba simo be ha na Gbɔng Gwɔ̀m Hɛzɛkiya. Ko bemât nuyel mɛ betat ba nusu, na be wɔ man na yɛn, hwak e ji mɛn à Ɛliyakim Hilkiya, de a sé mwât bɛrɛng lɔ gwɔ̀m, bwang beba mo ba sé Shɛbna, mwat-jɛk, tanga Yowa Asaf, mwat-jɛk pyɛ̂ bare yê negwɔm arɔng.

⁴Hwak e ji bemât nuyêl BeAsirya mo a ha a yɛn, “Ma vɔk neha yaga Hɛzɛkiya yi na gbɔng o, Da vwel Asirya. Yang ɛ ngan: ‘Hwà tɛ̀ gap mō e ra wa arɛt?

⁵Hwó bare, hwó yong begwong como, na hwo re yɛ na nu zɔng a? E wa de a rɔda sɛlɛ hwo a remo de hwà ga sogo a gbɔng gwɔ̀m Asirya nehywɛ ɛ?

⁶Hwó tɛ̀ gap mō e ra Misra tanga gbɔng gwɔ̀m mɛn a? A sé sede mwat de a tē yìk e ra cwang sere. Wô kwɔrɔ hɛ zɔng, ko wô sɔklɔ hɛ e vwɔ. Ano de gbɔng gwɔ̀m Misra a sé a mwa vemo de ba tɛ̀ gap mɛn e ra yɛ.

⁷“ ‘Kɛ gyeng hwô yang me, “Wot a sé tɛ̀ gap e ra Dagwi Darwey, Dagwi mot.” Ko di, e hwo de hwà tɛ̀ be gangas nekwɔn re a yɛ fongol tanga nekwɔn nása a yɛ nenɔrɔ wɛt a? E hwo de hwà yang bemât Yɛrusalɛm tanga BeYuda be re a yɛ fongol e kwɔn hining e Yɛrusalɛm wɛt ɛ?

⁸“ ‘Tik na hwo yong ɛ na darwey hom, Da vwel Asirya. A rɔda nɔng o bedwa gu baba (2,000), ka sede hwô sɛ̀ bemât lagsa vɛ.

⁹Hwô ka tɔk re mwât nuyêl como mot swɛl o wɛt! Hwo de hwà ye yɛndɛng e ra BeMisra, na be nɔng in bekyɛkyɛ̂ como na bedwa arɔng.

¹⁰Hwó bare, darwey hom a hwo e ra vwel hemo, na a wey na hɛ, ko Dagwi Darwey sana nɔng ɛ nu a? Kée wey! A sé Dagwi Darwey pyɛ mɛ de a nɔng ɛ nu ano!’ ”

¹¹Ɛliyakim na Shɛbna tanga Yowa ba yang ɛ, “Gabɔk, ha na wot e lêm BeAram. Wot a tɔk hɛ. Hwo ha e lêm BeIbrani wɛt, yaga bemat de ba sé e ra jwâ-pomo ba sé wokos ha mō.”

¹²Ko mwât nuyêl BeAsirya mo a toyo a yɛn, a ye, “Darwey hom a tomo me, na me vey ha na bemât mwa, ko na darwey min tanga yin bemât nuyel nju min zɔng wɛt. Bemat vemo ba vey bagât re beving mɛn, na be sɔ nshî-tɔs mɛn tanga mwa yin betat vemo!”

¹³Ko a to gwɛ ha na gbɔng fwɔ rɛng-rɛng yaga na kawɛ mwat a wok e lêm BeIbrani, a ye, “Wok in pyɛ de gbɔng o, Da vwel Asirya a ye:

¹⁴Yin kwon tɛ̀ tong na hâ kwɛlɛng Hɛzɛkiya wɛt! A rɔda tɔk sey in yi e vwɔ hom wɛt.

¹⁵E tang in, yin tɛ̀ gap min e ra Dagwi Darwey de ê sey in. E to tang in, gbɔng repomo remo rê gaba e vwɔ̂ Da vwel Asirya wɛt.

¹⁶“Kyɛ́ in nà wok ha mɛ, tɛ̀ in betong na hâ Da Vwel hom e negya. Ha mɛ ma hemo ngan: Nɔng in bato min e vwɔ hom, nusu hin yi e repomo mo! Ko kawɛ e ji min ê tɔk re nèy cɔ́gɔt anap na ne regwi mɛ, ê to sɔ nshî hwes mɛ arɔng.

¹⁷Sɛ̌ jeng de ma rɔda ba hashe hin vɔk e vwel de ha sé tyɛng na min, kwɔn de yin ê how ɛ pyɛ̂ yeneng. Yin ê tus ɛ cɔ́gɔt anap na yê regwi, ko yin ê sɛ̀ kpam-tuk, na nshî anap, na něy pwat tanga shok arɔng. Wok in ha hom, ko yin ê sangal beken, yin ê wey wɛt. “Yin tɛ̀ tong na hâ Hɛzɛkiya wɛt! E kwɛlɛng hin zɔng, jeng de e tang in, Dagwi Darwey a rɔda sey in.

¹⁸Cī yerê bemât jey cak ya ga sang dul bavwel mɛn yi na Da vwel Asirya arɛt?

¹⁹E sɛ́ de ya té na cī bapomô Hamat tanga Arpat ɛ? E sɛ́ de ya té na cī Sɛfarvayim, na Hena tanga Iva ɛ? Ya tɔk dul me nà re Samariya arɛt?

²⁰Vit à cak e ji yɛ de ya tɔk sey bemat mɛn yi e vwɔ hom. Ko yin e bare, Dagwi Darwey, Dagwi min ê tɔk sey Yɛrusalɛm yi e vwɔ hom a?”

²¹Bemat de ba sé e hwomo ba sǎ yuu. Vit a hwak de a hanat pyɛ cak, yaga Gbɔng Gwɔ̀m Hɛzɛkiya a kana nɔng nu, be sǎ yuu.

²²Ɛliyakim na Shɛbna tanga Yowa ba hama berugu mɛn yaga lashê yey. Yɛn a wɔ̀ ha a Hɛzɛkiya mwa pyɛ́ de mwât nuyêl BeAsirya mo a ga ha.